Tuesday, November 13, 2007

ആറുസെന്റില്‍ ഒരു വീട്‌ പ്ലാന്‍-19




ആറുസെന്റ്‌ സ്ഥലത്ത്‌ ചെയ്തുകൊണ്ടിരിക്കുന്ന ഒരു വീടിന്റെ പ്ലാന്‍.

അടുക്കളമാത്രം വാസ്തുകണക്കില്‍ ആക്കിയിരിക്കുന്നു.ഗ്യാസ്‌ സ്റ്റൗ ഉപയോഗിച്ച്‌ പാചകം ചെയ്യുന്നതിനും മാത്രം സൗകര്യം ഉള്ള ഒരു ചെറിയ അടുക്കളയാണ്‌ ആദ്യത്തേത്‌. പുറത്ത്‌ വര്‍ക്ക്‌ ഏരിയായില്‍ വിറകടുപ്പിനുള്ള സൗകര്യം ഒരുക്കിയിരിക്കുന്നു. ഈ വര്‍ക്ക്‌ ഏരിയാക്കും സ്റ്റോറിനും 220 സെന്റീമീറ്റര്‍ ഉയരത്തില്‍ റൂഫ്‌ കൊടുക്കണം. എങ്കിലേ കോമണ്‍ ടോയ്‌ലറ്റിനു വെന്റിലേഷന്‍ ലഭിക്കുകയുള്ളൂ.

അടുക്കളയില്‍ നിന്നും ഒരു ചെറിയ ഓപ്പണിങ്ങ്‌ കോര്‍ട്ടുയാഡിലേക്ക്‌ നല്‍കിയിരിക്കുന്നു. കോര്‍ട്ടുയാഡിന്റെ ഒരു വശത്തുകൊടുത്തിരിക്കുന്ന വിന്റോവഴി മുന്‍വശത്ത്‌ ആരെങ്കിലും വന്നാല്‍ കിച്ചണില്‍ നിന്നുകൊണ്ടുതന്നെ കാണാവുന്നതാണ്‌.കോര്‍ട്ടുയാഡ്‌ ചെറുതാണെങ്കിലും അകത്തെ ചൂടുള്ള വായു പുറത്തേക്ക്‌ പോകുന്നതിനു ഉപകരിക്കുന്നു. ഇതുമൂലം വീടിനകത്ത്‌ ചൂടുകുറവായിരിക്കും.കോര്‍ട്ടുയാഡിന്റെ മധ്യത്തില്‍ വെള്ളാരം കല്ല് പാകിയും അതിനു നടുവില്‍ ടെറാകോട്ടകൊണ്ടോ കോണ്‍ക്രീറ്റുകൊണ്ടോ ഉരുളിയുടെ ആകൃതിയില്‍ ഉണ്ടാക്കിയ ടാങ്കില്‍ മത്യങ്ങളെ വളര്‍ത്താവുന്നതാണ്‌.വര്‍ഷക്കാലത്ത്‌ ഈ ടാങ്കില്‍ വെള്ളം നിറഞ്ഞു മത്യങ്ങള്‍ ചാടിപോകാതിരിക്കുവാന്‍ മുകളില്‍ വല ഇടാം.കൂടാതെ ടാങ്കിനു മുകള്‍വശത്ത്‌ വശങ്ങളിലേക്ക്‌ ദ്വാരങ്ങള്‍ ഇട്ട്‌ വെള്ളം നിറഞ്ഞൊഴുകാതിരിക്കാനുള്ള സംവിധാനം ഒരുക്കാം.

വടക്കുകിഴക്ക്‌ ഭാഗത്ത്‌ അടുക്കളയും കിഴക്കോട്ട്‌ പ്രധാനവാതിലും ക്രമീകരിച്ചിരിക്കുന്ന ഈ വീടിന്റെ തെക്കുപടിഞ്ഞാറുമൂലയില്‍ ആണ്‌ പ്ലോട്ടിന്റെ പ്രത്യേകതകൊണ്ട്‌ (റോഡ്‌ തക്കുപടിഞ്ഞാറെ മൂലവരെയേ ഉള്ളൂ.) കാര്‍പോര്‍ച്ച്‌ കൊടുത്തിരിക്കുന്നത്‌.

ഡിസൈനിനു കടപ്പാട്‌ മി.സിസ്സ്‌ എസ്‌.കുമാര്‍.

കെട്ടിടനിര്‍മ്മാണ ചട്ടങ്ങള്‍ പഞ്ചായത്തുകളിലേക്കും.

ഗ്രാമങ്ങള്‍ നഗരങ്ങളായിക്കൊണ്ടിരിക്കുന്ന ഇന്നത്തെ സാഹചര്യത്തില്‍ കെട്ടിടനിര്‍മ്മാണത്തിനു ചില നിബന്ധനകള്‍ പണ്ടേ നടപ്പിലാക്കേണ്ടതായിരുന്നു. റോഡുവികസനം പലയിടത്തും അസാധ്യമാകുകയോ ദുഷകരമാകുകയോ ചെയ്തതില്‍ മുന്‍ ഭരണാധികാരികളുടെ ദീര്‍ഘവീക്ഷണമില്ലായ്മയും സങ്കുചിത രാഷ്ടീയതാല്‍പര്യവും മുന്‍ നിര്‍ത്തിയുള്ള നടപടികള്‍ പ്രധാനപങ്കുവഹിച്ചിട്ടുണ്ട്‌.പലകാരണങ്ങളാല്‍ അല്‍പം വൈകിയാണെങ്കിലും ഗ്രാമങ്ങളില്‍ കെട്ടിടനിര്‍മ്മാണചട്ടങ്ങള്‍ ഇന്ന് പ്രാബല്യത്തില്‍ വന്നിരിക്കുന്നു.

സംസ്ഥാനത്തെ 999 പഞ്ചായത്തുകളിളിലും കെട്ടിടനിര്‍മ്മാണചട്ടം നിലവില്‍ വരുത്തിയ അച്യുതാനന്ദന്‍ ഗവണ്മെന്റിനു (പൂര്‍ണ്ണമായും സഖാവ്‌ വിഭാവനം ചെയ്ത രീതിയില്‍ ആണോ ഭരണം നടക്കുന്നതെന്ന് അറിയില്ല) അഭിനന്ദനങ്ങള്‍ അര്‍പ്പിക്കുന്നതോടൊപ്പം പുതുതായി കൊണ്ടുവരാന്‍ പോകുന്ന പഞ്ചായത്ത്‌ കെട്ടിടനിര്‍മ്മാണ ചട്ടങ്ങളില്‍ ഉള്‍പ്പെടുത്തേണ്ട/ശ്രദ്ധിക്കേണ്ട ചില കാര്യങ്ങള്‍ കൂടെ സൂചിപ്പിക്കുന്നു.പുതുതായികൊണ്ടുവരുന്ന പഞ്ചായത്ത്‌ കെട്ടിടനിര്‍മ്മാണ ചട്ടങ്ങളില്‍ കൂടുതല്‍ ഇളവു വരുത്തുകയും അഴിമതിക്ക്‌ ഇടവരുത്താത്തവിധത്തില്‍ നിയമങ്ങളില്‍ വ്യക്തത ഉണ്ടായിരിക്കുകയും ചെയ്യണം.ബോധപൂര്‍വ്വം നിയമം ലംഘിക്കുന്നവര്‍ക്കെതിരെ ശക്തമായ നടപടികള്‍ എടുക്കുകയും വേണം.

1.മൂന്നുസെറ്റുവരെയുള്ള സ്ഥലത്തു പണിയുന്ന കെട്ടിടങ്ങള്‍ക്ക്‌ അനുവദിച്ചിട്ടുള്ള ദൂരപരിധി സംബന്ധിച്ചുള്ള ഇളവുകള്‍ അഞ്ചുസെന്റുവരെ അനുവദിക്കുക.

2.പൂര്‍ണ്ണമായും ഓല,മുള തുടാങ്ങിയവകൊണ്ട്‌ താല്‍ക്കാലികമായി നിര്‍മ്മിക്കുന്ന വീടുകളെ കെട്ടിടനിര്‍മ്മണചട്ടങ്ങളില്‍ നിന്നും ഒഴിവാക്കുക. ( ചുമരു ഇല്ലാതെ ഓലകൊണ്ട്‌ വശങ്ങള്‍ മറച്ചും മേല്‍ക്കൂര ഓലകൊണ്ട്‌ നിര്‍മ്മിച്ചതുമായ വീടുകള്‍)

3.നഗരപ്രദേശങ്ങളില്‍ നിന്നും വ്യത്യസ്ഥമായി ഗ്രാമങ്ങളില്‍ "നാട്ടുവഴികള്‍" അഥവാ ഇടവഴികള്‍ ഒത്തിരിയുണ്ട്‌.ഇത്തരം വഴിയില്‍ നിന്നും ആദ്യ 75 മീറ്റര്‍ വരെ 1.5 മീറ്ററും തുടര്‍ന്ന് 2മീറ്ററും എന്ന വ്യവസ്ഥ ലഘൂകരിച്ച്‌ ആദ്യ അഞ്ഞൂറുമീറ്റര്‍ നീളമുള്ള വഴിയില്‍ നിന്നും കെട്ടിടത്തിലേക്ക്‌ 1.20 മീറ്റര്‍ അകലം ആക്കുക.

4.ഭൂജലനിരപ്പ്‌ ഉയര്‍ന്നതും,വര്‍ഷക്കാലത്ത്‌ വെള്ളക്കെട്ടുള്ളതും, കുടിവെള്ളത്തിനു ക്ഷമം ഇല്ലാത്തതുമായ പ്രദേശങ്ങളില്‍ മഴവെള്ളസംഭരണികള്‍ നിര്‍ബന്ധമാക്കാതിരിക്കുക. നിലവില്‍ 100 മീറ്റര്‍ സ്ക്വയറില്‍ കൂടുതല്‍ വലിപ്പമുള്ള കെട്ടിടങ്ങള്‍ക്ക്‌ കെട്ടിടത്തിന്റെ തറവിസ്തീര്‍ണ്ണത്തിനു ആനുപാതികമായ വലിപ്പത്തില്‍ മഴവെള്ള സംഭരണി നിര്‍ബന്ധമാണ്‌.ഇത്‌ ഗ്രാമീണമേഘലയില്‍ വീടുവെക്കുന്ന സാധാരണക്കാര്‍ക്ക്‌ ഏകദേശം 10000 മുതല്‍ 20000 വരെ അധിക ചിലവു വരുത്തുന്നു.

5.മണല്‍ പാസ്സ്‌ അംഗീകൃത ലൈസന്‍സ്ഡ്‌ എഞ്ചിനീയര്‍ ക്വാണ്ടിറ്റി കണക്കാക്കി സാക്ഷ്യപ്പെടുത്തുന്ന അളവില്‍ അനുവദിക്കുന്ന രീതി നിര്‍ബന്ധമാക്കുക.കൂടാതെ ഒരു സര്‍വ്വേനമ്പറില്‍ ഉള്ള ഭൂമിയില്‍ കെട്ടിടം നിര്‍മ്മിക്കുന്നതിനുള്ള അനുമതി നല്‍കുകയും അതുപ്രകാരം മണല്‍പാസ്‌ അനുവദിക്കുകയും ചെയ്യുമ്പോള്‍ തന്നെ പ്രസ്തുത സ്ഥലത്ത്‌ പണിയുന്ന കെട്ടിടത്തിനു മണല്‍ അനുവദിക്കും മ്പോള്‍ അതു ഘട്ടം ഘട്ടം ആക്കുക. പലയിടത്തും "ഡെമ്മിപ്ലാനുകള്‍" സബ്മിറ്റ്‌ ചെയ്ത്‌ മണല്‍പാസ്‌ എടുക്കുകയും പിന്നീട്‌ വീടുപണിയാതിക്കുകയും ചെയ്യുന്ന പ്രവണ കണ്ടുവരുന്നു.(മണല്‍ മാഫിയ ഇങ്ങനെ മണ്ണ്‍ സംഘടിപ്പിച്ച്‌ മറിച്ചുവില്‍ക്കുന്നു)

6.എഞ്ചിനീയര്‍മാക്കും സൂപ്പര്‍വൈസര്‍മാക്കും ലൈസന്‍സ്‌ ഏര്‍പ്പെടുത്തിയപോലെ മേസ്തിരിമാര്‍ക്കും ലൈസന്‍സ്‌ ഏര്‍പ്പെടുത്തുകയും പ്രസ്തുത മേസ്തിരിയുടെ കീഴില്‍ ആളുകളെ ജോലിക്ക്‌ നിര്‍ത്തുകയും ചെയ്യുക.അവിദഗ്ദരായ മേസ്തിരിമാര്‍ക്ക്‌ പുതിയ ശാസ്തീയമായ അറിവുകള്‍ പകര്‍ന്നുകൊടുക്കുവാന്‍ അതാതു ജില്ലകളീല്‍ സംവിധാനം ഒരുക്കുക. (വനം വകുപ്പ്‌ ആനപാപ്പന്മാര്‍ക്ക്‌ കോഴ്സുനടത്തി ലൈസന്‍സ്‌ നല്‍കുന്നപോലെ ഉള്ള സംവിധാനം)

7.അന്യ സംസ്ഥനനങ്ങളില്‍ നിന്നും വരുന്ന തൊഴിലാളികള്‍ മലയാളിയായ മേസന്റെ കീഴില്‍ തന്നെ ജോലിചെയ്യുന്നു എന്നും അവര്‍ ഏതുസംസ്ഥാനത്തുനിന്നും വരുന്നു അവരെ സംബന്ധിച്ചുള്ള തിരിച്ചറിയല്‍ രേഖകളും തൊഴില്‍ ഉടമയില്‍നിന്നും കൃത്യമായി കൂലിയും അടിസ്ഥാന സൗകര്യവും ലഭിക്കുന്നുണ്ടെന്ന് ഉറപ്പുവരുത്തുവാനുള്ള സംവിധാനം അതാതു പഞ്ചായത്തുകളില്‍ ഏര്‍പ്പെടുത്തുക.

8. പുഴയില്‍ നിന്നും നൂറുമീറ്ററും അമ്പതു മീറ്റര്‍ നീളമുള്ള പുഴയില്‍ നിന്ന് അമ്പതു മീറ്ററും ദൂരത്തില്‍ കെട്ടിടം നിര്‍മ്മിക്കുവാന്‍ കഴിയൂ എന്ന കേന്ദ്രനിയമം കേരളത്തില്‍ പലയിടത്തും 5-10 സെന്റ്‌ ഭൂമിയുള്ളവരും കാലങ്ങളായി പ്രസ്തുത ഭൂമിയില്‍ താമസിച്ചുവരുന്നവരുമായ ആളുകള്‍ക്ക്‌ വീടുപുതുക്കിപ്പണിയുന്നതിനും പുതുതായി വീടുവെക്കുന്നതിനും ബുദ്ധിമുട്ടുണ്ടാക്കുന്നു. ഇത്തരം സാഹചര്യത്തില്‍ പുഴയാട്‌ ചേര്‍ന്ന് സ്ഥിരമായി താമസിക്കുന്നവര്‍ക്കും ഭാഗമായി സ്ഥലം ലഭിക്കുന്നവര്‍ക്കും പുഴയില്‍ നിന്നും 30 മീറ്റര്‍ ദൂരത്തില്‍ വീടുവെക്കുവാന്‍ അനുമതി നല്‍കുക.പുഴയുടെ വശങ്ങളില്‍ പുതുതായി സ്ഥലം വാങ്ങുന്നവര്‍ക്കും റിസോര്‍ട്ടുകാര്‍ക്കും ഈ ഇളവു നല്‍കാതിരിക്കുക.

9.നിര്‍ബന്ധമായും കെട്ടിടം നിര്‍മ്മിക്കുന്നതിനു മുമ്പ്‌ പഞ്ചായത്തില്‍ നിന്നും കെട്ടിടനിര്‍മ്മാണത്തിനു അനുമതി വാങ്ങുന്നു എന്ന് ഉറപ്പുവരുത്തുക.നിയമം വന്നതിനു ശേഷവും "വാസ്തു ശാസ്ത്രഞ്ജന്മാരുടെ" ഉപദേശപ്രകാരം സ്ഥനനിര്‍ണ്ണയം നടത്തി റൂള്‍പ്രകരം പ്ലോട്ടിന്റെ അതിര്‍ത്തിയില്‍ നിന്നും പാലിക്കേണ്ട ദൂരമ്പോലും ഇല്ലാതെ നിര്‍മ്മിക്കപ്പെടുന്ന ഫൗണ്ടേഷനുകള്‍ വര്‍ദ്ധിച്ചുവരുന്നു.

10.ഭര്‍ത്താവു മരിക്കുകയും ഭാര്യക്കും മക്കള്‍ക്കും സ്വത്തില്‍ അവകാശം വരികയും ചെയ്യുന്ന കേസുകള്‍ നിരവധിയാണ്‌.പലപ്പോഴും പ്രായമായ അമ്മമാര്‍ എല്ലാ മക്കളുമായും നല്ല ബന്ധത്തില്‍ ആയിരിക്കണം എന്നില്ല. ഇത്തരക്കാര്‍ക്ക്‌ വീടുനിര്‍മ്മിക്കുവാന്‍ ഇന്നത്തെ നിയമപ്രകാരം പല ബുദ്ധിമുട്ടുകളും ഉണ്ട്‌. ഇതു ലഘൂകരിച്ച്‌ ഭര്‍ത്താവിന്റെ മരണസര്‍ട്ടിഫിക്കേറ്റുണ്ടെങ്കില്‍ ഭാര്യക്ക്‌ പ്രസ്തുത സ്ഥലത്ത്‌ കെട്ടിടം നിര്‍മ്മിക്കുവാന്‍ അനുമതി നല്‍കുവാനുള്ള സംവിധാനം ഏര്‍പ്പെടുത്തുക.പിന്നീട്‌ അമ്മയുടെ മരണശേഷം അനന്തരാവകാശികളായ എല്ലാവര്‍ക്കും നിയമപ്രകാരം ഉള്ള അവകാശം നല്‍കുക.(പ്രായമായ ഒത്തിരി അമ്മമാര്‍ നിയമത്തിന്റെ നൂലമാലകളില്‍ ബുദ്ധിമുട്ടുന്നു.)

പാരമൊഴി:നാടിനു ഗുണമുണ്ടാകുന്നതും കാലഘട്ടത്തിനു അനുയോജ്യവും അനിവാര്യവുമായ കൊള്ളാവുന്ന സംഭവങ്ങളെ എന്നും എതിര്‍ത്ത്‌ മാത്രം ശീലമുള്ള ചിലര്‍ക്കൊക്കെ ഈ നിയമം നടപ്പില്‍ വന്നതില്‍ കാര്യമായ എതിര്‍പ്പുണ്ട്‌.ഇനി നടപ്പില്‍ വരാന്‍ പോകുന്ന പഞ്ചായത്ത്‌ ആക്ടില്‍ നാട്ടുകാര്‍ക്ക്‌ പരമാവധി ബുദ്ധിനുട്ടുണ്ടാക്കുന്ന വകുപ്പുകള്‍ കൂട്ടിചേര്‍ത്തും പഞ്ചായത്തുകളിലെ ഉദ്യോഗസ്ഥന്മാര്‍ നിയമത്തിന്റെ നൂലാമാലപറഞ്ഞ്‌ ജനത്തെ പത്തുപ്രാവശ്യം നടത്തുകയും ചെയ്താല്‍ ഈ നിയമത്തെ അട്ടിമറിക്കുവാന്‍ വളരെ എളുപ്പമാണ്‌.

പ്ലാന്‍-18




വളരെ ചെറിയ ഒരു പ്ലോട്ടിലേക്ക്‌ ഡിസൈന്‍ ചെയ്തിരിക്കുന്ന ഒരു പ്ലാനാണിത്‌.ഏകദേശം ഏഴുമീറ്റര്‍ വീതി മാത്രം വരുന്ന ഇത്‌ കെട്ടിടനിര്‍മ്മാണചട്ടപ്രകാരം മുന്‍ വശത്ത്‌ മൂന്നുമീറ്ററും അടുക്കളഭാഗത്ത്‌ രണ്ടുമീറ്ററും(ഇവിടെ റിയര്‍സൈഡ്‌ പ്ലാനിലെ അടുക്കളവശമാണ്‌) മറുഭാഗത്ത്‌ ഒരുമീറ്ററും "പുറകില്‍" 1.2 മീറ്ററും വിട്ടാല്‍ ചതുരാകൃതിയില്‍ ഉള്ള ( ചുരുങ്ങിയത്‌ നീളം 1610X1010 സെന്റീമീറ്റര്‍) നാലുസെന്റ്‌ പ്ലോട്ടില്‍ പണിയാവുന്ന വീടാണിത്‌.


ലിവിങ്ങ്‌ ഏരിയായുടെ മുകളില്‍ ഒരു ഓപ്പണിങ്ങ്‌ കൊടുത്തിരിക്കുന്നു. ഇത്‌ താഴെനിലയേയും മുകള്‍നിലയേയും പൂര്‍ ണ്ണമായും കോണ്‍ക്രീറ്റ്‌ സ്ലാബിനാല്‍ വേര്‍തിരിക്കുന്നതിനെ ഇല്ലതാക്കുന്നു.വായുസഞ്ചാരത്തെ കൂടുതല്‍ സുഗമാക്കുന്നതോടൊപ്പം താഴത്തെ ചൂടുള്ളവായു പുറത്തുപോകുന്നതിനും ഇത്‌ ഉപകാരപ്രദമാണ്‌.കിച്ചണ്‍ ചെറുതാണ്‌ ഇന്നത്തെ കാലത്ത്‌ കൂടുതല്‍ അഭികാമ്യം. വൃത്തിയാക്കുവാനുള്ള സൗകര്യവും ഇന്റീറിയറിനു ചിലവാക്കുന്ന തുകയിലെ ലാഭവും മാത്രമല്ല ചെറിയകുടുമ്പം ആകുമ്പൊള്‍ ഒരാള്‍തന്നെ എല്ലാജോലികളും ചെയ്യേണ്ടിവരുന്നസാഹചര്യത്തില്‍ കിച്ചണിനകത്തെ നടത്തം പരമാവധികുറക്കുവാനും ഇത്‌ സഹായിക്കും.


സ്റ്റെയര്‍കേസിനടിയിലെ ടോയ്‌ലറ്റ്‌ ഒഴിവാക്കാവുന്നതാണ്‌.പകരം അവിടെ വസ്ത്രങ്ങള്‍ കഴുകുന്നതിനും അയേണ്‍ചെയ്യുന്നതിനും ഉള്ള സൗകര്യം ഒരുക്കാം.

Tuesday, October 16, 2007

പ്ലാന്‍ 17






പതിവില്‍ നിന്നും വ്യത്യസ്ഥമായി സ്റ്റെയര്‍ കേസ്‌ അല്‍പം വ്യസ്ത്യസ്ഥമായി കൊടുത്തിരിക്കുന്നു.സ്റ്റെയര്‍കേസ്‌ മോഡല്‍ എന്റെ ഒരു സുഹൃത്തിന്റെ ആശയം കടം കൊണ്ടതാണ്‌.കാര്‍പോര്‍ച്ചു കൂടാതെ എകദേശം രണ്ടായിരം ചതുരശ്രയടി വിസ്തീര്‍ണ്ണം ഉണ്ട്‌ ഈ പ്ലാനിന്‌. ഡൈനിങ്ങ്‌ റൂമില്‍ ഒന്നുരണ്ടു വിന്റോസ്‌ മാര്‍ക്ക്‌ ചെയ്യുവാന്‍ വിട്ടുപോയിട്ടുണ്ട്‌.അടുക്കള തെക്കു കിഴക്ക്‌ ഭാഗത്തായി വരുന്ന ഈ വീടിന്റെ മുഖം പടിഞ്ഞാറോട്ടാണ്‌. പടിഞ്ഞാറും വടക്കും ദിശയിലൂടെ റോഡ്‌ കടന്നുപോകുന്ന ഒരു സ്ഥലത്താണ്‌ ഈ വീട്‌ ഡിസൈന്‍ ചെയ്തിരിക്കുന്നത്‌.

Friday, September 28, 2007

മണല്‍കിട്ടാക്കനിയാകുമ്പോള്

‍കേരളത്തിലെ നിര്‍മ്മാണ മേഘല അഭിമുഖീകരിച്ചുകൊണ്ടിരിക്കുന്ന ഒരു പ്രധാന പ്രതിസന്ധി മണലിന്റെ ലഭ്യതയിലുള്ള കുറവാണ്‌. ദിനം തോറും നിരവധി വമ്പന്‍ പ്രൊജക്ടുകള്‍ പ്രഖ്യാപിക്കുന്ന സംസ്ഥാനത്ത്‌ അതിനാവശ്യമായ മണല്‍ കണ്ടെത്തുക വളരെ വിഷമകരമാണ്‌. ഇതിനുപകരം വെക്കാവുന്ന ഒരു മെറ്റീരിയല്‍ ഇനിയും പ്രായോഗികതലത്തില്‍ കണ്ടെത്തിയിട്ടില്ല അല്ലെങ്കില്‍ വേണ്ടത്ര പ്രചാരത്തില്‍ വന്നിട്ടില്ല.ഇതിനിടയില്‍ കരമണലും തമിഴ്‌നാട്ടില്‍ നിന്നും ഇറക്കുമതി ചെയ്ത "കാവേരി"മണലും വ്യാപകമായി ഉപയോഗിക്കുവാന്‍ തുടങ്ങി. ഇതോടെ പലകെട്ടിടങ്ങളുടേയും കൂടപ്പിറപ്പായിമാറി വര്‍ഷക്കാലത്തെ ചോര്‍ച്ച.ആദ്യം തന്നെ ഇതു ശ്രദ്ധിച്ചില്ലെങ്കില്‍ നാലോ അഞ്ചോ വര്‍ഷത്തിനുള്ളില്‍ കോണ്‍ക്രീറ്റിനുള്ളിലെ സ്റ്റീല്‍ "കമ്പി" മുഴുവന്‍ തുരുമ്പുപിടിക്കുവാനും തുടങ്ങും. ലക്ഷങ്ങള്‍ ചിലവാക്കി നിര്‍മ്മിക്കുന്ന കോണ്‍ക്രീറ്റ്‌ കെട്ടിടങ്ങള്‍ കേവലം നാലോ അഞ്ചോ വര്‍ഷത്തിനുള്ളില്‍ ഉപയോഗശൂന്യമാകും.

ഈ അടുത്ത ദിവസം പത്രത്തില്‍ വാര്‍ത്തയുണ്ടായിരുന്നു പഞ്ചായത്തില്‍ നിന്നും ലഭിക്കുന്ന കെട്ടിടനിര്‍മ്മാണാനുമതിയും തിരിച്ചറിയല്‍ കാര്‍ഡും മറ്റും വില്ലേജില്‍ ഹാജരാക്കിയാല്‍ കെട്ടിടത്തിന്റെ വലിപ്പത്തിനനുസരിച്ച്‌ അളവുനിശ്ചയിച്ച്‌ ഭാരതപ്പുഴയില്‍ നിന്നും മണല്‍ ലഭിക്കുന്നതിനുള്ള പാസ്സിനുള്ള അനുമതി ലഭിക്കും. എതുമായി തലപ്പിള്ളിതാലൂക്ക്‌ ഓഫീസില്‍ പോയാല്‍ അവിടെ നിന്നും മണലിനുള്ള പാസ്സ്‌ ലഭിക്കും(ഇതാണ്‌ ഈ സംഗതിയെപറ്റി എനിക്കുള്ള അറിവ്‌) ഇവിടെ ജനങ്ങള്‍ക്ക്‌ പ്രത്യേകിച്ചും ഭര്‍ത്താക്കാന്മാര്‍ നാട്ടില്‍ ഇല്ലാതെ സ്ത്രീകള്‍ മാത്രം ഉള്ള വീട്ടില്‍ (പ്രവാസികളാണിതില്‍ കൂടുതല്‍ ബുദ്ധിമുട്ട്‌ അനുഭവിക്കുക) ഇതെത്രമാത്രം പ്രായോഗികമാകും എന്ന് സംശയമാണ്‌. വില്ലേജില്‍ നിന്നും എടുക്കുന്ന പാസ്സില്‍ തലപ്പിള്ളിയിലോ മറ്റ്‌ ഏതെങ്കിലും താലൂക്കുകളിലോ പോയി മണല്‍ കളക്ടുചെയ്യുവാന്‍ ഒരു നോമിനിയെ ഏര്‍പ്പെടുത്തുവാന്‍ ഉള്ള സൗകര്യം കൂടെ അധികൃതര്‍ ചെയ്തുകൊടുത്തില്ലെങ്കില്‍ പലര്‍ക്കും ഇതുകൊണ്ടുള്ള പ്രയോജനം ലഭിക്കാതെ പോകും.

വാല്‍മൊഴി: ഇനിയിപ്പോ മണലെടുക്കുവാനുള്ള പെര്‍മിറ്റ്‌ വീട്ടുകാര്‍ക്ക്‌ ലഭിച്ചാല്‍ ഇടനിലക്കാരും മറ്റും തട്ടിയെടുത്ത്‌ ദുരുപയോഗം ചെയ്യുവാനുള്ള സാധ്യത വളരെ കൂടുതല്‍ ആണ്‌.

Thursday, September 13, 2007

പ്ലാന്‍-16










പ്ലാനിനു കടപ്പാട്‌ മിസിസ്സ്‌ എസ്‌.കുമാര്‍.




കാര്‍പോര്‍ച്ചും അടക്കം 2250 ചതുരശ്രയടി വിസ്തീര്‍ണ്ണമുള്ള ഒരു വീടിന്റെ പ്ലാനാണ്‌ ഇത്‌.സ്റ്റെയര്‍കേസ്‌ സ്പൈറല്‍ (സെമീ സ്പൈറല്‍ എന്നു പറയാം) ആയിട്ടാണ്‌ കൊടുത്തിരിക്കുന്നത്‌.ഹാന്റ്‌ റെയില്‍ സ്റ്റീല്‍കൊണ്ട്‌ കൊടുത്ത്‌ ആകര്‍ഷകമാക്കാം.(മരം ആണ്‌ കൂടുതല്‍ നന്നാകുക എന്ന് അഭിപ്രായം ഉണ്ടാകാം പക്ഷെ മരം ചിലവ്‌ വര്‍ദ്ധിപ്പിക്കും.അദിഥികളുള്ളപ്പോള്‍ അവര്‍ക്ക്‌ ശല്യമുണ്ടാകാതെ കുടുമ്പാംഗങ്ങള്‍ക്ക്‌ പ്രോഗ്രാമ്മുകള്‍ ആസ്വദിക്കുവാന്‍ ഡൈനിങ്ങ്‌ ഏരിയായില്‍ ഇരുന്ന് കാണാവുന്ന വിധത്തില്‍ സ്റ്റെയര്‍ കേസിന്റെ അടിയിലേക്ക്‌ ടിവിയുടെ സ്ഥാനം മാറ്റി ക്രമീകരിക്കാവുന്നതാണ്‌.മാത്രമല്ല ഇത്‌ ലിവിങ്ങ്‌ റൂം വൃത്തികേടാകാതെ സൂക്ഷിക്കുന്നതിനും നല്ലതാണ്‌.ലിവിങ്ങ്‌ റൂമില്‍ ഒരു ദിവാന്‍ കോട്ട്‌ ഇട്ട്‌ അല്‍പം "രാജകലയൊക്കെ" വരുത്താം.ഡൈനിങ്ങ്‌ ഹാളില്‍ ഇരിക്കുന്നവര്‍ക്ക്‌ ബുദ്ധിമുട്ടുണ്ടാക്കാത്തരീതിയില്‍ വാഷ്ബേസിനും കോമണ്‍ ടോയ്‌ലറ്റും ക്രമീകരിച്ചിരിക്കുന്നു.




കിച്ചണില്‍ ഗ്യാസടുപ്പും ഓവനും എല്ലാം വെക്കുവാന്‍ സൗകര്യം ഒരുക്കിയിട്ടുണ്ട്‌. കിച്ചണ്‍ വിന്റോകള്‍ 90 സെന്റീമീറ്റര്‍ മാത്രമേ ഉയരം ഉണ്ടാകൂ. ( 210-ല്‍ നിന്നും താഴേക്ക്‌ 90 സെന്റീമീറ്റര്‍) കിച്ചണ്‍ -2 -ല്‍ വിറകടുപ്പും ചിമ്മിനിയും നല്‍കിയിരിക്കുന്നു.അവിടെ നിന്നും പ്രവേശിക്കാവുന്ന രീതിയിലാണ്‌സ്റ്റോര്‍ ഒരുക്കിയിരിക്കുന്നത്‌. യുടിലിറ്റി ഏരിയായില്‍ അമ്മിയും.വാഷിങ്ങ്‌ മെഷീനും വെക്കാം.ഈ ഏരിയാ ഗ്രില്‍ ഇട്ട്‌ സുരക്ഷിതമാക്കുന്നത്‌ നല്ലതാണ്‌.


കുടുമ്പാംഗങ്ങള്‍ക്ക്‌ ഒത്തുചേരുന്നതിനു മുകള്‍നിലയിലൊരു ഫാമിലി ലിവിങ്ങ്‌ റൂം കൊടുത്തിരിക്കുന്നു.

മുകള്‍ നിലയില്‍ ഒരു ഊഞ്ഞാല്‍ നല്‍കിയിരിക്കുന്നു.റൂഫ്‌ കോണ്‍ക്രീറ്റ്‌ ചെയ്യുമ്പോള്‍ തന്നെ ഇതിനായി നാലു ഹുക്കുകള്‍ നല്‍കുന്നത്‌ നന്നായിരിക്കും.857 ചതുരശ്രയടി വിസ്തീര്‍ണ്ണമുള്ള മുകള്‍ നിലയില്‍ രണ്ടു ബെഡ്രൂമുകള്‍ കൊടുത്തിരിക്കുന്നു.മുകള്‍നിലയില്‍ രണ്ടു ബെഡ്രൂമിനും കൂടെ ഒരു കോമണ്‍ ബാത്രൂം മതി എന്നുള്ളവര്‍ക്ക്‌ താഴത്തെ ടോയ്‌ലറ്റിനു മുകളില്‍ അതേ പോലെ തന്നെ ഒരു കോമണ്‍ ടോയ്‌ലറ്റ്‌ ഒരുക്കാവുന്നതാണ്‌.


മുസ്ലിം വിഭാഗത്തില്‍ പെട്ടവര്‍ക്ക്‌ നിസ്കാരത്തിനായി ഒരിടം ഒരുക്കണം എന്നുണ്ടെങ്കില്‍ സ്റ്റെയര്‍കേസിനു താഴെകൂടെ ഒരു വാതില്‍ കൊടുത്ത്‌ ബാത്രൂം No:1 നെ ഒഴിവാക്കി പ്രാര്‍ത്ഥനാ മുറിയാക്കാവുന്നതാണ്‌.മുകള്‍ നിലയിലെ ബാത്രൂം No:3 യെ ബെഡ്രൂം No:3 യുടെ ഡ്രസ്സിങ്ങാക്കി അതിനപ്പുറത്തുവരുന്ന ബാത്രൂം No:2 വിനെ ഇതിന്റെ ബാത്രൂമാക്കി എടുക്കാം. എന്നിട്ട്‌ താഴെയുള്ള കോമണ്‍ ടോയ്‌ലറ്റിനു മുകളില്‍ ബെഡ്രൂം No:2 നു ബാത്രൂം ഒരുക്കാം. വായിച്ചിട്ട്‌ ഐഡിയാ കിട്ടാത്തവര്‍ മെയില്‍ അയക്കുക paarppidam@yahoo.com. നിസ്ക്കരിക്കുന്ന മുറിക്ക്‌ പ്രത്യേകം സ്ഥാനം ഉണ്ടോ എന്ന് എനിക്കറിയില്ല. ഉണ്ടെങ്കില്‍ അറിയുന്ന ആരെങ്കിലും പറഞ്ഞു തന്നാല്‍ നന്ന്.


Nb: ഇതിലെ അളവുകള്‍ വാസ്തു അനുസരിച്ചല്ല.










കോപ്പിചെയ്യുന്നവര്‍ക്കായി ഒരു അറിയിപ്പ്‌

www.paarppidam.blogspot.com എന്ന ബ്ലോഗ്ഗില്‍ വരുന്ന പോസ്റ്റുകളോ ഡിസൈനുകളോ സാമ്പത്തികലാഭത്തിനോ അല്ലാതെയോ അനുമതിയില്ലാതെ പുനപ്രസിദ്ധീകരിക്കുകയോ ഉപയോഗപ്പെടുത്തുകയോ ചെയ്യരുത്‌. തികച്ചും സൗജന്യമായി ബ്ലോഗ്ഗില്‍ കൊടുക്കുന്ന ഈ ഡിസൈനുകള്‍ വീടുപണിയുന്നവര്‍ക്ക്‌ സഹായകമാകണം എന്ന ഉദ്ദേശ്യത്തോടെ പ്രസിദ്ധീകരിക്കുന്നതാണ്‌.(എന്നാല്‍ ബ്ലോഗ്ഗിലെ പ്രചാരണത്തേക്കാള്‍ നന്നായി ഞങ്ങളുടെ പ്രസിദ്ധീകരണത്തിലൂടെ ജനങ്ങളുടെ കൈകളില്‍ എത്തും എന്ന് ആരും ഇതിനു വ്യാഖ്യാനം നല്‍കേണ്ടതില്ല) വീടുവെക്കുന്നതിനായി ഈ പ്ലാനുകള്‍ ഉപയോഗിക്കുന്നതിനു യാതൊരു വിരോധവും ഇല്ല. എന്നാല്‍ പ്ലാനുകളും ഡിസൈനുകളും ഉള്‍ക്കൊള്ളുന്ന നിരവധി പുസ്തകങ്ങള്‍ ഇന്ന് വിപണിയിലുണ്ട്‌. അത്തരം പുസ്തകങ്ങള്‍ പ്രസിദ്ധീകരിക്കുന്നവരും വിതരണം ചെയ്യുന്നവരും ഇതില്‍ നിന്നും ഡിസൈനുകള്‍ പുന പ്രസിദ്ധീകരിക്കുവാന്‍ പാടുള്ളതല്ല.

NB: ടി.വി, പത്രമാധ്യമങ്ങള്‍, ഡിസൈനര്‍ പ്ലസ്‌ ബില്‍ഡര്‍,മലയാള മനോരമ പാര്‍പ്പിടം,വനിത വീട്‌ തുടങ്ങിയ പ്രസിദ്ധീകരണങ്ങള്‍ എന്നിവയില്‍ ഇതിലെ വിവരങ്ങള്‍ പൊതുജന താല്‍പര്യാര്‍ഥം നല്‍കുന്നതില്‍ വിരോധമില്ല.

സ്നേഹപൂര്‍വ്വം s.kumar

പാര്‍പ്പിടം തുടങ്ങിയിട്ട്‌ ഒരു വര്‍ഷം

പ്രിയ വായനക്കാരെ പാര്‍പ്പിടംwww.paarppidam.blogspot.com തുടങ്ങിയിട്ട്‌ ഒരു വര്‍ഷം പൂര്‍ത്തിയാകുന്നു. ബ്ലോഗ്ഗിംഗിനെ കുറിച്ച്‌ മാധ്യമം പത്രത്തില്‍ വന്ന ലേഖനം വായിക്കുകയും ആ ലേഖനം തയ്യാറാക്കിയ സുനില്‍ റിയാദുമായി ഈ-മെയില്‍ വഴി ബന്ധപ്പെട്ടപ്പോള്‍ അദ്ദേഹം നല്‍കിയ മാര്‍ഗ്ഗനിര്‍ദ്ദേശങ്ങളാണ്‌ എനിക്ക്‌ ബ്ലോഗ്ഗിങ്ങിലേക്കുള്ള വഴിതുറന്നുതന്നത്‌.അതുകൂടാതെ ആരംഭകാലത്ത്‌ വേണ്ടമാര്‍ഗ്ഗനിര്‍ദ്ദേശങ്ങളും ടെക്നിക്കല്‍ സപ്പോര്‍ട്ടും നല്‍കി എന്നെ സഹായിച്ചവരില്‍ കെ.ശ്രീജിത്ത്‌,പെരിങ്ങോടന്‍,കൊടകരപുരാണക്കാരന്‍ എന്റെ സജീവേട്ടന്‍, വക്കാരി, കെവിന്‍,ഉമേഷ്‌,കലേഷ്‌,കിരണ്‍ തുടങ്ങിയവരും ഉണ്ടായിരുന്നു.ഇവരെക്കൂടാതെ ലോകത്തിന്റെ നാനാഭാഗങ്ങളില്‍ നിന്നായി നിരവധി സുഹൃത്തുക്കള്‍ വേറെ.ഇവരോടുള്ള എന്റെ നന്ദി ഹൃദയത്തിന്റെ ഭാഷയില്‍ രേഖപ്പെടുത്തുന്നു.കമന്റുകളിലൂടെയും ഈ-മെയിലിലൂടെയും പ്രതികരിക്കുകയും ഓരോ പോസ്റ്റും താല്‍പര്യപൂര്‍വ്വം വായിക്കുകയും ചെയ്യുന്ന എന്റെ വായനക്കാരോടു എങ്ങനെ നന്ദിപറയണം എന്ന് എനിക്കറിയില്ല.

എഴുത്തില്‍ വേണ്ടത്രകഴിവില്ലാത്ത ഞാന്‍ തിരക്കുകള്‍ക്കിടയില്‍ കുത്തിക്കുറിക്കുന്ന ചെറിയകാര്യങ്ങള്‍ ഗൗരവപൂര്‍വ്വം വായിക്കുന്ന ആളുകള്‍ ഉണ്ടാകും എന്ന് ഒരിക്കലും ഞാന്‍ ഈ ബ്ലോഗ്ഗുതുടങ്ങുമ്പോള്‍ കരുതിയിരുന്നില്ല.നിങ്ങള്‍ നല്‍കുന്ന പ്രചോദനം ഒന്നുമാത്രം ആണ്‌ ഈ ബ്ലോഗ്ഗിനെ മുന്നോട്ടു നയിക്കുന്നത്‌.പോരായമകള്‍ നിരവധിയുണ്ടെന്ന് അറിയാം ഈയ്യുള്ളവനോടു ക്ഷമിക്കുക.ഈ ബ്ലോഗ്ഗില്‍ ഞാനിട്ട എത്രപ്ലാനുകള്‍ വീടുകളായി അല്ലെങ്കില്‍ ആശയങ്ങള്‍ പ്രയോജനപ്പെട്ടു എന്ന് എനിക്കറിയില്ല ഒന്നുരണ്ടുപേര്‍ എന്നെ അറിയിച്ചിരുന്നു.

ഇവിടെ എന്റെ ഒരു ചെറിയ ആശങ്ക വായനക്കാരോടു പങ്കുവെക്കുകയാണ്‌ ഈ ബ്ലോഗ്ഗില്‍ ഞാന്‍ ഇടുന്നത്‌ എന്റെ ചില ചെറിയ വര്‍ക്കുകള്‍ ആണ്‌. ഇത്‌ ആരെങ്കിലും അടിച്ചെടുത്ത്‌ (ഓ പിന്നെ ഇതു കിട്ടീട്ടുവേണ്ടെ ആളുകള്‍ക്ക്‌ പുസ്തകമാക്കാന്‍!)പുസ്തകം ആക്കിയേക്കും എന്നതാണ്‌ ആ ആശങ്ക.അതിന്റെ ചില സൂചനകള്‍ എനിക്ക്‌ ലഭിച്ചിരുന്നു. ഇതിനെ ഏതെങ്കിലും വിധത്തില്‍ തടയുവാന്‍ കഴിയുമോ?

ചെണ്ടക്കാരനായി വന്ന് എനിക്ക്‌ പലപ്പോഴും കമന്റായും ഈ-മെയിലായും നിര്‍ദ്ദേശങ്ങളും സഹായങ്ങളും ചെയ്തുതന്ന ആര്‍ക്കിടെക്റ്റ്‌ ആലിഫ്ജി.(ഈയ്യിടെയായി അദ്ദേഹത്തിന്റെ ഒരു വിവരവും ലഭ്യമല്ല.നൈജീരിയായിലെ കൊള്ളക്കാര്‍ വല്ലവരും പിടിച്ചുകൊണ്ടുപോയോന്ന് അറിയില്ല)എന്തെങ്കിലും കാര്യത്തിനു നന്ദിരേഖപ്പെടുത്തിയാല്‍പിന്നെ ലോകത്തിന്റെ ഏതുകോണിലായാലും എന്നും ഓര്‍ക്കുന്ന വടക്കുന്നാഥസന്നിധിയിലും തൃശ്ശൂര്‍ റൗണ്ടിലും കാലുകുത്താന്‍ അനുവദിക്കില്ല എന്ന ഭീഷണി നിലനില്‍ക്കുന്നതിനാല്‍ ഞാനടക്കമുള്ള പല ബ്ലോഗ്ഗേഴ്സിനും സപ്പോര്‍ട്ടുതരുന്ന ഒരു ചേച്ചിയുടെ പേര്‍ വ്യക്തമാക്കുന്നില്ല അതോടൊപ്പം അവര്‍ക്കുള്ള നന്ദി പറയാതെ മനസ്സില്‍ സൂക്ഷിക്കുന്നു.വീടു വാടകക്ക്‌ കൊടുക്കുമ്പോള്‍ ശ്രദ്ധിക്കേണ്ട നിയമപരമായ കാര്യങ്ങള്‍ പറഞ്ഞുതരാം എന്ന് പറഞ്ഞു മുങ്ങിനടക്കുന്ന അഡ്വക്കേറ്റ്‌ ദീപക്കും മുങ്കൂറായി ഒരു നന്ദി രേഖപ്പെടുത്തുന്നു.

ഈ ഒരു വര്‍ഷത്തെ ബ്ലോഗ്ഗനുഭവങ്ങളില്‍ കൊടകരപാടത്ത്‌ സജീവേട്ടനെ പോത്ത്‌ കുത്തിയസ്പോട്ടും മറ്റും എഴുത്തുകാരന്റെ കൂടെ നേരില്‍ കണ്ടത്‌ മറക്കാനാവാത്ത അനുഭവം തന്നെയാണ്‌. അദ്ദേഹത്തിന്റെ ( ആ ഗടീടെ) കൂടെ പെപില്‍ കൊടകര ടൗണിലൂടെ യാത്രചെയ്തതും ഒരുപിടിമണ്ണെന്ന പോസ്റ്റിലെ ചെറുപ്പക്കാരന്‍ പിടഞ്ഞുമരിച്ച സ്ഥലത്തെ കാണിച്ച്‌ മനുഷ്യജീവിതത്തിലെ ആഗ്രഹങ്ങളുടെ വൈവിധ്യം പറഞ്ഞുതന്നതും എല്ലാം മനസ്സിലൂടെ കടന്നുപോകുന്നു.വ്യക്തിപരമായ കാരണങ്ങളാല്‍ വേണ്ടത്ര സൗകര്യവും സമയും ലഭിക്കാത്തതിനാല്‍ പലപ്പോഴും ബ്ലോഗ്ഗുവായനയും കമന്റിടലും കുറഞ്ഞിരിക്കുന്നു.എങ്കിലും ബ്ലോഗ്ഗുതുറന്നുതരുന്ന വായനാനുഭവവും സൗഹൃദങ്ങളും ഒന്നു വേറെതന്നെയാണ്‌.

ഒന്നാം വര്‍ഷത്തില്‍ നായ്ക്കളെ വളര്‍ത്തുന്നതിനെ കുറിച്ച്‌ ഒരു പുതിയ ബ്ലോഗ്ഗുകൂടെ http://www.naaykkal.blogspot.com ഞാന്‍ ആരംഭിച്ചിരിക്കുന്നു എന്നതുകൂടെ വായനക്കാരെ അറിയിക്കുന്നു.


ബ്ലോഗ്ഗിങ്ങ്‌ സമാന്തരമായി ഒരുകൂട്ടം എഴുത്തുകാരെ സൃഷ്ടിക്കുന്നു എന്നത്‌ സന്തോഷകരമായ ഒരു കാര്യം തന്നെയാണ്‌. കൊടകരപുരാണവും യൂറോപ്പ്‌ സ്വപ്നങ്ങളും പുസ്തകമായി ഇറങ്ങിയിരിക്കുന്നു എന്നത്‌ സന്തോഷകരം തന്നെയാണ്‌.വിവിധ ബ്ലോഗ്ഗുകളിലെ കവിതകളും കഥകളും ലേഖനങ്ങളും ഒക്കെ ഉള്‍പ്പെടുത്തി ഒരു പുസ്തകം ഇറക്കുന്നതിനെ കുറിച്ച്‌ ബ്ലോഗ്ഗുപുലികള്‍ ആലോചിക്കേണ്ട സമയം ആയിരിക്കുന്നു എന്ന് ഈയ്യുള്ളവനു തോന്നുന്നു.

കെട്ടിടനിമ്മാണതൊഴിലും പ്രവാസികളും.



കേരളത്തിലെ കെട്ടിടനിര്‍മ്മാണ മേഘല വന്‍ തോതില്‍ വളര്‍ച്ച നേടിക്കൊണ്ടിരിക്കുന്ന ഒരു കാലഘട്ടമാണിന്ന് അതുപോലെ തന്നെ നിര്‍മ്മാണ മേഘലയിലെ തൊഴിലാളിക്ഷാമവും വര്‍ദ്ധിച്ചുകൊണ്ടിരിക്കുന്നു.നല്ല തുക കൂലിനല്‍കിയിട്ടും വിദഗ്ദരായ തൊഴിലാളികളുടെ രൂക്ഷമായ ക്ഷാമമാണിന്ന് നേരിടുന്നത്‌. അതുകൊണ്ടുതന്നെ വിദഗ്ദരായ തൊഴിലാളികള്‍ക്കു പകരം വേണ്ടത്ര തൊഴില്‍ പ്രാവീണ്യം ഇല്ലാത്തവര്‍ക്കുപോലും വന്‍ തുക കൂലി നല്‍കേണ്ടിവരുന്നു. എന്നിട്ടും തൊഴിലാളികളെ കിട്ടാത്ത അവസ്ഥയാണിന്നുള്ളത്‌. മുമ്പ്‌ തമിഴ്‌നാട്ടില്‍ നിന്നും ആയിരുന്നു തൊഴിലാളികള്‍ കേരളത്തില്‍ എത്തിയിരുന്നത്‌. താരതമ്യേന അവര്‍ക്ക്‌ കൂലിയും കുറവായിരുന്നു. എന്നാല്‍ ഇന്ന് അവരുടെ എണ്ണത്തില്‍ കുറവു വന്നിരിക്കുന്നു. മാത്രമല്ല അവര്‍ക്ക്‌ കൂലിയില്‍ കുറവൊന്നും കൊടുത്തല്‍ പറ്റുകയും ഇല്ല.ഇപ്പോള്‍ ഹിന്ദിക്കാരായ തൊഴിലാളികള്‍ (ബീഹാര്‍,ബംഗാള്‍,ഒറീസ്സ, മഹാരാഷ്ട്ര തുടങ്ങിയ സ്ഥലങ്ങളില്‍ നിന്നും) ഈ മേഘലയില്‍ വന്നുതുടങ്ങി. അവര്‍ക്ക്‌ താരതമ്യേന കൂലികുറവാണ്‌ ഭാഷ ഒരു പ്രശ്നമാണെങ്കിലും നല്ലവണ്ണം ജോലിചെയ്യുന്നവരും ആണവര്‍.

വര്‍ഷത്തില്‍ കോടിക്കണക്കിനു രൂപയാണ്‌ പ്രവാസികള്‍ കേരളത്തിലെ റിയല്‍ എസ്റ്റേറ്റ്‌ മേഘലയില്‍ നിക്ഷേപിക്കുന്നത്‌. അവര്‍ മുടക്കുന്ന തുകയില്‍ നല്ലൊരു ഭാഗം കെട്ടിടങ്ങള്‍ നിര്‍മ്മിക്കുന്നതിനായി വിനിയോഗിക്കപ്പെടുന്നു. ഇത്‌ ഇവിടെ നിരവധി തൊഴില്‍ ദിനങ്ങള്‍ നല്‍കുന്നുമുണ്ട്‌.ഒരു ശരാശരി തൊഴിലാളിയുടെ വരുമാനം സമാനമായ തൊഴില്‍ ചെയ്യുന്ന പ്രവാസി മലയാളിയുടേതിനേക്കാളും ഉയര്‍ന്നതാണ്‌. അതിരാവിലെ ( ചിലപ്പോള്‍ 3 am) സൈറ്റില്‍ പോയി കൊടും ചൂടിലും മണല്‍ക്കാറ്റിലും തൊഴില്‍ എടുക്കുന്ന പലര്‍ക്കും കേരളത്തില്‍ രാവിലെ ഒമ്പതുമണിക്ക്‌ വന്ന് ഉച്ചക്ക്‌ 1-2 റെസ്റ്റെടുത്ത്‌ 5.30 ക്ക്‌ പണിനിര്‍ത്തുന്ന തൊഴിലാളിക്കു ലഭിക്കുന്നതിന്റെ പകുതി ശംബളമേ ലഭിക്കുന്നുളൂ.ഏകദേശം 80000 മുതല്‍ 135000 വരെയാണ്‌ ഇന്നു പല ഏജന്റുമാരും ഗള്‍ഫില്‍ ഒരു മേസന്‍ വിസക്ക്‌ പോലും ഈടാക്കുന്നത്‌.അതായത്‌ രണ്ടുവര്‍ഷത്തെ കരാറില്‍ 1 ലക്ഷം രൂപ നല്‍കി ഗള്‍ഫില്‍ പോകുന്ന ഒരാള്‍ക്ക്‌ വിസക്കുനല്‍കിയ തുകയെ 24 മാസത്തേക്ക്‌ വീതിച്ചാല്‍ ശരാശരി ഒരു മാസം 4166 രൂപയോളം ചിലവൃവരുന്നു. ഇതു കൂടാതെ അവിടത്തെ ഒഴിവാക്കാനാകാത്ത ചിലവുകള്‍ കൂടെ കണക്കാക്കിയാല്‍ (താമസം ഭൂരിപക്ഷം കമ്പനികളും ലാബര്‍ക്യാംബില്‍ ഒരുക്കും, അവിടത്തെ സ്ഥിതി നേരിട്ടു കണ്ടാലെ മനസ്സിലാകൂ) 2000 ഇന്ത്യന്‍ രൂപയോളം വരും. അപ്പോള്‍ ഏകദേശം 6000 രൂപ മാസം ചിലവ്‌.60- 80 ബഹ്രൈന്‍ ദിനാര്‍/ 600-800 ദിര്‍ഹം വരെയാണ്‌ ഒരു സാദാ ലേബര്‍ക്ക്‌ കൂലി.മേസനു പരമാവധി അത്‌ 90-140 ദിനാര്‍ വരെ ( ചിലയിടങ്ങളില്‍ ഓവര്‍ടൈം ഉണ്ടെങ്കും.) ഏകദേശം 110 ഓ അതില്‍ താഴെയാണ്‌ രൂപയാണ്‌ ഒരു ദിനാറിന്റെ വില.അപ്പോള്‍ 60 ദിനാര്‍ X 110 രൂപ=6600 മുമ്പ്‌ പറഞ്ഞ 6000 രൂപ- 6600 രൂപ = 600 രൂപ ആണ്‌ യദാര്‍ത്ഥ മാസ ശംബളം!കുടുമ്പത്തില്‍ നിന്നും അകന്ന് പൊരിവെയിലത്തും ദുഷ്ക്കരമായ കാലാവസ്ഥയിലും മോശം ഭക്ഷണം കഴിച്ചും പണിയെടുത്ത്‌ വര്‍ഷങ്ങള്‍ക്കു ശേഷം രോഗിയായി മടങ്ങുന്ന അവസ്ഥകൂടെ കണക്കാക്കണം.എന്നാല്‍ ഇവിടെ ഒരു ലേബര്‍ക്ക്‌ 180-200 രൂപയും അതില്‍ കൂടുതലും ആണ്‌ കൂലിയായി ലഭിക്കുന്നത്‌. അതായത്‌ ശരാശരി 25 ദിവസം ജോലിയെടുത്താല്‍ 180*25= 4500 രൂപയോളം ലഭിക്കും. ഇനി ഒരു മേസന്റെ കൂലിയാണേല്‍ 260-320 വരെയാണ്‌. അപ്പോള്‍ 260*25 ദിവസം = 7000 രൂപ. 1000 രൂപ ബസ്സിനും മറ്റുമുള്ള ചിലവിലേക്കായി മാറ്റിയാലും 6000 രൂപ ഭാക്കി. രാവിലെ വീട്ടില്‍ നിന്നും പോയി വൈകീട്ട്‌ വീട്ടില്‍ എത്തുന്നതിന്റെ സൗകര്യം ഒന്നു വേറെ!

വന്‍ തുക ഏജന്റിനു നല്‍കിയും മറ്റും ഗള്‍ഫില്‍ പോകുകയും പിന്നീട്‌ വിസയില്ലാതെയും മറ്റും ഗള്‍ഫില്‍ നിന്നും തിരികെ വരുന്ന നിര്‍മ്മാണ മേഘലയിലെ പ്രവാസിതൊഴിലാളികളെ പുനരധിവസിപ്പിക്കുവാന്‍ താല്‍പര്യമുള്ളവര്‍ അവര്‍ക്ക്‌ ഒരു സഹകരണസംഘം പോലെ കൂട്ടായ്മ ഒരുക്കുകയും അതതു ജില്ലകളില്‍ ഒരു ഓഫീസ്‌ എടുത്ത്‌ അവിടെ നിന്നും ആവശ്യത്തിനു തൊഴിലാളികളെ സപ്ലെ ചെയ്യുന്ന രീതിയില്‍ അറേഞ്ച്‌ ചെയ്താല്‍ നന്നായിരിക്കും.ഈ കൂട്ടായ്മയെ നയിക്കുവാന്‍ തൊഴില്‍ ചെയ്യാത്ത നേതാക്കന്മാരെയും അവരെ തീറ്റിപ്പോറ്റാനും യൂണിയന്‍ ആപ്പീസു നടത്തിപ്പിനും ലെവിപിരിക്കുന്ന സംഘടനകളെയും ആവശ്യമില്ല.ഇത്തരം കൂട്ടായ്മ വരുമ്പോള്‍ പ്രവാസികളുടെ വീടുകള്‍ തന്നെ നിര്‍മ്മിക്കുവാന്‍ മറ്റു ആളുകളെ തേടേണ്ടിവരില്ല.വീടുനിര്‍മ്മിക്കുവാന്‍ കഴിവും ആത്മാര്‍ത്ഥതയും ഉള്ള പണിക്കാരെ ലഭിക്കാനില്ലാത്തത്‌ പ്രവാസികള്‍ നേരിടുന്ന വലിയ ബുദ്ധിമുട്ടാണ്‌. മാത്രമല്ല കഷ്ടപ്പെട്ട്‌ കാശുണ്ടാക്കി വീടുപണിക്കൊരുങ്ങുന്ന ഗള്‍ഫുകാരന്‍ പലപ്പോഴും പലപേരുകളില്‍ ചൂഷണം ചെയ്യപ്പെടുന്നു. ഇക്കാര്യത്തില്‍ പ്രവാസി സംഘടനകള്‍ക്കും സര്‍ക്കാരിനും എന്തെങ്കിലും ചെയ്യുവാന്‍ കഴിയും എന്നാണ്‌ എന്റെ വിശ്വാസം.

മദ്യപാനിയായ തൊഴിലാളി ഒരിക്കലും ധനവാനാകില്ല. (ബൈബിള്‍ വചനം)

വാല്‍മൊഴി: വാളെടുത്തവരൊക്കെ വെളിച്ചപ്പാടെന്ന അവസ്ഥക്ക്‌ മാറ്റം ഉണ്ടാക്കണം.കെട്ടിടനിര്‍മ്മാണതൊഴിലില്‍ പുതുതായി കടന്നുവരുന്നവര്‍ക്ക്‌ അല്‍പം ദിവസത്തെയെങ്കിലും തൊഴില്‍ പരിശീലനം നല്‍കുന്നതിനുള്ള സംവിധാനം ഒരുക്കുകയും അവര്‍ക്ക്‌ ലൈസന്‍സ്‌ ഏര്‍പ്പെടുത്തുകയും ചെയ്യേണ്ട കാലം അധിക്രമിച്ചിരിക്കുന്നു.മീറ്ററും സെന്റീമീറ്ററും എന്തെന്നറിയാത്ത മേസന്മാരെ എത്രവേണമെങ്കിലും കാണാം!അവിദഗ്ദനായ തൊഴിലാളിമൂലം ഉണ്ടാകുന്ന സമയനഷ്ടവും അസംസ്കൃതവസ്തുക്കളുടെ ദുരുപയോഗവും വന്‍ നഷ്ടമാണ്‌ തൊഴിലുടമക്ക്‌ ഉണ്ടാക്കുന്നത്‌.ഒന്നുകൂടെ വിശദമായി പറഞ്ഞാല്‍ അസംസ്കൃത വസ്തുക്കള്‍ പാഴാക്കുന്നതിലൂടെ തൊഴിലുടമക്ക്‌ മാത്രമല്ല സമൂഹത്തിനും നഷ്ടമാണ്‌ ഇത്തരക്കാര്‍ വരുത്തിവെക്കുന്നത്‌.

അവകാശങ്ങളെ കുറിച്ച്‌ മാത്രം ബോധമുള്ള പിരിവിനെകുറിച്ച്‌ മാത്രം ജാഗ്രതയുള്ള തൊഴിലാളി സംഘടനകളും ഇത്‌ ഒന്ന് ശ്രദ്ധിക്കുന്നത്‌ നല്ലതാണ്‌.

പാരമൊഴി: മലയാളിതൊഴിലാളികള്‍ പണിസ്ഥലത്ത്‌ വരാന്‍ വൈകുന്നതുകൊണ്ട്‌ വൈകീട്ട്‌ "ജോലികഴിഞ്ഞു" നേരത്തെ പോകുന്ന സര്‍ക്കാര്‍ ജീവനക്കാര്‍ സ്റ്റെയില്‍ കടമെടുത്തിട്ടുണ്ട്‌ ചിലയിടങ്ങളില്‍. കൂടാതെ വിവിധ മൊബെയില്‍ ഫോണ്‍ കമ്പനികള്‍ കോള്‍ നിരക്ക്‌ കുറച്ചതും നാട്ടിലെ കുറുങ്ങാന്‍ താല്‍പര്യമുള്ള പല സുന്ദരിമാര്‍ക്കും സുന്ദരിമാര്‍ അല്ലാത്തവര്‍ക്കും മൊബെയില്‍ഫോണ്‍ കണക്ഷന്‍ ഉള്ളതും കോണ്ട്രാക്ടര്‍മാര്‍ക്കും വീടുവെക്കുന്നവര്‍ക്കും വലിയ അടിയായിട്ടുണ്ട്‌!

Monday, September 03, 2007

ഓണാശംസകള്‍

എല്ലാ മാന്യ വായനക്കാര്‍ക്കും എന്റെ ഓണാശംസകള്‍.

ഓണം എല്ലാവരും ഗംഭീരമായി കൊണ്ടാടിയിരിക്കും എന്ന് കരുതുന്നു.

കേരളത്തിലെ ഒട്ടുമിക്ക റോഡുകളിലും കുഴിവിളകള്‍ ആയതിനാല്‍ മാവേലി പലതവണ പാതാളത്തില്‍ പോയി വീണ്ടും അടുത്തകുഴിയിലൂടെ തിരികെ വരുന്ന കഴ്ച ഈ വര്‍ഷം ഉണ്ടായതായി ചിലര്‍ പറഞ്ഞുകേട്ടു.കേരളത്തിലെ റോഡുകളില്‍ ഭൂരിപക്ഷവും ഉപയോഗ ശൂന്യമായിരിരിക്കുന്നു, ഈ കുഴികളില്‍ വീണ്‌ ഇതിനോടകം നിരവധി ബൈക്ക്‌ യാത്രക്കാര്‍ക്ക്‌ മരിക്കെണ്ടിവരികയോ പരിക്കേല്‍ക്കുകയോ ചെയ്തു. അധികൃതരാകട്ടെ കാര്യമായ ഒരു നടപടിയും എടുക്കുന്നുമില്ല.

ജനങ്ങളെ ബാധിക്കുന്ന പല പ്രശ്നങ്ങളിലും കോടതികളില്‍ പൊതുതാല്‍പര്യ ഹര്‍ജിനല്‍കുന്ന നവാബ്‌ രാജെന്ദ്രന്റെ കാര്യം ഇപ്പോഴാണ്‌ ഓര്‍മ്മവരുന്നത്‌. നമ്മള്‍ ശംബളം കൊടുത്ത്‌ നിലനിര്‍ത്തുന്ന ഉദ്യോഗസ്ഥരും എം.എല്‍.എ മന്ത്രി പുംഗവരും നിരവധിയുണ്ടെങ്കിലും അവര്‍ ഇക്കാര്യത്തില്‍ പ്രസ്ഥാവനക്കപ്പുറം കാര്യമായി ഒന്നും ചെയ്യുന്നില്ലെന്ന് നമ്മുടെ റോഡുകള്‍ തന്നെ വിളിച്ചോതുന്നു. ജനങ്ങള്‍ കഴുതകളായിരിക്കുന്നിടത്തോളം ഇതിങ്ങനെ തുടരുകയും ചെയ്യും.

ഇപ്പോഴത്തെ പ്രശനം വകുപ്പുമന്ത്രി ചില ഏടാകൂടങ്ങളില്‍ ചാടിയതാണ്‌. വര്‍ഷം തോറും പ്രസ്തുതവകുപ്പ്‌ കയ്യാളുന്ന ഗ്രൂപ്പിന്റെ/കക്ഷിയുടെ മന്ത്രിമാര്‍ മാറുന്നത്‌ പക്ഷെ ജനങ്ങള്‍ക്ക്‌ ബുദ്ധിമുട്ടുണ്ടാകാത്തരീതിയില്‍ ആക്കുവാന്‍ ഇടതുപക്ഷ സര്‍ക്കാര്‍ ശ്രദ്ധിക്കേണ്ടതുണ്ട്‌. കേരളത്തില്‍ ഭൂമികയ്യേറ്റവകുപ്പും പട്ടയവകുപ്പും ഉണ്ടാക്കി മലയോരകോണ്‍ഗ്രസ്സില്‍ നിന്നുതന്നെ അതിനു ഒരു മന്ത്രിയെ നിയമിച്ചാല്‍ ഒരു പരിധിവരെ കൃത്യമായി റോഡ്‌ ടാക്സടച്ച്‌ റോഡിലെ കുഴിയില്‍ വീഴുന്ന ആളുകള്‍ രക്ഷപ്പെടും.

ഓണത്തിനു മുമ്പെ പോസ്റ്റുചെയ്യുവാന്‍ സാധിക്കാത്തതില്‍ ഖേദിക്കുന്നു.

Thursday, July 26, 2007

നിയമം ജനങ്ങളെ ബുദ്ധിമുട്ടിക്കുന്ന വിധത്തിലാകരുത്‌.

സര്‍ക്കാരിന്റെ പുതിയ ഉത്തരവു പ്രകാരം കേരളത്തിലെ ഗ്രാമപഞ്ചായത്തുകളില്‍ കെട്ടിടങ്ങള്‍ നിര്‍മ്മിക്കുന്നതിനു അതതു പഞ്ചായത്തുകളില്‍ നിന്നും അനുമതി വാങ്ങേണ്ടതുണ്ട്‌. ഇതിനു വേണ്ടത്ര ഉദ്യോഗസ്ഥന്മാരെ ഏര്‍പ്പെടുത്തുവാനും അവര്‍ കൃത്യമായും സമയത്തിനും ഓഫീസില്‍ എത്തുന്നത്‌ ഉറപ്പുവരുത്തുവാനും ഗവണ്‍മന്റ്‌ ശ്രെദ്ധിക്കേണ്ടതുണ്ട്‌. ഗവണ്‍മന്റ്‌ എടുത്ത തീരുമാനം തികച്ചും ഉചിതവും അത്യാവശ്യവുമാണെങ്കിലും അത്‌ ജനങ്ങള്‍ക്ക്‌ ബുദ്ധിമുട്ടുണ്ടാകുന്ന രീതിയില്‍ ആയിരിക്കരുത്‌.

അപേക്ഷസ്വീകരിക്കുവാനും പ്ലാനുകളിളും സൈറ്റും പരിശോധിക്കുവാനും തീര്‍പ്പുകല്‍പ്പിക്കുവനും ഉത്തരവാദിത്വപ്പെട്ട ഉദ്യോഗസ്ഥരെ നിയമിക്കണം. പഞ്ചയത്തുകളില്‍ അനുമതിക്കായി പലതവണ ഫയലുമായി ജനങ്ങള്‍ കയറിയിറങ്ങുവാന്‍ ഇടയായാല്‍ അത്‌ വ്യാപകമായ പ്രതിഷേധത്തിനും ഇടനല്‍കും. ഒന്നിലധികം പഞ്ചായത്തില്‍ ചാര്‍ജ്ജ്‌ നല്‍കുമ്പോള്‍ ഏതെല്ലാം ദിവസം പ്രസ്തുത ഉദ്യോഗസ്ഥന്‍ അതതു പഞ്ചായത്തില്‍ ഉണ്ടായിരിക്കും എന്നും ഏതെല്ലാം സമയത്ത്‌ അപേക്ഷസ്വീകരിക്കും ഏതെല്ലാം സമയത്ത്‌ സൈറ്റ്‌ വിസിറ്റിനു പോകുമെന്നും കൃത്യമായ ഒരു ടൈംടേബില്‍ ഉണ്ടാക്കുന്നത്‌ നല്ലതാണ്‌.(അല്ലെങ്കില്‍ രാവിലെ മുതല്‍ വൈകീട്ടുവരെ സൈറ്റ്‌ സന്ദര്‍ശനം മാത്രം ആയേക്കാം)

പഞ്ചായത്തുസെക്രട്ടറിമാര്‍ ഒത്തിരി ഉത്തരവാദിത്വങ്ങള്‍ ഉള്ളവരാണ്‌. അതിനാല്‍ കെട്ടിടനിര്‍മ്മാണത്തിനുള്ള അപേക്ഷകള്‍ പരിശോധിക്കുന്നതിനും തീര്‍പ്പുകല്‍പ്പിക്കുന്നതിനും അവര്‍ക്കും ഒരു സമയം നിശ്ചയിക്കുന്നത്‌ നന്നായിരിക്കും.ഇനിയും ഉദ്യോഗസ്ഥര്‍ക്കും ജനങ്ങള്‍ക്കും "പുതിയ നിയമം" (ചില പഞ്ചായത്തുകളിലും മുഴുവന്‍ മുന്‍സിപ്പാലിറ്റികളിലും ഇത്‌ മുമ്പെ നടപ്പിലാക്കിയതാണ്‌) സംബന്ധിച്ച്‌ അവ്യക്തത നിലനില്‍ക്കുന്നുണ്ട്‌. ഇത്‌ തീര്‍ക്കുവാന്‍ വേണ്ട നടപടി സര്‍ക്കാരും അതത്‌ പഞ്ചായത്തുകളും അതിലെ മെംബര്‍മാരും എടുക്കേണ്ടതാണ്‌.


പാരമൊഴി: സര്‍ക്കാര്‍ നിശ്ചയിച്ച്‌ ഫീസടച്ച്‌ വേണ്ടത്രരേഖകളോടൊപ്പം സമര്‍പ്പിക്കുന്ന പ്ലാനിനൊപ്പം 100 ന്റെ നോട്ടുകള്‍ "സര്‍ ചാര്‍ജ്ജായി" സമര്‍പ്പിക്കുവാന്‍ സര്‍ക്കാര്‍ ഉത്തരവില്‍ ഇല്ല!

Friday, July 20, 2007

പ്ലാന്‍ -15



990 ചതുരശ്ര അടിയില്‍ വാസ്തു കണക്കില്‍ തീര്‍ത്ത പ്ലാന്‍. വാസ്തു വിന്റെ പ്രമോട്ട്‌ ചെയ്യാനല്ല. ആയിരം സ്ക്വയര്‍ ഫീറ്റിനുതാഴെ വാസ്തു അളവില്‍ വീടുവെക്കുവാന്‍ താല്‍പര്യം ഉള്ളവര്‍ക്ക്‌ വേണ്ടി മാത്രം.കാര്‍പോര്‍ച്ചിന്റെ പുറത്തെ തൂണുവരെ ബിത്തി തുടങ്ങുന്ന ഉയരത്തില്‍ അതായത്‌ ഫ്ലോറില്‍ നിന്നും 60 സെന്റീ മീറ്റര്‍ എങ്കിലും ഒരു ഭിത്തി കൊടുത്താല്‍ നന്നായിരിക്കും. കണക്ക്‌ ഒപ്പിക്കുവാന്‍!

Monday, July 09, 2007

മൂന്നുസെന്റില്‍ ഒരു പരീക്ഷണം! പ്ലാന്‍ 13




ഒരു പ്രവാസി സുഹൃത്തിന്റെ ഒപ്പം അദ്ദേഹത്തിന്റെ വീടിന്റെ പ്ലാനുമായി ഒരു വാസ്തുവിദഗ്ദന്റെ അടുക്കല്‍ പോകേണ്ടിവന്നു. മൂന്നുസെന്റു സ്ഥലത്തു വീടുപണിയുവാന്‍ വാസ്തുവിദഗ്ദന്റെ ഉപദേശം തേടിയെത്തിയ ഒരാളെ അവിടെവെച്ച്‌ യാദൃശ്ചികമായി കണ്ടുമുട്ടുവാനിടയായി. അദ്ദേഹത്തിന്റെ ഭൂമിയുടെ അളവും ആകൃതിയും കണ്ട വാസ്തു വിദഗ്ദന്‍ പറഞ്ഞു.

"ഹേയ്‌ ഈ പറമ്പ്‌ വീടുപണിയാന്‍ കൊള്ളില്ല. മാത്രമല്ല നിങ്ങളുടെ ആവശ്യങ്ങള്‍ ഇത്രയും കുറഞ്ഞ സ്ഥലത്ത്‌ കൊണ്ടുവരിക പ്രയാസമാണ്‌.വീടുപണിയുവാന്‍ മറ്റൊരു സ്ഥലം നോക്കിക്കോളൂ."

എന്തുകൊണ്ടോ ആ വാക്കുകള്‍ കേട്ടപ്പോള്‍ എന്റെ മനസ്സിലേക്ക്‌ തെളിഞ്ഞുവന്നത്‌ അന്തരിച്ച പ്രശസ്ഥ വാസ്തുശില്‍പ്പി ലാറിബേക്കറുടെ മുഖമാണ്‌. വീടുവെക്കുന്നവന്റെ ആവശ്യങ്ങളും സാമ്പത്തികസ്ഥിതിയും നോക്കി സ്ഥലത്തിന്റെ സ്വഭാവത്തിനനുസരിച്ച്‌ വീടുപണിയുന്നതില്‍ ഇത്രയേറേ കഴിവ്‌ പ്രകടിപ്പിച്ച വാസ്തുശില്‍പ്പി വേറേ ഉണ്ടോ എന്ന് സംശയം.


വാസ്തുവിദഗ്ദന്റെ വാക്കുകള്‍ കേട്ട്‌ മടങ്ങിപ്പോകുവാന്‍ ഒരുങ്ങിയ അയാളുടെ പ്ലോട്ടിന്റെ സ്കെച്ച്‌ ഞാന്‍ ഒന്ന് വാങ്ങിനോക്കി. ഒരു പ്രൊഫഷണല്‍ മര്യാദമൂലം എന്തായാലും പ്രസ്തുത വിഷയത്തില്‍ അവിടെവെച്ച്‌ ഞാന്‍ ഇടപെട്ടില്ല എങ്കിലും ആ വസ്തുവിന്റെ ഏകദേശ രൂപവും അളവുകളും ഞാന്‍ മനസ്സില്‍ കുറിച്ചിട്ടു... (ഇത്രത്തോളം വായിച്ചിട്ട്‌ ഞാന്‍ സ്വയം പുകഴ്ത്തലിന്റെ അതിരുകള്‍ ലംഘിക്കുന്നു എന്ന് തോന്നിയാല്‍ മാന്യവയനക്കാര്‍ സദയം ക്ഷമിക്കുക.വിശാലമനസ്കന്‍ എന്നപേരില്‍ എഴുതുന്ന എടത്താടന്‍ സജീവന്‍ എന്ന എന്റെ ഗുരുനാഥന്‍ എഴുത്തുനിര്‍ത്തീട്ടില്ലാന്ന് നിങ്ങള്‍ മനസ്സില്‍ പറയുന്നതും എനിക്ക്‌ കേള്‍ക്കാം.)


എന്റെ സുഹൃത്തിന്റെ പ്ലാനുമായി വാസ്തുവിദഗ്ദന്റെ മുമ്പില്‍ ഇരിക്കുമ്പോഴും എന്റെ മനസ്സില്‍ ആ മനുഷ്യന്റെ പ്ലോട്ടിന്റെ സ്കെച്ചായിരുന്നു.എന്റെ സുഹൃത്ത്‌ ആചാര്യനു എന്നെ പരിചയപ്പെടുത്തി. അദ്ദേഹം അതു കേള്‍ക്കാത്ത ഭാവത്തില്‍ പ്ലാനിലൂടെ കണ്ണോടിച്ചു.


"അതേ ഇപ്പോ ചില പുസ്തകങ്ങള്‍ ഒക്കെ വായിച്ച്‌ ചിലര്‍ വെറുതെ കണക്കൊപ്പിച്ച്‌ പ്ലാനുണ്ടാക്കും.അതോണ്ടായില്ല ഇതിനു മറ്റുചില ശാസ്ത്രവിധികള്‍ കൂടെയുണ്ട്‌" തന്റെ വിഷയത്തില്‍ മറ്റൊരാള്‍ കൈകടത്തിയതിലുള്ള നീരസം പ്രകടിപ്പിച്ചുകൊണ്ട്‌ അദ്ദേഹം പറഞ്ഞു.

"ഒരു രണ്ടീസം കഴിഞ്ഞു വരിക പ്ലാന്‍ വിശദമായി ഞാനൊന്ന് നോക്കട്ടെ." ഞാന്‍ പരമാവധി വാസ്തുകണക്കില്‍ അളവുകള്‍ ഒപ്പിച്ചെടുത്ത പ്ലാന്‍ ആയിരുന്നു അത്‌.കൂടുതല്‍ സംസാരിക്കുവാനുള്ള ഒരു മൂഡില്‍ ആയിരുന്നില്ല ഞാനപ്പോള്‍. എന്റെ ചിന്ത മൂന്നുസെന്റില്‍ രണ്ടുനിലകളിലായി ആ അപരിചിതന്റെ ആവശ്യം നിറവേറ്റാവുന്ന ഒരു വീട്‌ എങ്ങിനെ ഉണ്ടാക്കാം എന്നായിരുന്നു.


മൂന്നുസെന്റു ഭൂമിയിലായാലും പരമാവധി സൗകര്യങ്ങള്‍ ഒരുക്കി ഒരു വീടു നിര്‍മ്മിക്കാന്‍ കഴിയും എന്ന് ഇനിയും വിശ്വസിക്കാത്തവര്‍ക്കായിട്ടാണ്‌ ഈ പ്ലാന്‍.(മിടുക്കന്മാരായ പല ആര്‍ക്കിടെക്റ്റുകള്‍ക്കും ഡിസൈനര്‍മാര്‍ക്കും മൂന്നുസെന്റില്‍ അല്‍ഭുതങ്ങള്‍ കാണിക്കാന്‍ കഴിയും എന്നതിനു തെളിവുകള്‍ നിരവധിയുണ്ട്‌.ബാംഗ്ലൂര്‍ പോലുള്ള മെട്രോകളില്‍ ഇതു സര്‍വ്വ സാധാരണം. അവര്‍ സദയം ഈയ്യുള്ളവനോട്‌ ക്ഷമിക്കുക)


ഭൂമിവില വര്‍ദ്ധിച്ചതും ഭൂമിയുടെ ലഭ്യത കുറഞ്ഞതും ഇന്ന് സ്വന്തമായി ഒരു വീടിനെകുറിച്ച്‌ സ്വപ്നം കാണുന്നവര്‍ക്ക്‌ ഇരുട്ടടിയായിട്ടുണ്ട്‌. പഞ്ചായത്തുകളില്‍ പോലും ബില്‍ഡിങ്ങ്‌ റൂള്‍ (കെ.എം,ബി.ആര്‍) പാലിച്ചേ വീടുപണിയാനൊക്കൂ. (മൂനുസെന്റ്‌ സ്ഥലത്ത്‌ വീടുപണിയുന്നതില്‍ നിയമത്തില്‍ ചില ഇളവുകള്‍ ഉണ്ട്‌).


വാസ്തു അളവുകള്‍ക്കനുസൃതമായിട്ടല്ല ഈ വീടിന്റെ ഡിസൈന്‍.ഡൈനിങ്ങിനും ലിവിങ്ങിനും ആയി ചെറിയ ഒരു ഹാള്‍ കൂടാതെ ഒരു അറ്റാച്ച്ഡ്‌ ബാത്രൂമോടുകൂടിയ ബെഡ്രൂമും അടുക്കളയും യൂട്ടിലിറ്റിയും ഉള്‍പ്പെടെ ഗ്രൗണ്ട്‌ ഫ്ലോറില്‍ 68.67 മീറ്റര്‍സ്ക്വയര്‍ (738 ചതുരശ്ര അടി) വിസ്തീര്‍ണ്ണമാണീ വീടിന്‌.സ്റ്റെയര്‍ കേസിനടുത്തുള്ള ഫിക്സഡ്‌ വിന്റോസിന്റെ വലിപ്പം FW1 = 80x100സെന്റീമീറ്റര്‍ ആണ്‌.


സ്പൈറല്‍ സ്റ്റെയര്‍ കേസ്‌ ആക്കിയാല്‍ കൂടുതല്‍ സ്ഥലം ലാഭിക്കാം എങ്കിലും സൗകര്യം സാധാരണ സ്റ്റെയറിനു തന്നെയാണ്‌. മുകള്‍ നിലയിലെ ഹാളില്‍ ഒരുഭാഗത്ത്‌ സ്റ്റഡിഏരിയായോ, കമ്പൂട്ടര്‍ വെക്കുവാനുള്ള സ്പേസോ ഒരുക്കാം.ഇതിനായി ബാല്‍ക്കണിയെ ഒഴിവാക്കി ആഭാഗം ഹാളിനോടു ചെര്‍ത്താല്‍ കൂടുതല്‍ സൗകര്യമായി. ചിത്രം - 356 മീറ്റര്‍സ്ക്വയര്‍ (602 ചതുരശ്ര അടി) ഉള്ളമുകള്‍ നിലയില്‍ കൂടുതല്‍ സൗകര്യം വേണമെന്നുള്ളവര്‍ക്ക്‌ ഓപ്പണ്‍ ടെറസ്സ്‌ കൂട്ടിച്ചേര്‍ത്തു ഹാള്‍ കുറച്ച്‌ കൂടെ വലുപ്പത്തില്‍ എടുക്കാം അല്ലാത്തപക്ഷം കിച്ചണിനു മുകളിലും താഴത്തെ ബെഡ്രൂമിനു മുകളിലുമായി രണ്ടു ബെഡ്രൂമുകള്‍ എടുക്കാം. മുകളില്‍ രണ്ടു ടോയ്‌ലറ്റുകള്‍ ഒഴിവാക്കി ഒരു കോമണ്‍ ബാത്രൂമില്‍ ഒതുക്കിയാല്‍ അത്രയും നന്ന്.രണ്ടു നിലകളിലും ആയി 1340 ചതുരശ്ര അടി (പ്ലാന്‍ 1+2) വിസ്തീര്‍ണ്ണമാണ്‌ ഈ വീടിനുള്ളത്‌.


മിടുക്കനായ ഒരു ആര്‍ക്കിടെക്റ്റ്‌/ഡിസൈനര്‍ ഒരുപക്ഷെ ഇതില്‍ കാര്‍പോര്‍ച്ചുകൂടെ ഉള്‍പ്പെടുത്തിയേനെ!


ഒരു പ്രത്യേക മൂഡില്‍ ഇരുന്നു വരച്ച ഒരു പ്ലാനാണിത്‌. അതുപോലെ പോസ്റ്റിന്റെ ടെക്സ്റ്റും. നിങ്ങളുടെ അഭിപ്രായത്തിനു അക്ഷമയോടെ കാത്തിരിക്കുന്നു.


കിച്ചണ്‍ ഡിസൈന്‍


അല്‍പം മുമ്പത്തെ തലമുറവരെ ആളുകള്‍ക്ക്‌ കരിപുരണ്ട ജീവിതങ്ങളുടെ സിംബലായിരുന്ന കിച്ചണുകള്‍ ഇന്ന് ആര്‍ഭാടത്തിന്റെ ഷോറൂമായി മാറിക്കൊണ്ടിരിക്കുന്നു. ലക്ഷങ്ങള്‍ ചിലവിട്ടാണ്‌ പലരും അടുക്കളകള്‍ ഒരുക്കുന്നത്‌. രണ്ടും മൂന്നും കിച്ചണുകള്‍ ഉള്ള വീടുകള്‍ ഇന്നു സാധാരണം. നമ്മുടെ ജീവിത രീതിയില്‍ ഉണ്ടായ മാറ്റം ഏറ്റവും കൂടുതല്‍ പ്രതിഫലിക്കുന്നതും കിച്ചണുകളില്‍ തന്നെ. ഇടക്കാലത്ത്‌ ചിലര്‍ ആശാരിമാരെക്കൊണ്ട്‌ "ഗള്‍ഫ്‌ മോഡല്‍" കിച്ചണ്‍ കാബിനറ്റുകള്‍ ചെയ്യിക്കുവാന്‍ തുടങ്ങിയപ്പോള്‍ അതൊരു ട്രന്റായി.വെളുത്ത ടയില്‍ ഒട്ടിച്ച വര്‍ക്ക്‌ സ്ലാബുകളും അതിനടിയിലെ ഷെല്‍ഫുകളും ആ കാലഘട്ടത്തിലെ ട്രെന്റായി.അഴുക്കും കരിയും എളുപ്പത്തില്‍ പിടിക്കുവാന്‍ തുടങ്ങിയപ്പോള്‍ ടെയിലിന്റെ നിറത്തില്‍ മാറ്റം വരുത്തിയും മാര്‍ബിള്‍ സ്ലാബിട്ടും ചില പരിഷ്ക്കാരങ്ങള്‍ നടത്തി. മാര്‍ബിള്‍ സ്ലാബില്‍ ചെറുനാരങ്ങയുടെ നീരുപോലുള്ള അസിഡിറ്റിയുള്ള ദ്രാവകങ്ങള്‍ വീണാല്‍ അതിനു നിറം മാറ്റം വരുന്നതും തുടര്‍ച്ചയായ ഉപയോഗം മൂലം പെട്ടെന്ന് തേയ്മാനം വരുന്നതും ഒരു പ്രശ്നമായി.തുടര്‍ന്ന് ഗ്രാനേറ്റിന്റെ വരവായി.


മോഡുലാര്‍ കിച്ചണ്‍ തുടക്കത്തില്‍ വരേണ്യവര്‍ഗ്ഗത്തിന്റെ മാത്രം കുത്തകയായിരുന്നെങ്കിലും ഇന്നത്‌ മധ്യവര്‍ഗ്ഗം ഒരു സ്റ്റാറ്റസിനായി പകര്‍ത്തുവാന്‍ തുടങ്ങി. പലയിടങ്ങളിലും ഒരു ഭ്രമമായി അതുപടര്‍ന്നു. ഒരു നൂക്ലിയര്‍ കുടുമ്പത്തിനു എന്തിനാണ്‌ ഇത്രവലിയ കിച്ചണ്‍ എന്ന് ആരും ചിന്തിക്കുന്നില്ല. കിച്ചണ്‍ ഒരുക്കുമ്പോള്‍ താഴെ പറയുന്ന കാര്യങ്ങള്‍ ഉള്‍പ്പെടെ ശ്രദ്ധിച്ചാല്‍ നന്നായിരിക്കും.

* അലങ്കാരത്തിനെന്നപേരില്‍ ക്യാബിനറ്റുകളില്‍ അനാവശ്യമായി ലൈറ്റുകള്‍ സ്ഥാപിക്കാതിരിക്കുക.

*റഫ്രിജറേറ്റര്‍,ഓവന്‍,മിക്സി,ഡിഷ്‌വാഷര്‍,വാഷിങ്ങ്‌ മെഷീന്‍ തുടങ്ങിയ ഉപകരണങ്ങള്‍ എവിടെ സ്ഥാപിക്കണം എന്ന് മുങ്കൂട്ടി കണക്കാക്കി അതിനുള്ള ഇലക്ടിക്ക്‌ പ്ലെഗ്ഗ്‌ പോയന്റുകള്‍ മുങ്കൂട്ടി സ്ഥാപിക്കുക.

*കിച്ചണിലേക്കുള്ള വെന്റിലേഷന്‍ തടസ്സപ്പെടാത്ത വിധത്തില്‍ ക്യാബിനെറ്റുകള്‍ സ്ഥാപിക്കുക.

*ഡിസൈന്‍ സ്റ്റേജില്‍ തന്നെ കിച്ചണിന്റെ വലിപ്പം ചെറുതാക്കുക.ചെറിയ കിച്ചണുകള്‍ വൃത്തിയായി സൂക്ഷിക്കുവാന്‍ എളുപ്പമാണ്‌.

*തുറന്ന മനസ്ഥിതിയുള്ളവര്‍ക്കും സ്ഥലപരിമിതിയുള്ളവര്‍ക്കും ഓപ്പണ്‍ കിച്ചണുകള്‍ വളരെ നല്ലതാണ്‌.കിച്ചണിനും ഡൈനിങ്ങിനും ഇടയില്‍ ഒരു ബ്രേക്ക്‌ ഫാസ്റ്റ്‌ കൗണ്ടര്‍ കൊടുക്കുന്നത്‌ നന്നായിരിക്കും.

*അനാവശ്യമായി അടുക്കളയിലെ എല്ലാ ചുമരുകളിലും ക്യാബിനറ്റുകള്‍ കൊടുക്കാതിരിക്കുക. സാമ്പത്തിക ചിലവു വര്‍ദ്ധിക്കും എന്നതുമാത്രമല്ല അതിനു മുകളില്‍ പൊടിപടലം അടിഞ്ഞു കൂടും.അതു വൃത്തിയാക്കുവാന്‍ ബുദ്ധിമുട്ടും കൂടും.


*കിച്ചണ്‍ ക്യാബിനറ്റുകള്‍ക്കു മുകളില്‍ പ്രാണികളുടെയും പാറ്റ എലി എന്നിവയുടെ താവളം ആയി മറാതിരിക്കുവാന്‍ ശ്രദ്ധിക്കുക.പല സ്ത്രീകളിലും തുമ്മലും അലര്‍ജിയും ഉണ്ടാക്കുന്നതില്‍ വൃത്തിയില്ലാത്ത കിച്ചണ്‍ ക്യാബിനറ്റുകള്‍ക്ക്‌ വലിയ പങ്കുണ്ട്‌.


*നിലവാരമുള്ള പ്ലംബിംഗ്‌ ഫിറ്റിങ്ങ്സ്‌ ഉപയോഗിക്കുക.സിങ്കില്‍ നിന്നും പോകുന്ന പൈപ്പുകളില്‍നിന്നും ക്യാബിനറ്റുകള്‍ക്കുള്ളില്‍ ചോര്‍ച്ചയുണ്ടോ എന്ന് ഇടക്കിടെ പരിശോധിക്കുന്നത്‌ നല്ലതാണ്‌.

*വെള്ളം വീണാല്‍ പെട്ടെന്ന് കേടുവരുന്ന മരം/പ്ലൈവുഡ്‌ കൊണ്ടുള്ള ക്യാബിനറ്റുകള്‍ വെക്കാതിരിക്കുക.

*മുന്‍പരിചയവും ഗുണനിലവാരത്തില്‍ വിട്ടുവീഴ്ചയില്ലാത്തതുമായ സ്ഥപനങ്ങളെക്കൊണ്ട്‌ മാത്രം മോഡുലാര്‍ കിച്ചണ്‍ ചെയ്യീക്കുക.

*മുറിയുടെ വലിപ്പം അനുസരിച്ച്‌ ആവശ്യമായ കപ്പാസിറ്റിയുള്ള ഹുഡ്ഡ്‌ സ്ഥാപിക്കുക. *സ്വന്തമായി കിച്ചണ്‍ കാബിനറ്റ്‌ വര്‍ക്ക്‌ ചെയ്യീക്കുകയാണെങ്കില്‍ ഉള്ളിലെ പാര്‍ടീഷ്യന്‍സ്‌ ഫെറോസിമെന്റില്‍ ചെയ്യുക. ഫെറോസിമന്റ്‌ ഷീറ്റുകള്‍ മാര്‍ക്കറ്റില്‍ ലഭ്യമണ്‌.

*ഉറപ്പുള്ളതും വിലകുറഞ്ഞതുമായ മരത്തില്‍ സ്റ്റെയിന്‍ ചെയ്ത്‌ ക്യാബിനറ്റുകള്‍ ആകര്‍ഷകമാക്കാം.

*സിങ്കിനു സമീപത്തെ ക്യാബിനിലെ വാതിലില്‍ തുറക്കുമ്പോള്‍ പുറത്തേക്ക്‌ വരത്തക്കവണ്ണം വേസ്റ്റ്‌ ഇടുവാന്‍ ഒരു ബക്കറ്റ്‌ വെക്കുവാനുള്ള സൗകര്യം ഒരുക്കുക. ആവശ്യം കഴിഞ്ഞാല്‍ അത്‌ അടച്ചാല്‍ പുറമേക്ക്‌ കാണുകയില്ല.

*റഫ്രിജറേറ്റര്‍ സിങ്ക്‌ അടുപ്പ്‌ എന്നിവതമ്മിലുള്ള ദൂരം പരമാവധി കുറക്കുവാന്‍ ശ്രദ്ധിക്കുക.


ഇതോടൊപ്പം കൊടുത്തിരിക്കുന്ന ലേയൗട്ടിലെ ഒന്നുരണ്ടുകാര്യങ്ങള്‍ പറഞ്ഞുകൊള്ളട്ടെ.

1. കൗണ്ടറിന്റെ താഴത്തെ ഷെല്‍ഫുകള്‍ സ്ഥാപിക്കുമ്പോള്‍ point-A യില്‍ കൊടുത്തിരിക്കുന്നപോലെ സ്കെര്‍ട്ടിങ്ങ്‌ 7.5-10 സെന്റീമീറ്റര്‍ ഉള്ളിലേക്ക്‌ തള്ളിക്കൊടുക്കുവാന്‍ ശ്രദ്ധിക്കുക. അല്ലെങ്കില്‍ അടുക്കള കൗണ്ടറില്‍ ചാരിനിന്ന് ജോലിചെയ്യുന്നവരുടെ കാല്‍ വിരലുകള്‍ അവിടെ മുട്ടി അസൗകര്യം ഉണ്ടാക്കും.

2. വിന്റോ ചിത്രത്തില്‍ കാണിച്ചിരിക്കുന്നപോലെ അടിഭാഗം വര്‍ക്കിങ്ങ്‌ സ്ലാബില്‍ നിന്നും 40-45 സെന്റീമീറ്റര്‍ എങ്കിലും ഉയരത്തില്‍ സ്ഥാപിക്കുക. ജനലിനരികില്‍ ആണ്‌ സ്റ്റൗ വെക്കുന്നതെങ്കില്‍ കാറ്റടിച്ച്‌ തീ കെടുവാനുള്ള സാധ്യത കൂടുതല്‍ ആണ്‌. കൂടാതെ ഗ്യാസിന്റെ ഉപയോഗം വര്‍ദ്ധിക്കുകയും ചെയ്യും.

3. ഭാരമുള്ള വസ്തുക്കള്‍ സൂക്ഷിച്ചുവെക്കുവാന്‍ ഉദ്ദേശിക്കുന്നുവെങ്കില്‍ ഒന്നോ രണ്ടോ കൗണ്ടറുകള്‍ക്കുള്ളിലെ ഫെറോ സിമന്റ്‌ സ്ലാബുകള്‍ക്ക്‌ സ്റ്റീല്‍ ആങ്കിളുകള്‍ കൊടുത്ത്‌ കൂടുതല്‍ സപ്പോര്‍ട്ട്‌ നല്‍കുക.

4.ഒന്നുരണ്ടു ക്യാബിനുകളില്‍ പാര്‍ട്ടീഷന്‍ നല്‍കാതിരുന്നാല്‍ അരിചാക്കും പഴക്കുലയും മറ്റും സൂക്ഷിക്കുവാന്‍ സൗകര്യമായിരിക്കും.

5.കിച്ചണ്‍ കാബിനറ്റിന്റെ അടിഭാഗം തറനിരപ്പില്‍ നിന്നും 150 സെന്റീമീറ്ററില്‍ വെക്കുന്നവരും ഉണ്ട്‌. നില്‍ക്കുമ്പോള്‍ തല മുട്ടാത്തെ ശ്രദ്ധിക്കണം എന്നുമാത്രം.( ചുമരില്‍ നിന്നുമുള്ള ഡെപ്ത്‌ 40 സെന്റീമീറ്റര്‍ ആക്കിയാല്‍ ആ പ്രശ്നം ഒരു പരിധിവരെ കുറാക്കാം)


അടുത്ത പോസ്റ്റില്‍ കിച്ചണ്‍ ലേയൗട്ടുകളും വിശദാംശങ്ങളും.


പാരമൊഴി: കിച്ചണില്‍ തലചീകുന്ന ചീര്‍പ്പും നെയില്‍ കട്ടറും സൂക്ഷിക്കാതിരുന്നാല്‍ നന്ന്. (ഹേയ്‌ ഞാനും വിശാലേട്ടനും കൂടെ ഒരിടത്തും കിച്ചണ്‍ കാണുവാന്‍ പോയിട്ടുമില്ല അവിടെ കണ്ട കാര്യത്തെക്കുറിച്ച്‌ കക്ഷി ഒരു കമന്റും പറഞ്ഞിട്ടും ഇല്ല.)


Monday, July 02, 2007

പ്ലാന്‍ 12


1500 ചതുരശ്രയടി (140 മീറ്റര്‍ സക്വയര്‍) വിസ്തീര്‍ണ്ണമുള്ള ഒരു വീടിന്റെ പ്ലാനാണിത്‌.(വാസ്തു കണക്ക്‌ അനുസരിച്ചല്ല ഇതിലെ അളവുകള്‍ നല്‍കിയിരിക്കുന്നത്‌.)മുകള്‍ നിലയില്‍ ബെഡ്രൂം No 1നു മുകളിലായി ഒരു ബെഡ്രൂമും ഡൈനിങ്ങിനു മുകളിലായി ഒരു അപ്പര്‍ ലിവിങ്ങും എടുക്കാം. ബാല്‍ക്കണി ആവശ്യത്തിനു വലിപ്പത്തില്‍ ലിവിങ്ങിനു മുകളിലും കൊടുക്കാവുന്നതാണ്‌.


പുറകുവശത്തെ വര്‍ക്ക്‌ ഏരിയായുടെ റൂഫ്‌ 210 സെന്റീമീറ്റര്‍ ഉയരത്തില്‍ കൊടുത്ത്‌ സ്റ്റോറിനു വെന്റിലേഷന്‍ നല്‍കാം.പലയിടങ്ങളിലും സ്റ്റോറിനു വേണ്ടത്ര വെന്റിലേഷന്‍ നല്‍കാറില്ല.ഇതു സ്റ്റോറിനകത്തു ദുര്‍ഗ്ഗന്ധം ഉണ്ടാക്കുന്നതിനും പൂപ്പല്‍ വരുന്നതിനും അവിടെ ശേഖരിക്കപ്പെട്ടിട്ടുള്ള ആഹാരസാധനങ്ങള്‍ കേടുവരുന്നതിനും ഇടയാക്കാറുണ്ട്‌. സ്റ്റൊര്‍ റൂമിന്റെ വാതിലില്‍ മെഷ്‌ കൊടുത്തുകൊണ്ട്‌ ഉണ്ടാക്കിയാല്‍ കൂടുതല്‍ വായുസഞ്ചാരം ഉറപ്പാക്കുകയും ചെയ്യാം.


NB: ഗവണ്മെന്റിന്റെ പുതിയ ഉത്തരവു പ്രകാരം ബില്‍ഡിങ്ങ്‌ റൂള്‍ പാലിച്ചുകൊണ്ട്‌ പ്ലാനും അനുബന്ധ ഡോയിങ്ങുകളും തയ്യാറാക്കി ലൈസന്‍സ്ഡ്‌ ആര്‍ക്കിടെക്റ്റ്‌/എഞ്ചിനീയറെക്കൊണ്ട്‌ സൈന്‍ചെയ്യീച്ച്‌ അതതു തദ്ദേശസ്വയം ഭരണ സ്ഥാപനങ്ങളില്‍ സമര്‍പ്പിച്ച്‌ മുങ്കൂട്ടി അനുമതി വാങ്ങിയ ശേഷം മാത്രമേ വീടുകളും മറ്റു കെട്ടിടങ്ങളും നിര്‍മ്മിക്കുവാന്‍ കഴിയുകയുള്ളൂ.

Saturday, June 30, 2007

പഞ്ചായത്തുകളിലും ബില്‍ഡിങ്ങ്‌ റൂള്‍ നിര്‍ബന്ധമാക്കുന്നു.

മുന്നറിയിപ്പ്‌: ആധികാരികവും കൃത്യവുമായ വിവരം ഇനിയും എനിക്ക്‌ ലഭ്യമല്ലാത്തതിനാല്‍ കേട്ടറിവിന്റെ അടിസ്ഥാനത്തിലാണ്‌ ഈ പോസ്റ്റ്‌.അതിനാല്‍ മാന്യവായനക്കാര്‍ കാര്യങ്ങള്‍ പഞ്ചായത്തില്‍നിന്നോ മറ്റു ഉത്തവാദിത്വപ്പെട്ട ഉദ്യോഗസ്ഥരില്‍ നിന്നോ കൃത്യമായി അന്വേഷിച്ച്‌ അറിയുവാന്‍ അപേക്ഷിക്കുന്നു. കാര്യങ്ങള്‍ വ്യക്തമാകുമ്പോള്‍ പിന്നീട്‌ അറിയിക്കുന്നതാണ്‌.
--------------------------------------------------------------------
മുന്‍പ്‌ കോര്‍പ്പറേഷന്‍/മുന്‍സിപാലിറ്റികള്‍ ചില പഞ്ചായത്തുകള്‍ എന്നിവടങ്ങളില്‍ മാത്രം നിലനിന്നിരുന്ന കെട്ടിടനിര്‍മ്മാണ ചട്ടങ്ങള്‍ ഇനി എല്ലാ പഞ്ചായത്തുകളിലും നടപ്പിലാക്കുന്നു എന്നാണ്‌ അറിയുവാന്‍ കഴിഞ്ഞത്‌. ഇതുപ്രകാരം കെട്ടിടം പണിയുവാന്‍ പോകുന്നവര്‍ അതതു പഞ്ചായത്തുകളില്‍ അപേക്ഷയും അതോടൊപ്പം കൃത്യമായ അളവുകളോടെ വിശദമായ പ്ലാനും എലിവേഷനും സെക്ഷനും സൈറ്റ്‌പ്ലാനും, സര്‍വ്വീസ്‌ പ്ലാനും മറ്റും നല്‍കി മുന്‍ കൂട്ടി അനുമതി വാങ്ങേണ്ടതാണ്‌.അതുപോലെ കെട്ടിടം നിര്‍മ്മാണം കഴിഞ്ഞാല്‍ അതിന്റെ കമ്പ്ലീഷന്‍ സംബന്ധിച്ചും ഒരു റിപ്പോര്‍ട്ട്‌ അധികാരപ്പെട്ട ഉദ്യോഗസ്ഥന്‍(ര്‍) മുന്‍പാകെ നല്‍കണം.

കെട്ടിടനിര്‍മ്മാണ ചട്ടം അനുസരിച്ച്‌ പണിയുന്ന കെട്ടിടങ്ങള്‍ റോഡില്‍ നിന്നും വശങ്ങളില്‍ (അതിര്‍ത്തിയില്‍ നിന്നും) നിന്നും നിശ്ചിത ദൂരം പാലിച്ചിരിക്കണം.ആവശ്യമായ വെന്റിലേഷന്‍ ഉണ്ടായിരിക്കണം.അതുപോലെ സെപ്റ്റിടാങ്ക്‌ കിണര്‍ എന്നിവയുടെ ദൂരം തുടങ്ങി പല കാര്യങ്ങളും ശ്രദ്ധിച്ചേ കെട്ടിടം പണിയുവാന്‍ കഴിയൂ.മൂന്നുസെന്റ്‌ ഭൂമിമാത്രം ഉള്ളവര്‍ക്ക്‌ ഇതില്‍ ചില ഇളവുകള്‍ ഉണ്ട്‌.ഇതിനാവശ്യമായ സബ്മിഷന്‍ പ്ലാനുകള്‍ തയ്യാറാക്കി സൈന്‍ ചെയ്തു മുന്‍സിപാലിറ്റികളിലും പഞ്ചായത്തുകളിലും സമര്‍പ്പിക്കുവാനും അനുമതി വാങ്ങിക്കുവാനും ലൈസന്‍സ്‌ ഉള്ളവര്‍ക്ക്‌ മാത്രമേ കഴിയൂ.ആര്‍ക്കിടെക്റ്റുകള്‍,എം ടെക്‌.ബിടെക്‌ എഞ്ചിനീയര്‍മാര്‍,ഡിപ്ലോമ എഞ്ചിനീയര്‍മാര്‍, ഐ.ടി.എ. തുടങ്ങി ഈ മേഘലയില്‍ ഗവണ്‍മന്റ്‌ അംഗീകൃത വിദ്യാഭ്യാസം ലഭിച്ചവര്‍ക്ക്‌ അവര്‍ ചെയ്ത കോഴ്സുകളുടെ നിലവാരം, പ്രവര്‍ത്തിപരിചയം എന്നിവ അനുസരിച്ച്‌ ഗവണ്മെന്റില്‍ നിന്നും അതതു ഗ്രേഡനുസരിച്ച്‌ ലൈസന്‍സ്‌ ലഭിക്കും.ആറുമാസത്തെ സിവില്‍/ആട്ടോകാഡ്‌ കോഴ്സുകള്‍ ചെയ്ത്‌ പേരിനു കൂടെ എഞ്ചിനീയര്‍ പദവി ചാര്‍ത്തിനടക്കുന്ന ഒത്തിരിപേരുണ്ട്‌ പക്ഷെ അത്തരക്കാര്‍ക്ക്‌ ലൈസന്‍സ്‌ ഉണ്ടാകണം എന്നില്ല. അതുകൊണ്ട്‌ ഇത്തരം ആളുകളെ ഒഴിവാക്കി അംഗീകാരം ഉള്ളവരെ സമീപിക്കുന്നതായിരിക്കും കൂടുതല്‍ നല്ലത്‌.ഇടനിലക്കാരെയും അംഗീകാരം ഇല്ലാത്തവരെയും ഒഴിവാക്കുക സമയനഷ്ടം ധന നഷ്ടം എന്നിവ ഒഴിവാക്കുവാന്‍ ഇത്‌ ഉപകരിച്ചേക്കും.

വാസ്തു വിദഗ്ദന്മാരെ സമീപിക്കും മുമ്പ്‌ കെട്ടിടനിര്‍മ്മാണ ചട്ടം അനുശാസിക്കുന്ന രീതിയില്‍ കെട്ടിടം നിര്‍മ്മിക്കുവാന്‍ കഴിയുമോ എന്ന് ഒരു വിദഗ്ദനെക്കൊണ്ട്‌ പരിശോധിക്കുകയും അദ്ദേഹത്തിന്റെ നിര്‍ദ്ദേശപ്രകാരം ഒരു പ്ലാന്‍ തയ്യാറാക്കി വാസ്തു കണ്‍സല്‍ട്ട്‌ ചെയ്യുന്നതും ആയിരിക്കും നല്ലത്‌.

ജനങ്ങള്‍ക്ക്‌ ഇതു ബുദ്ധിമുട്ടുണ്ടാക്കും എന്ന പ്രചരണങ്ങള്‍ ചിലകോണുകളില്‍ നിന്നും ഇതിനോടകം ഉയര്‍ന്നുതുടങ്ങിയിട്ടുണ്ട്‌. വസ്തു സംബന്ധമായ ഇടപാടുകള്‍ നടത്തുമ്പോള്‍ ആധാരം റെജിസ്റ്റര്‍ ചെയ്യേണ്ടതുണ്ട്‌ അതുപോലെ വാഹനങ്ങള്‍ കൈമാറ്റം ചെയ്യുമ്പോള്‍ ആര്‍സി ഓണര്‍ഷിപ്പ്‌ സംബന്ധിച്ചും റെജിസ്റ്റ്രേഷനും മറ്റും നിര്‍ബന്ധമാണ്‌. പിന്നെ എങ്ങിനെ ഇതുമാത്രം ഒരു ബുദ്ധിമുട്ടായി തീരുന്നു? കുബുദ്ധികളുടെ ദുഷ്പ്രചരണങ്ങളില്‍ തെറ്റിദ്ധരിക്കതെയും ഇതിന്റെ പേരില്‍ കമ്മീഷനടിക്കുന്നവര്‍ക്കു മുമ്പാകെ വഞ്ചിതരാകാതെയും ഇരിക്കുക.

ബില്‍ഡിങ്ങ്‌ റൂള്‍ മുന്‍പേ കര്‍ക്കശമാക്കാത്തതിന്റെ തിക്തഫലങ്ങളാണ്‌ പലയിടത്തും കയ്യേറ്റങ്ങള്‍ പൊളിക്കേണ്ടിവരുന്നതും റോഡുവികസനങ്ങള്‍ തടസ്സപ്പെടുന്നതും.

വാല്‍മൊഴി: ലൈസന്‍സുള്ളവര്‍ അതു ദുരുപയോഗം ചെയ്യാതെയും ജനങ്ങള്‍ക്ക്‌ ബുദ്ധിമുട്ടുണ്ടാക്കാത്തരീതിയിലും കൈകാര്യം ചെയ്യുക. അതുപോലെ പ്രൊഫഷണലിസം നഷ്ടപ്പെടുത്താത്തരീതിയില്‍ ഉള്ള ചാര്‍ജ്ജ്‌ ഈടാക്കുകയും ചെയ്യുക. കണ്ടവന്റെ ഒക്കെ ഡിസൈനിനു 100 രൂപക്ക്‌ ഒപ്പിടുന്നതു സ്വന്തം പ്രൊഫഷനോടു ചെയ്യുന്ന വഞ്ചനയാണ്‌.കണ്‍സ്ട്രക്ഷന്‍ സൈറ്റില്‍ മേസന്റെ സഹായിയായി വരുന്നവര്‍ക്കിന്ന് 175-210 രൂപവരെ കൂലിയുണ്ടെന്ന് മനസ്സിലാക്കുക ചുരുങ്ങിയ പക്ഷം അതിലും കൂടുതലെങ്കിലും ഒരു എഞ്ചിനീയറുടെ ഒപ്പിനു വാങ്ങുവാന്‍ അപേക്ഷിക്കുന്നു.മൂന്നുസെന്റില്‍ മുന്നൂറു സ്വക്വയര്‍ ഫീറ്റില്‍ തലചായ്ക്കുവാന്‍ കൂരവെക്കുന്ന അത്താഴപഷ്ണിക്കാരന്റെ പോക്കറ്റില്‍ കയ്യിട്ടുവാരണമെന്ന് ഞാന്‍ പറയുന്നില്ല.

പാരമൊഴി: പഠിക്കുന്ന കാലത്ത്‌ ലോഗരിതം ടേബിളിന്റെ കാലൊടിഞ്ഞൂന്നും അതു നന്നാക്കാന്‍ കാശുചിലവുണ്ടെന്നും പറഞ്ഞ്‌ മാതാപിതാക്കളെ പറ്റിച്ച ആളുകള്‍ ഉണ്ട്‌ നമുക്കിടയില്‍ ഒരു പക്ഷെ ഇനി പ്ലാന്‍ സബ്മിഷന്റെ പേരില്‍ എന്തൊക്കെ പറ്റിക്കലാണാവോ നാട്ടുകാര്‍ക്കിടയില്‍ നടത്തുക.

Tuesday, June 12, 2007

കാവലിനും കൂട്ടിനും ശ്വാനന്മാര്‍.



ചിത്രത്തിനു കടപ്പാട്‌: ഇന്റര്‍ നെറ്റിലെ ഗൂഗിള്‍ സെര്‍ച്ചിനോട്‌.


വീടിനു കാവലായും വീട്ടുകാര്‍ക്ക്‌ ഒരു അരുമയായും നായ്ക്കളെ വളര്‍ത്തുന്നത്‌ സാധാരണമാണ്‌. പഴയകാലത്തെതില്‍ നിന്നും വ്യത്യസ്ഥമായി ഇന്ന് സാധാരണക്കാര്‍ പോലും "ബ്രാന്റഡ്‌" നായ്ക്കളെയാണ്‌ വളര്‍ത്തുവാന്‍ താല്‍പര്യപ്പെടുന്നത്‌.ഉദാഹരണമായി "ഹച്ചിന്റെ പരസ്യത്തില്‍ ഉള്ള നായക്കുട്ടി എന്റെ വീട്ടിലും ഉണ്ട്‌" എന്ന് അഭിമാനത്തോടെ പറയുന്നവര്‍ ഇന്ന് ധാരാളം.പലരും മറ്റുള്ളവര്‍ക്കു മുമ്പില്‍ മേനിനടിക്കുവാന്‍ നായ്ക്കളെ വളര്‍ത്താറുണ്ട്‌.


വീടു കാവലിനായി നായ്ക്കളെ തിരഞ്ഞെടുക്കുമ്പോള്‍ ജര്‍മ്മന്‍ ഷെപ്പെര്‍ഡ്‌,ഡോബര്‍മാന്‍ പിന്‍ഷ്വര്‍,ലാബ്രഡോര്‍ റിട്രീവര്‍,ഗ്രേറ്റ്‌ ഡാന്‍,റോട്ട്‌ വീലര്‍,ഡാല്‍മേഷ്യന്‍, രാജപാളയം(ജന്മദേശം തമിഴ്‌നാട്ടിലെ രാജപാളയം എന്ന സ്ഥലത്ത്‌) തുടങ്ങിയ വര്‍ക്കിങ്ങ്‌ ഗ്രൂപ്പില്‍ പെട്ട നായ്ക്കളെയാണ്‌ പരിഗണിക്കേണ്ടത്‌.ഇതില്‍ റോട്ട്‌ വീലര്‍ എന്ന വിഭാഗത്തില്‍ പെടുന്ന നായക്കള്‍ അപകടകാരികളാണ്‌. പൊതുവേ "വണ്‍ മാന്‍ ഡോഗ്‌" എന്ന് അറിയപ്പെടുന്ന ഇവയെ വേണ്ടവിധം ശ്രദ്ധിക്കാതിരുന്നാല്‍ പല വിധത്തിലുള്ള അപകടങ്ങളും ക്ഷണിച്ചുവരുത്തുകയാകും ഫലം.ഇവയെ സ്ത്രീകള്‍ക്ക്‌ പൊതുവെ കൈകാര്യം ചെയ്യുവാന്‍ ബുദ്ധിമുട്ടായിരിക്കും.അപകടകാരിയായതിനാല്‍ ചില രാജ്യങ്ങളില്‍ ഇവയെ നിരോധിച്ചിട്ടുണ്ട്‌ എന്നാണ്‌ അറിയുന്നത്‌.എന്നാല്‍ കാവലിനു വളരെയധികം മിടുക്കന്മാരാണ്‌ ഈ വിഭാഗത്തില്‍ പെട്ട നായക്കള്‍ എന്നത്‌ വിസ്മരിക്കാനാകില്ല.


ഡോബര്‍ മാനും,ജര്‍മ്മന്‍ ഷെപ്പേര്‍ഡും,ലാബ്രഡോറും, പൊതുവെ വളര്‍ത്തുവാന്‍ എളുപ്പമുള്ളവയാണ്‌.സ്ത്രീകളുമായും കുട്ടികളുമായും ഏറ്റവും കൂടുതല്‍ ഇണങ്ങുന്നതും താരതമ്യേന അപകടകാരിയുമല്ലാത്തതാണ്‌ ലാബ്രഡോര്‍ ഇനത്തില്‍ പെട്ട നായക്കള്‍.താര തമ്യേന ശൗര്യം കുറവാണ്‌ ഈ വിഭാഗത്തില്‍ പെടുന്നവക്ക്‌ (ലാബര്‍ഡോര്‍ വിഭാഗത്തില്‍ പെട്ട നായ്ക്കള്‍ സിനിമയിലെ ചില രംഗങ്ങളില്‍ ആളുകളെ കടിച്ചുകീറുന്നത്‌ കണ്ടിട്ട്‌ തെറ്റിദ്ധരിക്കേണ്ട).വര്‍ക്കിങ്ങ്‌ ഗ്രൂപ്പില്‍ പെട്ടുന്ന നായ്ക്കള്‍ക്ക്‌ ധാരാളം വ്യായാമം ആവശ്യമാണ്‌.വീടിനു ചുറ്റും മതിലോ വേലിയോ കെട്ടിത്തിരിച്ച്‌ അവയെ തുറന്നു വിടാവുന്നതാണ്‌.പെണ്‍ പട്ടികള്‍ക്കാണ്‌ നായ്ക്കളേക്കാള്‍ കാവലിനു ജാഗ്രത കൂടുതല്‍.
വീടിനകത്ത്‌ അരുമയായി വളര്‍ത്തുവാന്‍ പൂഡില്‍,പോമറേനിയന്‍,ഡാഷ്‌ ഹൂണ്ട്‌,പഗ്ഗ്‌ തുടങ്ങിയ വിഭാഗത്തില്‍ പെടുന്നവയെ തിരഞ്ഞെടുക്കാം.വീടിനകത്ത്‌ രോമം കൊഴിയുവാനും മറ്റും ഉള്ള സാധ്യത കണക്കിലെടുക്കുമ്പോള്‍ താരതമ്യേന രോമം കുറഞ്ഞ ഡാഷ്‌ ഹൂണ്ട്‌ ആയിരിക്കും കൂടുതല്‍ നല്ലത്‌.(സൂക്ഷിച്ചില്ലേല്‍ നല്ല കടിയും കിട്ടും)നായക്കുട്ടികളെ തിരഞ്ഞെടുക്കുമ്പോള്‍:ആദ്യം തന്നെ തങ്ങള്‍ക്ക്‌ ഏതു വിഭാഗത്തില്‍ പെട്ട നായ്ക്കുട്ടികളെ ആണ്‌ വേണ്ടതെന്ന് നിശ്ചയിക്കുക. നായ്ക്കുട്ടികള്‍ക്ക്‌ വേണ്ടത്ര തൂക്കവും ആരോഗ്യവും ഉണ്ടോ എന്ന് പരിശോധിക്കേണ്ടതുണ്ട്‌.കണ്ണില്‍ നിന്നും മറ്റു ശരീരഭാഗങ്ങളില്‍ നിന്നും വെള്ളം ഒലിക്കുന്നവയെ തിരഞ്ഞെടുക്കരുത്‌.ഉറക്കം തൂങ്ങികളെയും നടക്കാന്‍ ബുദ്ധിമുട്ടുള്ളവരെയും വേണ്ടെന്ന് വെക്കുക.ഓരോ വംശത്തിനും നിറത്തിലും ആകാരത്തിലും മറ്റും അതിന്റേതായ പ്രത്യേകതകള്‍ ഉണ്ട്‌.ഇത്തരം കാര്യങ്ങളില്‍ വ്യതിയാനം ഉള്ളവയെ ഒഴിവാക്കുക.
കച്ചവടക്കാര്‍ പലപ്പോഴും അതിശയോക്തി നിറഞ്ഞ കാര്യങ്ങളും തന്തക്കും തള്ളക്കും മല്‍സരങ്ങളില്‍ സമ്മാനം കിട്ടിയിട്ടുണ്ടെന്നും മറ്റും പറയും തുടര്‍ന്ന് വന്‍ വിലയായിരിക്കും നായ്ക്കുട്ടികള്‍ക്ക്‌ പറയുക.വിപണിയിലെ വിലനിലവാരത്തെക്കുറിച്ച്‌ അന്വേഷിച്ചതിനു ശേഷം മാത്രം വാങ്ങുക.കച്ചവടക്കാര്‍ പലയിടങ്ങളില്‍ നിന്നും വാങ്ങികൊണ്ടുവന്ന് വില്‍ക്കുന്നത്‌ സാധാരണമാണ്‌.അതിനാല്‍ നായ്ക്കുട്ടികളുടെ തള്ളയേയും തന്തയേയും കണ്ട്‌ ബോധ്യപ്പെട്ടതിനു ശേഷം വാങ്ങുന്നതായിരിക്കും കൂടുതല്‍ നല്ലത്‌. പേഡിഗ്രി ഉള്ളവയെ ആണ്‌ നിങ്ങള്‍ തിരഞ്ഞെടുക്കുന്നതെങ്കില്‍ സര്‍ട്ടിഫിക്കറ്റ്‌ യദാര്‍ത്ഥമാണോ എന്ന് പരിശോധിച്ച്‌ ഉറപ്പുവരുത്തേണ്ടതുണ്ട്‌.(പെഡിഗ്രി എന്നത്‌ കെന്നല്‍ ക്ലബ്ബുകള്‍ നായക്കളുടെ വംശശുദ്ധിക്ക്‌ നല്‍കുന്ന സര്‍ട്ടിഫിക്കറ്റ്‌ ആണ്‌)പൊതുവെ ഇവക്ക്‌ വില കൂടുതല്‍ ആയിരിക്കും.


സാധാരണ നിലക്ക്‌ ഇപ്പോള്‍ തൃശ്ശൂരില്‍ ഡാഷ്‌ ഹൂണ്ട്‌ 1000-1500 ,ജര്‍മ്മന്‍ ഷെപ്പേര്‍ഡ്‌ 2500-8000, ഡാല്‍മേഷ്യന്‍ 2000-5500,പഗ്ഗ്‌ (ഹച്ച്‌ ഫെയിം) 12000-25000,ഡോബര്‍ മാന്‍ 2000-3500,റോട്ട്‌ വീലര്‍ 6000-25000,ഗ്രേയ്റ്റ്‌ ഡാന്‍ 3500-8000 വരെയാണ്‌ വില.ഇതില്‍ പെഡിഗ്രിയുടേയും നായ്ക്കളുടെ പ്രത്യേകതയുടേയും അടിസ്ഥാനത്തില്‍ വിലയില്‍ വ്യതിയാനം ഉണ്ടാകാം.(ചില സുഹൃത്തുക്കളില്‍ നിന്നും കച്ചവടക്കാരില്‍ നിന്നും ലഭിച്ച വിവരമാണ്‌ മുകളില്‍ കൊടുത്തത്‌ ഈ വിലയില്‍ തന്നെ ചിലത്‌ അതിശയോക്തി നിറഞ്ഞതാണെന്ന് എനിക്ക്‌ തോന്നായ്കയില്ല) ടെയിനിങ്ങ്‌ കിട്ടിയ നായക്കള്‍ക്കും മല്‍സരങ്ങളില്‍ സമ്മാനം നേടിയ നായക്കള്‍ക്കും ഇറക്കുമതിചെയ്തവക്കും വില കൂടുതല്‍ ആണ്‌. റഷ്യയില്‍ നിന്നും ചൈനയില്‍ നിന്നും ചില യൂറോപ്യന്‍ രാജ്യങ്ങളില്‍ നിന്നും നായ്ക്കളെ ഇറക്കുമതി ചെയ്യാറുണ്ട്‌ ഇവയുടെ വില ലക്ഷങ്ങളാണ്‌.


ഭക്ഷണവും പരിചരണവും: നായക്കളുടെ ഭക്ഷണക്രമത്തിലും നല്ലവണ്ണം ശ്രദ്ധിക്കേണ്ടതുണ്ട്‌.നായക്കള്‍ക്ക്‌ രണ്ടു നേരം ഭക്ഷണം നല്‍കുന്നതായിരിക്കും നല്ലത്‌. രാത്രിയില്‍ നായ്ക്കള്‍ക്ക്‌ ഭക്ഷണം ഒഴിവാക്കിയാല്‍ അവ രാത്രിയില്‍ ഉറങ്ങാതിരിക്കുവാന്‍ നല്ലതാണെന്ന് അഭിപ്രായപ്പെടുന്നവര്‍ ഉണ്ട്‌.കേടായ ഭക്ഷണപദാര്‍ത്ഥങ്ങള്‍ അവക്ക്‌ നല്‍കരുത്‌.ചോറ്‌ പാല്‌ ഇറച്ചി മുട്ട എന്നിവക്ക്‌ പുറമേ പാക്കറ്റില്‍ വരുന്ന ഡോഗ്‌ ഫുഡ്ഡുകളും നല്‍കാവുന്നതാണ്‌.വിറ്റാമിന്‍ ഗുളികകളും വിരയിളക്കുവാനുള്ള മരുന്നുകളും സമയാ സമയങ്ങളില്‍ നല്‍കണം. കൂടാതെ കരള്‍ സംബന്ധമായ അസുഖങ്ങള്‍ വരാതിരിക്കുവാനുള്ള കുത്തിവെപ്പുകളും നല്‍കേണ്ടതുണ്ട്‌.റാബീസിനെതിരായ കുത്തിവെയ്പ്പും ഒരു വിദഗ്ദനായ വെറ്റിനറി ഡോക്ടരുടെ ഉപദേശപ്രകാരം നല്‍കാവുന്നതാണ്‌.
നായക്കള്‍ക്ക്‌ മുറിവുപറ്റിയാല്‍ അവയുടെ മുഖവും കൈകാലുകളും കെട്ടിയിടാതെ മരുന്ന് പുരട്ടുവാന്‍ ശ്രമിക്കരുത്‌. ആറുമാസത്തില്‍ ഒരിക്കലെങ്കിലും നായയെ ഡോക്ടറെക്കൊണ്ട്‌ പരിശോധിപ്പിക്കുന്നത്‌ നല്ലതാണ്‌.നായ്ക്കളെ വൃത്തിയായി ബ്രഷ്ചെയ്തും കുളിപ്പിച്ചും സൂക്ഷിക്കുക.(ബാര്‍ സോപ്പ്‌ ഉപയോഗിക്കരുത്‌ അത്‌ നായ്ക്കളുടെ സ്കിന്നിലെ എണ്ണമയം തീരെ ഇല്ലാതാക്കും) കുളിപ്പിക്കുമ്പോള്‍ അവയുടെ ചെവിയില്‍ വെള്ളം കയറാതിരിക്കുവാന്‍ പഞ്ഞിവെക്കുന്നത്‌ നല്ലതാണ്‌ അതുപോലെ ചെവിക്കകത്ത്‌ ചെള്ള്‌ പേന്‍ മുതലായവ ഉണ്ടോ എന്ന് പരിശോധിക്കുക.ചെള്ള്‌ പേന്‍ എന്നിവയെ ഒഴിവാക്കുവാന്‍ വേണ്ട പൗണ്ടറുകള്‍ വിപണിയില്‍ ലഭ്യമാണ്‌.ഓര്‍ക്കുക നായ്ക്കളില്‍ നിന്നും മുതിര്‍ന്നവരെക്കാള്‍ കുട്ടികള്‍ക്ക്‌ വളരെപെട്ടെന്ന് പല വിധ രോഗങ്ങള്‍ പകരാം, അതുപോലെ അവയെ കളിപ്പിക്കുമ്പോള്‍ പല്ലും നഖവും കൊണ്ടുള്ള മുറിവുകളും ഉണ്ടാകാം. മുറിവുപറ്റിയാല്‍ ഉടനെ ഡോക്ടറെകണ്ട്‌ ചികിത്സ തേടാന്‍ മറക്കാതിരിക്കുക. അത്‌ റാബീസ്‌ വാക്സിന്‍ നല്‍കിയ നായ്ക്കളില്‍ നിന്നായാലും.


കൂട്‌: വീടു നിര്‍മ്മിക്കുന്ന വേളയില്‍ തന്നെ സ്ഥാനം നിശ്ചയിക്കുകയും അതിനനുസരിച്ച്‌ നായ്കൂട്‌ ക്രമീകരിക്കുക.ഗേറ്റും ഫ്രണ്ട്‌ ഡോറും നായക്കള്‍ക്ക്‌ കാണാന്‍ സാധിക്കുന്ന വിധത്തില്‍ ആയിരുന്നാല്‍ കൂടുതല്‍ നല്ലത്‌.വളര്‍ത്തുവാന്‍ ഉദ്ദേശിക്കുന്ന ഇനം അനുസരിച്ച്‌ വലിപ്പം കൂടിനുണ്ടായിരിക്കണം.ഒന്നിലധികം എണ്ണത്തെ വളര്‍ത്തുവാന്‍ ഉദ്ദേശ്യം ഉണ്ടെങ്കില്‍ തുറക്കാവുന്ന രീതിയില്‍ കള്ളികള്‍ തിരിക്കുന്നതും നല്ലതാണ്‌. കൂടിനു ചുരുങ്ങിയത്‌ അഞ്ചടിയെങ്കിലും പൊക്കം ഉണ്ടായിരിക്കണം.കൂടു കഴുകുമ്പോള്‍ ഉണ്ടാകുന്ന വെള്ളവും നായയുടെ മൂത്രവും ഒഴുകിപ്പോകുവാന്‍ ആവശ്യത്തിനു സ്ലോപ്പ്‌ നല്‍കിയിരിക്കണം നല്‍കിയിരിക്കണം. നാചുറല്‍ സ്റ്റോണുകള്‍ കൊണ്ട്‌ ഫ്ലോറിങ്ങ്‌ നടത്തുന്നത്‌ നന്നായിരിക്കും.


പ്രചനനം: നായ്‌വളര്‍ത്തല്‍ ഒരു നല്ല വരുമാന മാര്‍ഗ്ഗം കൂടിയാണ്‌.വളര്‍ത്തി പ്രജനനം ചെയ്യീച്ച്‌ വില്‍ക്കുവാന്‍ ഉദ്ദേശിക്കുന്നവര്‍ വിപണിയില്‍ കൂടുതല്‍ ആവശ്യക്കാരുള്ള വിഭാഗത്തില്‍ പെട്ട നായ്ക്കളെ വേണം തിരഞ്ഞെടുക്കുവാന്‍.ജര്‍മ്മന്‍ ഷെപ്പേര്‍ഡ്‌,ഡാഷ്‌ ഹൂണ്ട്‌, ഡോബര്‍മാന്‍ തുടങ്ങിയവക്ക്‌ എല്ലാകാലത്തും ആവശ്യക്കാര്‍ ഉണ്ട്‌.പെഡിഗ്രി സര്‍ട്ടിഫിക്കറ്റ്‌ ഉള്ള നായ്ക്കള്‍ക്ക്‌ വില കൂടുതല്‍ ലഭിക്കും.ഇനി നിങ്ങളുടെ കൈ വശം ഗുണനിലവാരമുള്ള "സ്റ്റഡ്‌ ഡോഗ്‌" ഉണ്ടെങ്കില്‍ പെണ്‍പട്ടിയുമായി മേറ്റ്‌ ചെയ്യിക്കുന്നതിനു പണമായോ പകരം നായ്‌ കുട്ടിയേയോ പ്രതിഫലമായി വാങ്ങാവുന്നതാണ്‌.മദിലക്ഷണം (പെണ്‍ പട്ടിയുടെ യോനിയില്‍ നിന്നും രക്തവും അടങ്ങിയ ശ്രവം വരും) കാട്ടുന്ന പെണ്‍പട്ടിയെ മുങ്കൂട്ടി നിശ്ചയിച്ച ആണ്‍പട്ടിയുടെ കൂട്ടിലേക്ക്‌ വിടുകയാണ്‌ പതിവ്‌. ചില പട്ടികള്‍ പരസ്പരം കടികൂടാന്‍ ഇടയുണ്ട്‌ ഇത്‌ ശ്രദ്ധിക്കണം.(കൂടാതെ ഹീറ്റായ പെണ്‍പട്ടിയുടെ സമീപം മണംപിടിച്ച്‌ എത്തുന്ന "ഭൈമീ കാമുകന്മാരെ"ശ്രദ്ധിച്ചില്ലേല്‍ സംഗതി കുഴപ്പമാകും) സാധാരണയായി 60 ദിവസമാണ്‌ ഒരു പെണ്‍പട്ടിയുടെ ഗര്‍ഭകാലം. വിവിധ ഇനങ്ങള്‍ക്കനുസരിച്ച്‌ 2 മുതല്‍ 14 വരെ കുട്ടികള്‍ ഉണ്ടാകാം. പ്രസവിച്ച ശേഷം പെണ്‍പട്ടി കുട്ടികളെ തിന്നുന്നത്‌ ശ്രദ്ധിക്കേണ്ടതുണ്ട്‌.വേണ്ടത്രപോഷകാഹാരക്കുറവാണിതിനു കാരണം എന്ന് പറയപ്പെടുന്നു. പ്രസവിച്ച പട്ടിക്ക്‌ ഗ്ലൂക്കോസ്‌ ചേര്‍ത്തവെള്ളവും ദഹിക്കുവന്‍ എളുപ്പമുള്ള ഭക്ഷണവും നല്‍കേണ്ടതുണ്ട്‌.പട്ടി പാല്‍ നല്‍കുവാന്‍ വിസ്സമ്മതിക്കുകയോ വേണ്ടത്രപാല്‍ ഇല്ലാതിരിക്കുകയോ ചെയ്താല്‍ കൃത്രിമമായി കുട്ടികളെ ഫീഡ്‌ ചെയ്യെണ്ടതുണ്ട്‌.പ്രസവിച്ചുകിടക്കുന്ന പട്ടികളുടെ അടുത്തുപോകുമ്പോള്‍ ശ്രദ്ധിക്കുക ചിലപ്പോള്‍ അവ അപകടകാരികള്‍ ആകാറുണ്ട്‌.ഡോബര്‍മാന്‍,റോട്ട്‌ വീലര്‍ തുടങ്ങിയ ചില ജാനസ്സുകളുടെ വാല്‍ മുറിച്ചുകളയാറുണ്ട്‌.പ്രസവിച്ച്‌ രണ്ടാഴ്ചകഴിഞ്ഞതിനുശേഷം രണ്ടാമത്തേയോ മൂന്നാമത്തേയോ കശേരുവില്‍ വച്ച്‌ വിദഗ്ദനായ ഒരു ഡോക്ടര്‍ക്ക്‌ അനായാസം ചെയ്യാവുന്നതാണിത്‌. ആണ്‍പട്ടിക്കും പെണ്‍പട്ടിക്കും പെഡിഗ്രി സര്‍ട്ടിഫിക്കറ്റ്‌ ഉണ്ടെങ്കില്‍ അവയുടെ കുട്ടികള്‍ക്കും പെഡിഗ്രി സര്‍ട്ടിഫിക്കറ്റ്‌ ലഭിക്കും. ഇതിനു ചില നിബന്ധനകള്‍ ഉണ്ട്‌.


ട്രെയിനിങ്ങ്‌: ട്രെയിനിങ്ങ്‌ നല്‍കിയാല്‍ വളരെയധികം കാര്യങ്ങള്‍ ചെയ്യുവാന്‍ നായ്ക്കള്‍ക്കാകും.മണംപിടിക്കുന്നതിനുള്ള ഇവയുടെ കഴിവ്‌ ഒന്നു വേറെ തന്നെയാണ്‌. വളര്‍ത്തുനായക്കള്‍ക്ക്‌ അടിസ്ഥാനപരമായ കാര്യങ്ങളില്‍ ട്രെയിനിങ്ങ്‌ നല്‍കുന്നത്‌ നല്ലതാണ്‌. സാധാരണയായി ഇരിക്കുവാനും കുരനിര്‍ത്തുവാനും വിളിച്ചാല്‍ നമ്മുടെ അടുത്തേക്ക്‌ വരുവാനും ചില പ്രത്യേക സ്ഥലത്ത്‌ മാത്രം വിസര്‍ജ്ജനം നടത്തുക തുടങ്ങിയ കാര്യങ്ങളില്‍ ട്രെയിനിങ്ങ്‌ ഉടമക്ക്‌ തന്നെ നല്‍കാവുന്നതാണ്‌.അപരിചിതരില്‍ നിന്നും ഭക്ഷണം സ്വീകരിക്കുവാതിരിക്കാന്‍ ഇവയെ പരിശീലിപ്പിക്കുക.പരിശീലനത്തിനായി ഇന്ന് പ്രൊഫഷണല്‍ ഡോഗ്‌ ട്രെയിനര്‍ മാരെ ലഭ്യമാണ്‌.കൂടാതെ ഇതിനായി സ്കൂളുകളും ഉള്ളതായി അറിയുന്നു.


ഒരിക്കല്‍ കൂടെ ഓര്‍ക്കാന്‍:

* മറ്റുള്ളവര്‍ വളര്‍ത്തി വലുതാക്കിയ നായ്ക്കളെ വാങ്ങാതിരിക്കുക.അതുപോലെ മറ്റുള്ളവരെക്കൊണ്ട്‌ നിങ്ങളുടെ നായ്ക്കളെ ലാളിക്കുവാന്‍ അനുവധിക്കാതിരിക്കുക.

* ബൗണ്ടറിയില്ലാത്തിടത്ത്‌ നായ്ക്കളെ അഴിച്ചിട്ടു വളര്‍ത്താതിരിക്കുക.

* പ്രചനനത്തിനായി നായ്ക്കളെ "മേറ്റ്‌" ചെയ്യീക്കുമ്പോള്‍ അവ രോഗാവസ്ഥയില്‍ അല്ലെന്ന് ഉറപ്പുവരുത്തുക.

* ഒരുപ്രസവത്തില്‍ കൂടുതല്‍ കുട്ടികള്‍ ഉള്ള പട്ടികളുടെ കുട്ടികളെ ഒഴിവാക്കുക.

* പരിചയക്കാരില്‍ നിന്നും മാത്രം നായക്കുട്ടികളെ വാങ്ങുവാന്‍ ശ്രദ്ധിക്കുക.

* അസുഖമുള്ളതോ കാഴ്ചക്കുറവ്‌ കേള്‍വിക്കുറവ്‌ നടക്കാന്‍ ബുദ്ധിമുട്ട്‌ എന്നിവയുള്ള നായ്കുട്ടികളെ ഒഴിവാക്കുക.

* വളര്‍ന്നുവരുമ്പോള്‍ നിയന്ത്രിക്കുവാന്‍ കഴിയുന്നില്ലെങ്കില്‍ അത്തരം നായ്ക്കളെ ഒഴിവാക്കുക.* നായ്ക്കളില്‍ നിന്നും കുട്ടികളെ അകത്തിനിര്‍ത്തുക.

* സമയാസമയങ്ങളില്‍ മരുന്നുകളും കുത്തിവെപ്പുകളും നല്‍കുക, നായക്ക്‌ വേണ്ടത്ര പരിചരണവും പരിഗണനയും നല്‍കുവാന്‍ കഴിയാത്തവര്‍ ദയവുചെയ്ത്‌ അവയെ വളര്‍ത്താതിരിക്കുക.

* അനാവശ്യമായി അവയെ ഉപദ്രവിക്കരുത്‌. ട്രെയിനിങ്ങിനു നല്ല ക്ഷമ വേണം.(അതു മനുഷ്യനല്ല നായയാണെന്ന ബോധത്തോടെ പെരുമാറുക)

* ഭക്ഷണം വെള്ളം വ്യായാമം എന്നിവ കൃത്യമായി നല്‍കുക. ദീര്‍ഘകാലം അവയെ തുടലില്‍ ഇടാതിരിക്കുക.

* നായ്‌വളര്‍ത്തലില്‍ മുന്‍ പരിചയം ഇല്ലാത്തവരും വേണ്ടത്ര കമാന്റിങ്ങ്‌ പവര്‍ ഇല്ലാത്തവരും വംശ ശുദ്ധിയുള്ള റോട്ട്‌ വീലര്‍ വിഭാഗത്തില്‍ പെട്ടവയെ ഒഴിവാക്കുക.ഒരു മനുഷ്യനെ കടിച്ചുകൊല്ലുവാന്‍ റോട്ട്‌ വീലര്‍ വിഭാഗത്തില്‍ പെടുന്ന നായക്ക്‌ നിഷ്‌പ്രയാസം സാധിക്കും.


നായ്‌ വളര്‍ത്തലിനെകുറിച്ച്‌ വിശദീകരിക്കുന്ന നിരവധി പുസ്തകങ്ങള്‍ വിപണിയില്‍ ലഭ്യമാണ്‌.


ഇനി ഒരു അനുഭവ രഹസ്യം കൂടെ പകല്‍സമയത്ത്‌ നായയെ മറ്റുള്ളവരെ കാണിക്കാതെ വീടിനു പുറകുവശത്തോമറ്റോ ഒളിപ്പിച്ചുവളര്‍ത്തിയാല്‍ അവക്ക്‌ കൂടുതല്‍ ശൗര്യം ഉണ്ടായിരിക്കും.


വാല്‍ മൊഴി: ഈയ്യിടെ രാഷ്ടീയക്കാര്‍ തമ്മില്‍ കൊമ്പ്‌ കോര്‍ത്തപ്പോള്‍ പരസ്പരം ശ്വാനന്മാരോട്‌ ഉപമിക്കുകയുണ്ടയി. ഇക്കൂട്ടര്‍ ഒരു കാര്യം ഓര്‍ത്താല്‍ നന്ന് "നായയെ മന്ത്രിയോടും മുന്‍ മന്ത്രിയോടും ഉപമിച്ച്‌ അവഹേളിക്കരുത്‌. നായ്ക്കള്‍ മനുഷ്യരേക്കാള്‍ വിശ്വസ്ഥരും നന്ദിയുള്ളവരുമാണ്‌!"

Tuesday, May 22, 2007

തുറന്ന മനസ്സുള്ള ഒരു വീട്‌






"തുറന്ന മനസ്സുള്ള ഒരു വീട്‌" തന്റെ വീടിനെക്കുറിച്ച്‌ അനസ്തേഷ്യാ വിദഗ്ദനായ ഡോക്ടര്‍ ജോയിയുടെ ഒറ്റവാക്കിലുള്ള മറുപടി.

"കുടുമ്പാംഗങ്ങളായാലും അദിഥികളായാലും ഒരിക്കലും ഈ വീട്ടില്‍ ഒറ്റപ്പെടരുത്‌.ഇന്ന് പലയിടത്തും സംഭവിക്കുന്നത്‌ മാതാപിതാക്കളും മക്കളും പേരമക്കളും എല്ലാം ഒരു കൂരക്കു കീഴിലെ "തുരുത്തുകളില്‍" ആണ്‌.കെട്ടുകാഴ്ചകള്‍ക്കും ആര്‍ഭാടങ്ങള്‍ക്കല്ല സൗകര്യങ്ങള്‍ക്കായിരിക്കണം പ്രാധാന്യം നല്‍കേണ്ടത്‌."

സ്വന്തമായി ഒരു വീടെന്ന ചിന്ത തുടങ്ങിയപ്പോള്‍ ഡോക്ടര്‍ ജോയി ആദ്യമായി ചെയ്തത്‌ തനിക്കിഷ്ടപ്പെട്ട പല വീടുകളുടേയും പ്ലാന്‍ പരിശോധിക്കുകയും അതില്‍ താമസിക്കുന്നവരുമായി ആശയവിനിമയം നടത്തുകയും ആയിരുന്നു.ഇതില്‍ നിന്നും ഓരോ വീടിന്റേയും നല്ലതും മോശമായതുമായ പല കാര്യങ്ങളും മനസ്സിലാക്കാന്‍ കഴിഞ്ഞു.. കൂടാതെ പുസ്തകങ്ങളില്‍ നിന്നും മറ്റും വിവരങ്ങള്‍ ശേഖരിക്കുകയും ചെയ്തു. തന്റെ വീടിനെക്കുറിച്ച്‌ വ്യക്തമായ ഒരു ധാരണ അദ്ദേഹത്തിനുണ്ടായിരുന്നു. അതിന്റെ അടിസ്ഥാനത്തില്‍ ആദ്യം ഒരു പ്ലാന്‍ തയ്യാറാക്കിയെങ്കിലും അനുയോജ്യമായ ഒരു സ്ഥലം ലഭിക്കാത്തതിനാല്‍ അതു മറ്റി പിന്നീട്‌ തനിക്ക്‌ ലഭിച്ച സ്ഥലത്തിനനുസൃതമാക്കി മാറ്റി.

തന്റെ ആവശ്യങ്ങളെയും ആഗ്രഹങ്ങളെയും കണക്കിലെടുത്തുകൊണ്ട്‌ സങ്കല്‍പ്പത്തിലെ വീട്‌ അദ്ദേഹം തന്നെ വരച്ചുണ്ടാക്കി."ആദ്യം ഓരോമുറികളുടെ സ്ഥാനവും അളവുകളും പിന്നീട്‌ അതിനകത്തെ ഫര്‍ണ്ണീച്ചറുകളുടെ എണ്ണം വലിപ്പം തുടങ്ങിയവയും തയ്യാറാക്കി.അല്‍പ്പം സമയം കൂടുതല്‍ എടുത്തുവെങ്കിലും എല്ലാം എന്റെ ഇഷ്ടാനുസരണം ക്രമീകരിക്കുവാന്‍ സാധിച്ചു.മറ്റൊരു കാര്യം ശ്രദ്ധിച്ചത്‌ മുറികള്‍ തമ്മില്‍ പരമാവധി ദൂരം കുറക്കാനാണ്‌"

എന്തുകൊണ്ട്‌ ഒരു ഡിസൈനറെ സമീപിച്ചില്ല എന്ന ചോദ്യത്തിന്‌."എന്റെ സങ്കല്‍പ്പത്തിലെ വീടിന്റെ പ്ലാന്‍ സ്വന്തമായിതന്നെ തയ്യാറാക്കി.പിന്നീട്‌ എനിക്ക്‌ വേണ്ടിയിരുന്നത്‌ അതിനു ഒരു എലിവേഷനും ഒരു വീടുനിര്‍മ്മിക്കുവാന്‍ ആവശ്യമായ "ടെക്നിക്കല്‍" ഉപദേശങ്ങള്‍ ആയിരുന്നു. അതിനായി ഒരു വിദഗ്ദനെ സമീപിച്ചുവെങ്കിലും തിരക്കുമൂലം അദ്ദേഹത്തില്‍ നിന്നും പ്രതീക്ഷിച്ച സഹകരണം ലഭിച്ചില്ല."തുടര്‍ന്ന് സ്വന്തമായിതന്നെ വീടിന്റെ മേല്‍നോട്ടം നിര്‍വഹിക്കുകയായിരുന്നു.

"ഒരു വിദഗ്ദന്റെ ഉപദേശമില്ലാതെ പൂര്‍ണ്ണമായും സ്വന്തമായി ഡിസൈന്‍ ചെയ്യുമ്പോള്‍ ചില പരിമിതികള്‍ ഇല്ലെ?""തീര്‍ച്ചയായും അതിന്റെ ചില പോരായമകള്‍ എലിവേഷനിലും മറ്റും കാണാം"

വീട്ടില്‍ ഓപ്പണ്‍കിച്ചന്‍ കൊടുത്തതിനെക്കുറിച്ചും ഡോക്ടര്‍ ജോയിക്ക്‌ വ്യക്തമായ അഭിപ്രായമുണ്ട്‌."ആഹാരം പാചകം ചെയ്യുന്നത്‌ ഒളിച്ചുവെച്ച്‌ ചെയ്യേണ്ട ഒരു സംഗതിയല്ല.അതില്‍ വീട്ടിലെ അംഗങ്ങള്‍ എല്ലാം പങ്കാളികളായാല്‍ അത്രയും നല്ലത്‌. ഇനി വല്ല അദിഥികളും വരികയാണെങ്കില്‍ തന്നെ അവരോട്‌ സംസാരിക്കുകയും നമുക്ക്‌ പാചകത്തില്‍ ഏര്‍പ്പെടുകയും ചെയ്യാം കൂടാതെ അടുക്കളയില്‍ തന്നെ വാഷിങ്ങ്‌ മെഷീന്‍ സ്ഥാപിച്ചിരിക്കുന്നതിനാല്‍ പാചകത്തിനിടയില്‍ തന്നെ വസ്ത്രം കഴുകലും നടത്താം." തന്റെ സ്വതസിദ്ധമായ ചിരിയോടെ അദ്ദേഹം തുടര്‍ന്നു.
"പരമാവധി ചുമരുകള്‍ കുറച്ച്‌ ധാരാളം ജനലുകള്‍ നല്‍കി ഒരു തുറന്ന അന്തരീക്ഷം സൃഷ്ടിക്കുക. കാറ്റും വെളിച്ചവും ധാരാളം വരുവാന്‍ ഇത്‌ സഹായിക്കും കൂടാതെ പ്രായമാകുമ്പോള്‍ നമ്മള്‍ ഒറ്റപ്പെടുന്ന ഒരു അവസ്ഥയുണ്ടാകാം അപ്പോള്‍ എളുപ്പത്തില്‍ ഭക്ഷണം പാചകം ചെയ്യുവാനും അവിടെതന്നെ ഇരുന്ന് കഴിക്കുവാനും ആയിരിക്കും സൗകര്യം."കിച്ചണ്‍ കൗണ്ടറുകള്‍ ഫെറാസിമന്റ്‌ സ്ലാബുകളില്‍ ആണ്‌ ചെയ്തിരിക്കുന്നത്‌.ചിലവു കുറക്കുവാന്‍ ഇത്‌ സഹായിക്കുന്നു.കിച്ചണില്‍ ഒരു ബ്രേക്ക്‌ ഫാസ്റ്റ്‌ കൗണ്ടറും ക്രമീകരിച്ചിട്ടുണ്ട്‌.

L ഷേപ്പില്‍ ഉള്ള ഒരു വരാന്ത. അതില്‍ നിന്നും ലിവിങ്ങ്‌ റൂമിലേക്ക്‌ ഒരു ഡോറും കൂടാതെ കാര്‍പ്പോര്‍ച്ചില്‍ നിന്നും ഡൈനിങ്ങിലേക്ക്‌ വരുവാന്‍ മറ്റൊരു ഡോറും കൊടുത്തിരിക്കുന്നു."ഫോര്‍മലായി സ്വീകരിക്കേണ്ട അദിഥികള്‍ക്കായി ഒരിടം." ഇതാണ്‌ ഡോക്ടര്‍ക്ക്‌ ലിവിങ്ങ്‌റൂമിനെ കുറിച്ച്‌ പറയാനുള്ളത്‌.

ടി.വിയും മ്യൂസിക്ക്‌ സിസ്റ്റവും അവിടെ തല്‍ക്കാലം സെറ്റുചെയ്യുന്നു.കോണിയുടെ അടിഭാഗം അല്‍പ്പം താഴ്ത്തി അവിടെ തുണികള്‍ തേക്കുവാനും മറ്റും ഉള്ള സൗകര്യം ഒരുക്കിയിരിക്കുന്നു.രണ്ടു ബെഡ്രൂമാണ്‌ ഈ വീടിനുള്ളത്‌.വല്ലപ്പോഴും വരുന്ന അദിഥികള്‍ക്കായി ഒരു മുറി അനാവശ്യം ആണെന്നാണ്‌ ഡൊക്ടറുടെ പക്ഷം.കിച്ചണില്‍ നിന്നും ലിവിങ്ങില്‍ നിന്നും ഡൈനിങ്ങില്‍ നിന്നുമെല്ലാം ഇവിടത്തെ ഗൈറ്റ്‌ തുറന്നു വരുന്നവരെ കാണാന്‍ പ്രയാസമില്ല.ജനലുകള്‍ അതിനനുസരിച്ചാണ്‌ ക്രമീകരിച്ചിട്ടുള്ളത്‌.

ഗാര്‍ഡനിങ്ങിനു ഒത്തിരി സാധ്യതകളുണ്ടല്ലോ അതിനെക്കുറിച്ച്‌ വല്ല സങ്കല്‍പ്പവും ഉണ്ടോ?

"നല്ല വാഴയും കുറച്ച്‌ മാവിന്തയ്യും പിന്നെ ധാരാളം പൂക്കളൂണ്ടാകുന്ന തെച്ചിയും ചെമ്പരത്തിയും മറ്റും വെക്കണം."

ഇന്നത്തെ രീതികളില്‍ നിന്നും തികച്ചും വ്യത്യസ്ഥമാണല്ലോ ഇതെന്ന ചോദ്യത്തിനു

"ഞാന്‍ വളര്‍ന്ന ചുറ്റുപാടുകളുടെ ഓര്‍മ്മകള്‍ ഇവിടെ ഉണ്ടാകണം. പൂര്‍ണ്ണമായില്ലെങ്കിലും അല്‍പമെങ്കിലും. അതിന്റെ ഭാഗമാണ്‌ ഈപറഞ്ഞ വാഴയും മാവും ചെടികളും കൂടാതെ പുറകുവശത്തെ ഫിഷ്ടാങ്കും മറ്റും."മുകളില്‍ ഓടുവച്ചതിനെക്കുറിച്ച്‌" അതും ഈ പറഞ്ഞ ഗൃഹാതുരത്വത്തിന്റെ ഭാഗമാണ്‌, ഈ ഓടുവെക്കല്‍ പരിപാടി അല്‍പം ചിലവു വര്‍ദ്ധിപ്പിച്ചു.മാത്രമല്ല ശരിയായി ഫിറ്റുചെയ്യുവാന്‍ വിദഗ്ദരായ പണിക്കാരെ ലഭിച്ചുമില്ല. കൂടാതെ വൈകുന്നേരങ്ങളില്‍ ഇരിക്കുവാന്‍ ടെറസ്സിലൊരു ഗാര്‍ഡന്‍ ചെയ്യുവാനും ആലോചനയുണ്ട്‌."

കാര്‍പോര്‍ച്ചടക്കം ഏകദേശം 1850 ചതുരശ്ര അടിവരുന്ന ഈ വീടിന്റെ മൊത്തം ചിലവിനെക്കുറിച്ച്‌"ഇപ്പോ അതു കണക്കുകൂട്ടിയിട്ടില്ല.പണിയെല്ലാം പൂര്‍ത്തിയാകട്ടെ എന്നിട്ട്‌ നോക്കാം.പലപ്പോഴും പണിക്കാരുടെ കൃത്യനിഷ്ടയില്ലായ്മയും അറിവില്ലായ്മയും ചിലവു വര്‍ദ്ധിപ്പിക്കുവാന്‍ ഇടയാക്കിയിട്ടുണ്ട്‌."

Friday, May 18, 2007

പ്ലാന്‍ -10






രണ്ടുനിലകളിലായി GF 1395+ FF 795= 2190 ചതുരശ്ര അടി(203.53 മീറ്റര്‍ സ്ക്വയര്‍) വിസ്തീര്‍ണ്ണമുള്ള വീടിന്റെ പ്ലാന്‍.പ്രധാന വാതില്‍ കിഴക്കോട്ടു തുറക്കുന്ന ഈ വീടിന്റെ വടക്കു കിഴക്ക്‌ മൂലയില്‍ അടുക്കള കൊടുത്തിരിക്കുന്നു. ഇതിന്റെ മാത്രം അളവ്‌ വാസ്തു പ്രകാരം ആണ്‌. വാഷിങ്ങ്‌ മെഷീന്‌ അടുക്കളയില്‍ തന്നെ ഇടം കണ്ടെത്തിയിരിക്കുന്നു. ഇത്‌ സ്ത്രീകള്‍ക്ക്‌ അടുക്കളയിലെ ജോലികള്‍ക്കിടയില്‍ തന്നെ തുണികഴുകലും നടത്തുവാന്‍ സഹായകമാണ്‌.കിച്ചണിലെ വിന്റോകള്‍ വര്‍ക്കിങ്ങ്‌ സ്ലാബില്‍ നിന്നും 30-40 സെന്റീമീറ്റര്‍ ഉയരത്തില്‍കൊടുക്കേണ്ടതാണ്‌.




സ്റ്റെയര്‍ കേസില്‍ വലിയ ജനലുകള്‍ നല്‍കിയാല്‍ ഡൈനിംഗ്‌ റൂമിലേക്കും മുകളിലെ ഫാമിലി ലിവിങ്ങിലേക്കും ധാരാളം വെളിച്ചവും വായുവും ലഭിക്കുവാന്‍ സഹായകമാണ്‌.മുകള്‍ നിലയില്‍ ഒരു കോമ്മണ്‍ ടോയ്‌ലറ്റ്‌ മാത്രമേ ഉള്ളൂ.(ഏകദേശം 50000 രൂപയോളമാണ്‌ ഒരു റ്റോയ്‌ലറ്റിന്റെ നിര്‍മ്മാണ ചിലവ്‌.)ഇനി മുകളില്‍ ഒരു അറ്റാച്ഡും കോമ്മണും ആയി നല്‍കുവാന്‍ മുകളില്‍ കൊടുത്തിട്ടുള്ള ടോയ്‌ലറ്റിന്റെ നീളം അല്‍പ്പ്ം കൂടെ നീട്ടിയെടുത്ത്‌ രണ്ടായി ഭാഗിച്ചാല്‍ മതിയാകും. താഴത്തെ ടൊയ്‌ലറ്റുകള്‍ ഫ്ലോര്‍ ലെവലില്‍ നിന്നും 10 സെന്റീ മീറ്റര്‍ താഴ്ത്തിക്കൊടുത്താല്‍ കൂടുതല്‍ നന്ന്.




മുകള്‍ നിലയില്‍ മുന്‍ വശത്തെ ബെഡ്രൂമിനു പകരം താഴത്തെ ബെഡ്രൂം No-1 നുമുകളില്‍ ബെഡ്രൂം പണിയാവുന്നതാണ്‌.ഇനിയഥവാ മുകളില്‍ ഒരു ബെഡ്രൂം മാത്രമേ എടുക്കുന്നുള്ളൂ എങ്കില്‍ രണ്ടായിരം ചതുരശ്ര അടിയില്‍ താഴയേ ഈ വീടിനു വലിപ്പം വരൂ.ചിലവിനെകുറിച്ചാണെങ്കില്‍ ചതുരശ്ര അടിക്ക്‌ ശരാശരി 600-650 ഉം അതിനു മുകളിലുമാണ്‌ വരുന്നത്‌. ഉപയോഗിക്കുന്ന മെറ്റീരിയല്‍സിനനുസരിച്ച്‌ ഇതില്‍ വ്യത്യാസം വരാം.

Wednesday, May 16, 2007

വാസ്തു:-പൂജാ മുറി

ആധുനിക ജീവിത രീതി നമുക്ക്‌ നല്‍കിയ ദൂഷ്യങ്ങളില്‍ ഒന്നാണ്‌ ടെന്‍ഷന്‍. നിഴലുപോലെ അതു നമ്മെ പിന്തുടരുന്നു. ടെന്‍ഷനില്‍ നിന്നും രക്ഷപ്രാപിക്കുവാന്‍ പലരും പൂജയിലും പ്രാര്‍ത്ഥനയിലും മെഡിറ്റേഷനിലും ഒക്കെ അഭയം പ്രാപിക്കുന്നു. പ്രാര്‍ത്ഥനക്കും മെഡിറ്റേഷനും അതിന്റേതായ ഗുണങ്ങളും ഉണ്ടുതാനും. ഇതോടൊപ്പം യോഗപോലുള്ള ശരീരത്തിനും മനസ്സിനും ഗുണംചെയ്യുന്ന ചര്യകള്‍ കൂടെപതിവാക്കിയാല്‍ മാനസീകവും ശാരീരികവുമായ ഒത്തിരി അസ്വസ്ഥതകളെ അകറ്റാം.

പണ്ട്‌ പഴയ തറവാടുകളില്‍ കെടാവിളക്ക്‌ സൂക്ഷിക്കുന്ന പൂജാമുറികളും മറ്റും ഉണ്ടായിരുന്നു. ഒന്നുകില്‍ വീടിനകത്തോ അല്ലെങ്കില്‍ വീടിനോടുചേര്‍ന്നോ കുലദേവതകളെ കുടിയിരുത്തുന്ന പതിവുണ്ടായിരുന്നു.അതുപോലെ തന്നെ നാഗങ്ങളെ പ്രതിഷ്ടിച്ച കാവുകളും അതിനോടു ചെര്‍ന്നുള്ള കുളങ്ങളും. കാവുകള്‍ യദാര്‍ത്ഥത്തില്‍ ഓരോ പ്രദേശത്തിന്റേയും ശ്വാസകോശങ്ങളായിരുന്നു.വൈവിധ്യമാര്‍ന്ന ജൈവസമ്പത്തിന്റെ ഒരു ശേഖരമായിരുന്നു ഓരോ കാവുകളും.ഒരുപക്ഷെ അവ നശിച്ചുപോകാതെ നിലനിര്‍ത്തുവാന്‍ വേണ്ടിയാകാം കാവില്‍ നാഗത്താന്മാരുണ്ടെന്നും അവരെ ശല്യപ്പെടുത്തിയാല്‍ ശാപം കിട്ടുമെന്നും അല്ലെങ്കില്‍ അവിടെയുള്ള മരത്തില്‍ യക്ഷിയുണ്ടെന്നും മറ്റും കഥകള്‍ പ്രചരിപ്പിച്ചിരുന്നത്‌. എന്നാല്‍ ഇന്നുകാവുകള്‍ വെട്ടിവെളുപ്പിച്ച്‌ കെട്ടിട നിര്‍മ്മാണം നടത്തുന്നു.വെട്ടുകല്ലും കുമ്മയവും കൊണ്ട്‌ പണിത്‌ ഓടുമേഞ്ഞ ക്ഷേത്രങ്ങള്‍ പുനരുദ്ധാരണത്തിന്റെ പേരില്‍ പൊളിച്ചടുക്കുന്നു. ഇവയെല്ലാം ഒരു സംസ്കൃതിയുടെ ഭാഗമാണെന്ന് നാം മറന്നുപോകുന്നു. അവയെ അതുപോലെ സംരക്ഷിക്കുവാന്‍ നാം എന്തുകൊണ്ട്‌ മിനക്കെടുന്നില്ല?

ഇന്നും മിക്കവീടുകളോടു ചേര്‍ന്ന് ഒരു പൂജാ മുറി നല്‍കുന്ന പതിവുണ്ട്‌. വളരെ ചെറിയ ഒരു മുറി ആയിരിക്കും അത്‌ സ്വാഭാവികമായും അതില്‍ യോഗക്കുള്ള സ്ഥലം കണ്ടെത്തുക പ്രയാസം. (പൂജയോടൊപ്പം യോഗയും ഒരു മുറിയില്‍ ചെയ്യുക എന്നത്‌ പലര്‍ക്കും ഇഷ്ടപ്പെടാന്‍ വഴിയില്ല.)ഹൈന്ദവ വിശ്വാസങ്ങള്‍ പിന്തുടരുന്നവരെ സംബന്ധിച്ചേടത്തോളം ദൈവങ്ങളുടെ ബിംബങ്ങളോ ചിത്രങ്ങളോ വെച്ച്‌ അതിനു മുമ്പില്‍ രാവിലേയും വൈകീട്ടും വിളക്കുവെക്കുന്നതുമാണ്‌ രീതി.പൂജ ചെയ്യുവാനുള്ള മുറി വാസ്തു പ്രകാരം നിര്‍ദ്ദേശിക്കപ്പെട്ടിട്ടുള്ളത്‌ കിഴക്കു ഭാഗത്തോ പടിഞ്ഞാറുഭാഗത്തോ ആണ്‌ കിഴക്കിന്റെ മധ്യഭാഗത്തായാല്‍ കൂടുതല്‍ നന്ന്.തെക്കും വടക്കും തെക്കുകിഴക്കും വടക്കുപടിഞ്ഞാറും ഒഴിവാക്കണം. ഇതിന്റെ വാതിലുകള്‍ കിഴക്കോട്ടോ പടിഞ്ഞാട്ടോ തുറക്കുന്നരീതിയില്‍ ആയിരിക്കണം (വാതിലുകളില്‍ നടുഭാഗത്തായി അഴികള്‍ പിടിപ്പിച്ചാല്‍ കൂടുതല്‍ മനോഹരമായിരിക്കുകയും അതിനകത്തു കത്തിക്കുന്ന സുഗന്ധദ്രവങ്ങളുടെ ഗന്ധം വീടിനകത്ത്‌ നിറയുകയും ചെയ്യും). മാത്രമല്ല അതിനകത്തുവെക്കുന്ന രൂപങ്ങള്‍ പടിഞ്ഞാട്ടോ കിഴക്കോട്ടോ ദര്‍ശനമാകുന്ന വിധത്തില്‍ ആയിരിക്കുകയും വേണം.പൂജാമുറിക്ക്‌ കൃത്യമായ വെന്റിലേഷന്‍ നല്‍കുകയും ദീപങ്ങളില്‍ നിന്നും വീടിനകത്ത്‌ തീപടരാതിരിക്കുവാന്‍ ശ്രദ്ധിക്കുകയും വേണം. വീടുകളില്‍ സൗമ്യമൂര്‍ത്തികളുടെ രൂപങ്ങള്‍ വെച്ച്‌ ആരാധിക്കുന്നതായിരിക്കും കൂടുതല്‍ അഭികാമ്യം.

മരിച്ചുപോയവരുടെ ചിത്രങ്ങള്‍ പൂജാമുറിയിലോ ദൈവങ്ങളുടെ രൂപങ്ങളോടുകൂടിയോ വെക്കുകയോ പൂജിക്കുകയോ അരുത്‌.സ്ത്രീകള്‍ രജസ്വലയായിരിക്കുന്നസമയത്തും പ്രസവം മരണം തുടങ്ങിയവയുമായി അനുബന്ധിച്ചുണ്ടാകുന്ന പുലയിലും വാലായ്മയിലും പൂജാമുറിയില്‍ കയറുവാന്‍ പാടില്ല.മത്സ്യമാംസാദികള്‍ പൂജാമുറിയില്‍ നിന്നും അകറ്റിനിര്‍ത്തുക. കുളിക്കാതെയും മദ്യപിച്ചും പൂജചെയ്യുവാന്‍ പാടില്ല.കിടപ്പുമുറിക്കുള്ളിലോ,ടോയ്‌ലറ്റുകളോടുചേര്‍ന്നോ,കോണിക്കടിയിലോ പൂജാമുറിപാടില്ല.(ഇതില്‍ കോണിക്കടിയില്‍ പൂജാമുറി ആകാം എന്നാണ്‌ വാസ്തുപണ്ഡിതനായ ശ്രീ കാണിപ്പയ്യൂര്‍ കൃഷ്ണന്‍ നമ്പൂതിരിപ്പാടിന്റെ വാസ്തുലക്ഷണം എന്ന ഗ്രന്ധത്തില്‍ കാണുന്നത്‌)

Wednesday, May 02, 2007

വാസ്തു വിനായാകുമ്പോള്‍-2

വാസ്തുശാസ്ത്രപ്രകാരം ഇന്നിന്ന അളവുകളില്‍ വസ്തുവിന്റെ ഇന്നിന്ന സ്ഥാനങ്ങളില്‍ ഗൃഹം വെക്കണം എന്ന് നിഷ്ക്കര്‍ഷിക്കുന്നുണ്ട്‌. ഗൃഹത്തിനു മാത്രമല്ല അതിനോടനുബന്ധിച്ചുവരുന്ന കിണര്‍ ഔട്ട്‌ഹൗസ്‌ തൊഴുത്ത്‌ തുടങ്ങിമറ്റു നിര്‍മ്മാണങ്ങള്‍ക്കും ഇതു ബാധകമാണ്‌.ഹിന്ദു മതവിശ്വാസികളില്‍ ഭൂരിപക്ഷവും മറ്റുള്ളവരില്‍ ഒരു ചെറുന്യൂനപക്ഷവും ഇതു പിന്തുടരുന്നുമുണ്ട്‌.കഴിഞ്ഞ പോസ്റ്റില്‍ സൂചിപ്പിച്ചപോലെ 90 കളുടെ അവസാനത്തിലും 2000 ത്തിന്റെ ആദ്യകാലഘട്ടത്തിലുമാണ്‌ അത്രയൊന്നും ഗൗരവമായി കണക്കാക്കതിരുന്ന വാസ്തുശാസ്ത്രം പെട്ടെന്ന് വന്‍ പ്രചാരം നേടിയത്‌.വാരികകളിലും ചാനലുകളിലും ഇതു സംബന്ധിച്ച്‌ ചര്‍ച്ചകളും മറ്റും ധാരാളം വരികയും ഉണ്ടായി.ഇതിന്റെ ഭാഗമായി കൂടുതല്‍ ആളുകള്‍ ഇതിലേക്ക്‌ ആകര്‍ഷിക്കപ്പെടുകയും ഇതിനെ പിന്തുടരുവാന്‍ ശ്രമിക്കുകയും ചെയ്തു.ഇവിടെയുള്ള വാസ്തു പോരാഞ്ഞ്‌ ചൈനീസ്‌ വാസ്തുവായ ഫെങ്ങ്‌ ഷ്വേയും എത്തി. ധനം അകര്‍ഷിക്കുവാന്‍,കച്ചവടം അഭിവൃദ്ധിപ്പെടുവാന്‍, വിദ്യാലാഭത്തിനു തുടങ്ങി പല കാര്യങ്ങള്‍ക്കായി പലതരം പ്രതിമകളെയും വെള്ളച്ചാട്ടങ്ങളെയും വീടിനകത്തും പുറത്തുമായി സ്ഥാപിക്കുന്ന രീതിയാണതില്‍.കൂടാതെ ഭാഗ്യം കൊണ്ടുവരുന്ന "ലക്കി ഫിഷു"കളെ അക്വാറിയത്തില്‍ വളര്‍ത്തല്‍ "ലക്കിബാംബൂ" തുടങ്ങിയ സംഭവങ്ങളും ഉണ്ട്‌.

എന്നാല്‍ ഇതൊന്നും നോക്കാതെ അല്ലെങ്കില്‍ പിന്തുടരാതെ ഗൃഹനിര്‍മ്മാണം നടത്തുകയും അവയില്‍ താമസിക്കുകയും ചെയ്യുന്ന വലിയ ഒരു വിഭാഗവും നമുക്കിടയില്‍ ഉണ്ട്‌.ഉദാഹരണമായി കേരളത്തിലെ ഇന്നത്തെ ഒരു അവസ്ഥനോക്കിയാല്‍ മുസ്ലീംങ്ങള്‍ സാമ്പത്തികമായും ക്രിസ്ത്യാനികള്‍ വിദ്യാഭ്യാസപരമായും സാമ്പത്തികമായും മുന്‍പന്തിയിലാണ്‌.ഇവരില്‍ ഭൂരിഭാഗവും പ്രൊഫഷണലുകളോ കച്ചവടക്കാരോ ആണെന്നതു മറ്റൊരുകാര്യം.കേരളത്തില്‍ നിലവിലുള്ളതും പുതുതായി നിര്‍മ്മിക്കപ്പെടുന്നതുമായ ആടംഭര ഗൃഹങ്ങളില്‍ 80 ശതമാനവും ഈ വിഭാഗത്തിന്റേതാണുതാനും. അവര്‍ക്കിടയില്‍ ധനാഡ്യരും പ്രശസ്ത്രരും വിദ്യാഭ്യാസപരമായി ഉയര്‍ച്ചയില്‍ നില്‍ക്കുന്നവരും എല്ലാം ഉണ്ട്‌. വാസ്തു സംബന്ധമായി പറയുന്ന കാര്യങ്ങള്‍ ശരിയാണെങ്കില്‍ എന്തുകൊണ്ട്‌ ഇത്തരക്കാര്‍ക്ക്‌ ജീവിതത്തില്‍ ഉയര്‍ച്ചയും സന്തോഷവും ഉണ്ടാകുന്നു?ഇതോടൊപ്പം ചേര്‍ത്തുവായിക്കേണ്ട മറ്റൊരുകാര്യം വാസ്തു കണക്കുകളും നിയമങ്ങളും ഒന്നും ബധകമല്ലാതിരുന്ന ഓലകൊണ്ട്‌ മേഞ്ഞ വീടുകളില്‍ ജീവിച്ചിരുന്നവര്‍ ഇന്ന് ജീവിതത്തിന്റെ ഉയര്‍ച്ചകളില്‍ എത്തിച്ചേര്‍ന്നിരിക്കുന്നു പക്ഷെ ഇതു മുഴുവന്‍ പിന്തുടര്‍ന്നു നിര്‍മ്മിച്ച പല ഇല്ലങ്ങളും ക്ഷയിച്ചുപോകുകയും ചെയ്തു.

വാസ്തുവിദഗ്ദന്മാരും ആര്‍ക്കിടെക്റ്റുകളും എഞ്ചിനീയര്‍മാരും ഗൗരവമായി ഈ വിഷയത്തെ സമീപിക്കേണ്ടതുണ്ട്‌.വാസ്തു വേണമോ വേണ്ടയോ എന്നതിലപ്പുറം അതിനു പിന്നിലെ വസ്തുതകളും ശാസ്ത്രീയമായ അടിസ്ഥാനങ്ങളും ആണ്‌ പഠനവിധേയമാക്കേണ്ടത്‌.(കൂടാതെ വാസ്തു കണക്കുകളും നിയമങ്ങളും അനുസരിച്ചല്ലാതെയും കേരളത്തില്‍ നിരവധി നിര്‍മ്മാണങ്ങള്‍ നിലവില്‍ ഉണ്ട്‌.അവയില്‍ താമസിക്കുന്നവര്‍ക്ക്‌ എന്തെങ്കിലും പ്രശ്നമുണ്ടോ വാസ്തു അനുസാസിക്കുന്ന നിബന്ധനകള്‍ പാലിച്ച്‌ നിര്‍മ്മിച്ച ഗൃഹങ്ങളില്‍ വസിക്കുന്നവര്‍ സംതൃപ്തരാണോ? തുടങ്ങിയ കാര്യങ്ങളും പരിഗണിക്കണം.) അതില്‍ നമുക്ക്‌ പ്രയോജനപ്രദമായതും ഇന്നത്തെ സാഹചര്യങ്ങളില്‍ നടപ്പിലാക്കാവുന്നതുമായ കാര്യങ്ങളെ സ്വീകരിക്കുകയും ആവാം.ഇന്നു കേരളത്തില്‍ തന്നെ പലദേശത്തും പലരീതിയില്‍ ആണു വാസ്തു നിയമങ്ങള്‍. ഇതു മാറ്റി ഒരു ഏകീകൃത മാനം നല്‍കുവാന്‍ കഴിയണം. ഇന്നത്തെ രീതിയില്‍ വാസ്തുവിനെ കേവലം വിശ്വാസത്തിന്റെ പേരില്‍ ദുരുപയോഗപ്പെടുത്തുന്നത്‌ തടയിടുക തന്നെവേണം.കുടുമ്പത്തില്‍ എന്തെങ്കിലും അനിഷ്ടങ്ങളോ ദുരിതങ്ങളോ ഉണ്ടായാല്‍ അതിനു വാസ്തുദോഷമാണെന്ന നിഗമനത്തിലെത്തുകയും പരിഹാരത്തിനായി വന്‍ തുകചിലവിട്ട്‌ പൂജകളും കൂടാതെ ഗൃഹത്തിന്റെ പലഭാഗങ്ങളും പൊളിച്ചുനീക്കലുകളും കൂടിച്ചേര്‍ക്കലുകളും നടത്തുന്നത്‌ ഇന്ന് സര്‍വ്വ സാധാരണമായിരിക്കുന്നു. പല വീടുകളുടേയും ഭംഗിയും സൗകര്യവും "മുറിവാസ്തുവിദ്വാന്മാരുടെ" അഭിപ്രായങ്ങളില്‍ കുടുങ്ങി ഇല്ലാതാകുന്നു.മാത്രമല്ല ഇതിനു സാധിക്കാത്തവര്‍ വലിയ മാനസീക പീഠനങ്ങളുമായി കഴിഞ്ഞുകൂടുകയും ചെയ്യുന്നു.

ഇക്കാര്യത്തില്‍ ഗവണ്മെന്റിന്റെ ഭാഗത്തുനിന്നും ചിലതു ചെയ്യുവാന്‍ സാധിക്കും അല്ലെങ്കില്‍ ഗവണ്‍മന്റ്‌ ഇടപെടേണ്ട സംഗതികള്‍ കൂടെയുണ്ട്‌. ഗുരുവായൂര്‍ അമ്പലത്തില്‍ യേശുദാസിനെ പ്രവേശിപ്പിക്കണോ വേണ്ടയോ എന്നൊക്കെ ചര്‍ച്ച ചെയ്യുന്ന സമയം വാസ്തുവിന്റെ പേരില്‍ ജനങ്ങള്‍ ചൂഷണം ചെയ്യപ്പെടുന്നത്‌ തടയുവാനും കൃത്യമായ ഒരു മാര്‍ഗ്ഗനിര്‍ദ്ധേശം നല്‍കുവാന്‍ ചരിത്രകാരന്മാരെയും എഞ്ചിനീയര്‍മാര്‍,ശില്‍പികള്‍,വാസ്തു രംഗത്തെ വിവരം ഉള്ളവര്‍ എന്നിവരെ ഉള്‍പ്പെടുത്തിക്കൊണ്ട്‌ ( ദയവായി രാഷ്ടീയക്കാരെയും "ബുദ്ധിജീവികള്‍ അഥവാ ബുദ്ധിജന്തുക്കളെ" ഒഴിവാക്കിക്കൊണ്ട്‌)ഒരു പഠനം നടത്തുവാനും അതേകുറിച്ച്‌ ജനങ്ങളില്‍ വേണ്ടത്ര അവഗാഹം ഉണ്ടാക്കുവാനും ആണ്‌ ശ്രമിക്കേണ്ടത്‌. കേരളത്തില്‍ ഇന്നു വന്‍ തോതില്‍ നിര്‍മ്മാണപ്രവര്‍ത്തനങ്ങള്‍ നടന്നുകൊണ്ടിരിക്കുന്ന സമയമാണ്‌ അതുകൊണ്ടുതന്നെ ഇതിന്റെ ഗൗരവം വര്‍ദ്ധിക്കുകയും ചെയ്യുന്നു.

വാല്‍മൊഴി:-വാസ്തു ദോഷം തീര്‍ക്കുവാന്‍ പഞ്ചശിരസ്സ്‌ സ്ഥാപിച്ചാല്‍ മതിയെന്ന് ഒരു കൂട്ടര്‍ പറയുന്നു. അങ്ങിനെയെങ്കില്‍ വാസ്തു നോക്കാതെ തന്നെ വീടു നിര്‍മ്മിക്കുകയും പിന്നീട്‌ പഞ്ചശിരസ്സ്‌ സ്ഥാപിക്കുകയും ചെയ്താല്‍ മതിയില്ലെ?

പ്ലാന്‍: 9


ഗവണ്മെന്റും ചില സന്നദ്ധ സംഘടനകളും ഒക്കെ ചെറിയ വീടുകള്‍ നിര്‍മ്മിച്ചുനല്‍കുകയോ ധനസഹായം നല്‍കുകയോ ചെയ്യുന്ന സമയമാണല്ലോ. കുറഞ്ഞ സാമ്പത്തിക സ്ഥൈതിയില്‍ ഉള്ളവര്‍ക്കായി ഉപയോഗിക്കാവുന്ന ഒരു വീടിന്റെ പ്ലാന്‍ ആണിവിടെ ചെര്‍ത്തിരിക്കുന്നത്‌.


504 ചതുരശ്ര അടി വിസ്ത്രീര്‍ണ്ണമുള്ള ഈ വീടിന്റെ ഏകദേശ നിര്‍മ്മാണചിലവ്‌ 2 മുത ല്‍2.35 ലക്ഷം രൂപയാണ്‌.ചതുപ്പോ നിലം നികത്തിയതോ അല്ലാത്ത ഉറപ്പുള്ള ഭൂമിയാണെങ്കില്‍ അവിടെ പ്ലിന്ത്‌ ബീം അഥവാ "ബെല്‍റ്റ്‌" നല്‍കേണ്ടതില്ല. ഉള്ളിലെ ചുമരുകള്‍ക്ക്‌ ലിന്റില്‍ നല്‍കാതെ അവ ഡോറുകള്‍ക്ക്‌ മുകളില്‍ മാത്രം നല്‍കിയാല്‍ മതി.ചുമരുകള്‍ പൊള്ളക്കെട്ട്‌ അഥവാ rat trap bond രീതിയിലും മേല്‍ക്കൂര ഇരുവശത്തേക്കും ചരിച്ച്‌ ഫില്ലര്‍സ്ലാബ്‌ അഥവാ ഓട്‌ വെച്ച്‌ വാര്‍ക്കുന്ന രീതിയിലും ചെയ്താല്‍ (അതേകുറിച്ച്‌ പിന്നീട്‌ എഴുതുന്നതാണ്‌)ചിലവ്‌ ചുരുക്കാം. കൂടാതെ അകത്തെ ചൂടും കുറയും. അടുക്കളയില്‍ സ്ഥല പരിമിതിയുണ്ടെങ്കില്‍ പുറത്തെ വര്‍ക്ക്‌ ഏരിയായില്‍ പുകയില്ലാത്ത അടുപ്പ്‌ സ്ഥാപിച്ചാല്‍ മതിയാകും.ഫ്ലോറിങ്ങിനു ചിരട്ട കരിച്ച്‌ പൊടിച്ച്‌ ഉപയോഗിച്ചാല്‍ നല്ലതാണ്‌.


വാസ്തു നോക്കുന്നവര്‍ക്ക്‌ 38- കോല്‍ 8 വിരല്‍ എന്ന കണക്കിലാണിന്റെ അളവ്‌.

Friday, April 27, 2007

തൃശ്ശൂര്‍ പൂരത്തിനു ആന ഓടി,അട്ടിമറിയോ?

ഓരോ തൃശ്ശൂര്‍ക്കാരനും ഇത്തവണ പൂരപ്പറമ്പിലേക്ക്‌ എത്തിയത്‌ അല്‍പ്പം അഹങ്കാരത്തോടെ തന്നെയായിരുന്നു. ആനകളില്‍ ചിലര്‍ അല്‍പ്പം കൂടെ തലയുയര്‍ത്തിപ്പിടിച്ചതിനു പിന്നിലെ കാരണം മറ്റൊന്നും അല്ല പൂരം കലക്കാന്‍ കച്ചകെട്ടിയിറങ്ങിയവരെ പരാജയപ്പെടുത്തിയതിന്റെ അഭിമാനം കൊണ്ടുതന്നെ.എന്നാല്‍ അവരെ അലപ്പനേരത്തേക്ക്‌ നിരാശരാക്കിക്കൊണ്ട്‌ രണ്ട്‌ ആനകള്‍ ഓടി.സമീപകാലത്ത്‌ പലയിടങ്ങളിലും ആനകള്‍ ഓടാറുണ്ടെങ്കിലും തൃശ്ശൂര്‍ പൂരത്തിനു അടുത്തകാലത്തൊന്നും ആന വിരണ്ടതായി അറിവില്ല.പാറമേക്കാവു വിഭാഗം ഇലഞ്ഞിത്തറയിലും തിരുവമ്പാടി വിഭഗം വടക്കുംനാഥന്റെ പടിഞ്ഞാറേ നടക്കലുമായി മേളം പെയ്തിറങ്ങുമ്പോള്‍ ആയിരങ്ങള്‍ താളം പിടിക്കുകയും ആവേശം കൊള്ളൂകയും ചെയ്യുന്നതിനിടയിലാണ്‌ ഒരാന തെക്കോട്ട്‌ പേടിച്ചോടിയത്‌.പൊതുവെ ശാന്തസ്വഭാവക്കാരും ലക്ഷണമൊത്തവരുമായ ആനകളെ കര്‍ശനമായ നിയന്ത്രണങ്ങളോടെയും വൈദ്യപരിശോധനയുടേയും അടിസ്ഥാനത്തില്‍ മാത്രമേ പൂരത്തില്‍ പങ്കെടുപ്പിക്കാറുള്ളൂ. രാവിലെ ചെറുപൂരങ്ങള്‍ വരുമ്പോള്‍ മുതല്‍ പൂരങ്ങള്‍ക്കിടയില്‍ ഉണ്ടായിരുന്ന ഒരു ആസ്വാദകന്‍ എന്ന നിലയില്‍ പൂരപ്പറമ്പില്‍ ഒരാനയും പ്രശ്നം കാട്ടിയിരുന്നില്ല എന്ന് പറയാനാകും.

ഇത്തവണ തുടക്കം മുതല്‍ തൃശ്ശൂര്‍പൂരം കലക്കാന്‍ പലരും "തൊരപ്പന്‍" പണി(ക്ഷമിക്കുക ഞാന്‍ ഒരു പൂരക്കമ്പമുള്ള തൃശ്ശൂര്‍ക്കാരനായിപ്പോയി)നടത്തിയിരുന്നു. എന്നാല്‍ അതൊക്കെ തൃശ്ശൂരിലെ ജനങ്ങളും ദേവസ്വങ്ങളും ജനപ്രതിനിധികളും കൂട്ടായ പരിശ്രമത്തിലൂടെ അതിജീവിച്ചു. ഒടുവില്‍ മിനിഞ്ഞാന്ന് വടക്കും നാഥന്റെ ആകാശത്ത്‌ അമിട്ടുകള്‍ പൊട്ടിവിരിഞ്ഞപ്പോള്‍ ഹര്‍ഷാരവത്തോടെ തൃശ്ശൂര്‍ക്കാര്‍ തങ്ങളുടെ വിജയം ആഘാഷിച്ചു.വെടിക്കെട്ടു നിരോധിക്കുവാന്‍ കേസു സുപ്രീം കോടതിയില്‍ എത്തിയെങ്കിലും ചില നിബന്ധനകളോടെ പൂരം നടത്തുവാന്‍ അനുമതിനല്‍കി.

അതു കഴിഞ്ഞപ്പോള്‍ പകല്‍ ആനകളെ എഴുന്നള്ളിപ്പിക്കുന്നതിനെ കുറിച്ചായി തര്‍ക്കം.എന്നാല്‍ പൂരത്തിനു ആനയെ എഴുന്നള്ളിക്കുവാന്‍ ഹൈക്കോടതിയില്‍ നിന്നും അനുകൂലമായവിധി ദേവസ്വങ്ങള്‍ നേടിയെടുത്തു.അങ്ങിനെ രാവിലെ മുതല്‍ ചെറുപൂരങ്ങള്‍ വരവായി പനമുക്കുമ്പിള്ളീ, ചെമ്പൂക്കാവ്‌,നെയ്തലക്കാവ്‌,കാരമുക്ക്‌,അയ്യന്തോള്‍ കാര്‍ത്ത്യായനിക്ഷേത്രം തുടങ്ങി എട്ടു ക്ഷേത്രങ്ങളില്‍ നിന്നും ചെറുപൂരങ്ങള്‍ വന്നു വടക്കുമ്ന്നാഥന്റെ മുമ്പില്‍.വൈകീട്ട്‌ ഏതാണ്ട്‌ നാലേമുക്കാലിനാണ്‌ ആന ഓടിയത്‌. കുടമാറ്റം തുടങ്ങുന്നതിനുമുമ്പുതന്നെ തെക്കേഗോപുരനടയില്‍ ജനസമുദ്രം ആയിരുന്നു.അക്കൂട്ടത്തില്‍ ഒരു സ്ഥാനം പിടിക്കുവാന്‍ ഞാനും തെക്കോട്ടു നീങ്ങി. ഇതിനിടയില്‍ ഒരാന പാഞ്ഞുവരുന്നതുകണ്ടു കൂടെ ഒരു ക്യാമറാമാനും പാപ്പാന്മാരും.പുറത്തു രണ്ടു പേര്‍ ഇറുക്കിപ്പിടിച്ചിരിപ്പുണ്ട്‌.ആളുകളെ ഉപദ്രവിക്കുവാന്‍ മുതിരാതെ വല്ലാതെ ഭയപ്പെട്ടാണ്‌ ആന ഓടിയിരുന്നത്‌.(ആഴ്ചകള്‍ക്ക്‌ മുമ്പ്‌ ചേറ്റുവയില്‍ വിരണ്ട ആന കലിപിടിച്ച്‌ പാഞ്ഞുനടക്കുകയായിരുന്നു)ആന കുറുപ്പം റോഡുവഴി തെക്കോട്ട്‌ ഓടിയെങ്കിലും അതിനെ കൊക്കാലക്കുസമീപം വെച്ച്‌ പിടിച്ചതായി അറിയുന്നു.മറ്റൊരാന പൂരപ്പറമ്പില്‍ വട്ടം കറങ്ങി നടക്കുന്നുണ്ടയിരുന്നെങ്കിലും അതിനെയും തളച്ചു.ആളുകള്‍ ആനയെ പ്രകോപിപ്പിക്കുന്നത്‌ നിയന്ത്രിക്കുവാന്‍ കഴിയാത്തത്‌ അപകടങ്ങള്‍ വര്‍ദ്ധിപ്പിക്കും എന്നതിനു ചേറ്റുവയിലെ അനുഭവം ധാരാളമാണ്‌.ഇവിടേയും ഇതു തന്നെയാണ്‌ നടന്നിരുന്നത്‌.


ഇപ്പോള്‍ കുടമാറ്റം നടന്നുകൊണ്ടിരിക്കുന്നു.ഉത്സവത്തിന്റെ മാറ്റിനുയാതൊരു പൊലിമക്കുറവും ഇല്ലാതെ പൂര്‍വ്വാതികം നന്നായിത്തന്നെ കുടകള്‍ മാറിക്കൊണ്ടിരിക്കുന്നു.പാറേമേക്കാവ്‌ വിഭാഗത്തിന്റെ കുടകള്‍ ആണു കൂടുതല്‍ നന്നായിരിക്കുന്നത്‌.പൊതുവെ ശാന്തവും സമാധാനപരമായും നടന്നിരുന്ന ഉത്സവത്തിനിടയില്‍ പ്രകോപനം ഒന്നും ഇല്ലാതെ ആന വിരണ്ടത്‌ പൂരപ്രേമികളെ ആശങ്കയിലാക്കി.എന്തുകൊണ്ട്‌ ആന പെട്ടെന്ന് ഓടി എന്നതതിന്റെ ദൃശ്യങ്ങള്‍ കണ്ടാലെ അറിയാന്‍ കഴിയൂ.


"ഇതിലെന്തോ തരികിടയുണ്ട്‌ അല്ലാണ്ടെ ആന ഓടില്ല" ഇതു തന്നെയാണ്‌ പൂരപ്പറമ്പില്‍ ഓരോരുത്തര്‍ക്കും പറയാനുള്ളത്‌.(ക്യാമറയുമായി രാവിലെ മുതല്‍ ദൃശ്യങ്ങള്‍ പകര്‍ത്തിയിരുന്ന ചങ്ങതിയെ ആനയിടഞ്ഞതിനിടയില്‍ കൂട്ടം തെറ്റിപ്പോയി ഇല്ലേല്‍ ആ ചിത്രം കൂടെ ചേര്‍ക്കാമായിരുന്നു)

Friday, April 13, 2007

വാസ്തു വിനയാകുമ്പോള്‍-1

നമ്മുടെ പാരമ്പര്യ ഗൃഹനിര്‍മ്മാണരീതികള്‍ ഭാരതീയ പുരാണങ്ങളും വിശ്വാസങ്ങളുമായി ബന്ധപ്പെട്ടതോള്ള്‌ അല്ലെങ്കില്‍ അതില്‍ നിന്നു ഉരുത്തിരിഞ്ഞു വന്നതോ ആണ്‌.പുരാണങ്ങളില്‍ പലയിടത്തും വാസ്തുശാസ്ത്രത്തെക്കുറിച്ച്‌ പരാമര്‍ശിക്കുന്നുമുണ്ട്‌.മയനാല്‍ നിര്‍മ്മിതമായ കൊട്ടാരത്തെക്കുറിച്ച്‌ വിശദമായി മഹാഭാരതത്തില്‍ പരാമര്‍ശിക്കുന്നുണ്ട്‌. ആധുനീക കാലത്ത്‌ അതില്‍ പറയുന്ന പലകാര്യങ്ങളും നിഷ്‌പ്രയാസം നിര്‍മ്മിക്കാവുന്നതുമാണ്‌.

വാസ്തു നമ്മുടെ പല വിശ്വാസങ്ങളുമായും ആചാരങ്ങളുമായും ബന്ധപ്പെട്ടിരിക്കുന്നു.അല്ലെങ്കില്‍ അന്നുള്ളവര്‍ അന്നത്തെ ചാതുര്‍വര്‍ണ്യ വ്യവസ്ഥിതിയെ നിലനിര്‍ത്തുവാനും കെട്ടിട നിര്‍മ്മാണത്തിന്റെ കണക്കുകളെ ഏകീകരിക്കുവാനോ എളുപ്പമാക്കുവാനോ വേണ്ടി അവര്‍ ചില നിയമങ്ങളും അതിനായി ഉണ്ടാക്കി.കൊട്ടാരങ്ങള്‍ക്കും ക്ഷേത്രങ്ങള്‍ക്കും വിദ്യാലയങ്ങള്‍ക്കും ചാതുവര്‍ണ്യവ്യവസ്ഥയ്ക്കനുസൃതമായി ഓരോവിഭാഗങ്ങള്‍ക്കും വ്യത്യസ്ഥമായി വീടുകള്‍ക്കും അവര്‍ വ്യത്യസ്ഥ അളവുകളും ഡിസൈനുകളും വിഭാവനം ചെയ്തിരുന്നു.പഴയകാലത്തെ കേരളീയ നിര്‍മ്മിതികളെ കുറിച്ചുപറയുമ്പോള്‍ വാസ്തുശാസ്ത്രത്തിന്റെ നിര്‍ണ്ണായക സ്വാധീനം ഉണ്ടെന്നതില്‍ സംശയമില്ല.ഭൂരിഭാഗം കെട്ടിടങ്ങളും ഓടും മരവും കല്ലും കൊണ്ടു നിര്‍മ്മിച്ചതായിരുന്നു.അവയുടെ മരപ്പണികള്‍ താഴെവെച്ചുതന്നെ നിര്‍മ്മിക്കുന്നതിനാല്‍ തെറ്റുകള്‍ സംഭവിക്കതിരിക്കുവാന്‍ അവര്‍ ചില പൊതു കണക്കുകള്‍ അനുസരിച്ചായിരുന്നു വീടുകള്‍ നിര്‍മ്മിച്ചിരുന്നത്‌.ഇന്നിന്ന രീതിയില്‍ ഉള്ള ഗൃഹത്തിന്റെ ചുറ്റളവും ഉയരവും ഇത്രയായിരിക്കും എന്ന് ഒരു അംഗീകൃതകണക്ക്‌ തച്ചന്മാരുടെ കൈയ്യില്‍ ഉണ്ടായിരുന്നു. ഇതുപ്രകാരം ഇന്ന ഡിസൈനിലുള്ള ഇത്ര ചുറ്റളവുള്ള വീടിനു വേണ്ടുന്ന വസ്തുക്കള്‍ എത്രവേണമെന്നുകണക്കുകൂട്ടുവാനും അതിന്റെ മരപ്പണിയുടെ അളവുകള്‍ കണ്ടെത്തുവാനും വളരെ എളുപ്പമായിരുന്നു.

ആധുനിക നിര്‍മ്മാണ സങ്കേതങ്ങളുടെ വരവോടെ പഴയരീതിയിലുള്ള നിര്‍മ്മാണത്തിന്റെ ബുദ്ധിമുട്ടുകള്‍ പലതും ഒഴിവായി.കോണ്‍ക്രീറ്റ്‌ കോളങ്ങളും ബീമുകളും സര്‍വ്വസാധാരനമായതോടെ കെട്ടിടങ്ങളുടെ രൂപത്തിലും വലിപ്പത്തിലുമെല്ലാം കൂടുതല്‍ വഴക്കം വന്നു.കാലാനുസൃതമായ ഈ മാറ്റത്തെ പാരമ്പര്യവാദികള്‍ പക്ഷെ അംഗീകരിക്കുവാന്‍ കൂട്ടാക്കിയില്ലെങ്കിലും ഗൃഹനിര്‍മ്മാണത്തിലെ പല പരീക്ഷണങ്ങള്‍ക്കും പുതുതലമുറയിലെ എഞ്ചിനീയര്‍മാരും ആര്‍ക്കിടെക്റ്റുകളും തുടക്കം കുറിച്ചു.ബേക്കറേപോലുള്ളവര്‍ ഒരുപടികൂടെ കടന്നു വൃത്താകൃതിയിലും മറ്റും ഉള്ള രൂപങ്ങളിലും വീടുനിര്‍മ്മിക്കുവാന്‍ തുടങ്ങി.

കേരളത്തിന്റെ ഗൃഹനിര്‍മ്മാണചരിത്രത്തില്‍ നിര്‍ണ്ണായകമായ മാറ്റം വരുന്നത്‌ ഗള്‍ഫ്‌ പണത്തിന്റെ വരവോടെയാണ്‌.ഓടിട്ടപലവീടുകള്‍ക്കുമുമ്പിലും കോണ്‍ക്രീറ്റ്‌ മേല്‍ക്കൂരകളോടുകൂടിയ കൂട്ടിച്ചേര്‍ക്കലുകള്‍ പ്രത്യക്ഷപ്പെടുവാന്‍ തുടങ്ങി.തുടര്‍ന്ന് പൂര്‍ണ്ണമായും കോണ്‍ക്രീറ്റ്‌ വീടുകളും അതില്‍ തന്നെ ചരിഞ്ഞ മേല്‍ക്കൂരകളും വന്നു.ഇക്കാലത്ത്‌ വീടുകള്‍ക്ക്‌ ഓടുമേയല്‍ അപ്രത്യക്ഷമായിത്തുടങ്ങി.എന്നാല്‍ പിന്നീട്‌ ചരിച്ച്‌ വാര്‍ക്കുന്ന മേല്‍ക്കൂരകള്‍ക്കുമുകളില്‍ ഓടുപതിക്കുന്ന രീതി വന്നു.പഴയകാല സ്മരണകള്‍ നിലനിര്‍ത്തുന്ന രീതിയില്‍ പൂമുഖവുംചാരുപടിയും നടുമുറ്റവും ഉള്ള വീടുകളില്‍ വരെ എത്തിനില്‍ക്കുന്നു അത്‌. ഓടില്‍ നിന്നും കോണ്‍കൃീറ്റുനിര്‍മ്മിതികളിലേക്കുള്ള മാറ്റം സംഭവിക്കുന്ന കാലഘട്ടത്തില്‍ ആരും വാസ്തുവിനു കാര്യമായ പ്രസക്തിനല്‍കിയിരുന്നില്ല.പുതിയ സാങ്കേതികവിദ്യ പൂര്‍ണ്ണമായും എഞ്ചിനീയര്‍മാരുടേയും ഈരംഗത്ത്‌ സാങ്കേതികവിദ്യാഭ്യാസമുള്ളവരുടെയും നിയന്ത്രണത്തിലായിരുന്നതിനാല്‍ ഇക്കാര്യങ്ങളെ ആരും ഗൗരവമായെടുത്തില്ല.ആകൃതിയെക്കുറിച്ചുള്ള സങ്കല്‍പ്പങ്ങളില്‍ വിപ്ലവകരമായ മാറ്റം ഉണ്ടായതും ഇക്കാലത്താണ്‌. ബേക്കറുടേയും മറ്റും സ്വാധീനം കൂടെയുണ്ടായിരുന്നു ഇക്കാര്യത്തില്‍.75 മുതല്‍ 90കള്‍ വരെ കേരളീയസമൂഹം ഒരു പുരോഗമനപാതയില്‍ ആയിരുന്നു.അക്കാലത്തെ വിപ്ലവപ്രസ്ഥാനങ്ങളുടെ പ്രവര്‍ത്തനങ്ങള്‍ എല്ലാമേഘലയിലുമെന്നപോളെ നിര്‍മ്മാണമേഘലയിലും നിര്‍ണ്ണായക സ്വാധീനം ചെലുത്തി.

90കളുടെ ആരംഭത്തോടെ കേരളീയസമൂഹത്തില്‍ കൂട്ടുകുടുമ്പവ്യവസ്ഥിതി തകരുകയും അണുകുടുമ്പങ്ങള്‍ പ്രത്യക്ഷമാവുകയും ചെയ്തു.ഇത്‌ കേരളീയസമൂഹത്തിന്റെ ആത്മവിശ്വാസത്തിന്റെ തകര്‍ച്ചയുടെകൂടെ കാലഘട്ടമായി. എല്ലാവരിലും ഒരു ഒറ്റപ്പെടലിന്റേയും സുരക്ഷിതത്വമില്ലായ്മയുടെയും ഭീതിജനിപ്പിക്കുന്ന നാളുകളായിരുന്നു പിന്നീടിങ്ങോട്ട്‌.ഇക്കാര്യത്തില്‍ സാമ്പത്തികമായി ഉള്ളവനും ഇല്ലാത്തവനും ഒരുപേലെയായി.

ഇതേ കാലഘട്ടത്തില്‍ തന്നെയായിരുന്നു പുരോഗമനപ്രസ്ഥാങ്ങളുടെ തകര്‍ച്ചയും അപ്പോഴുണ്ടായ വിടവിലേക്ക്‌ ആള്‍ദൈവങ്ങളും അന്ധവിശ്വാസങ്ങളും നുഴഞ്ഞുകയറി.എങ്ങോ പൊടിപിടിച്ചുകിടന്ന ആചാരങ്ങളും വിശ്വാങ്ങളും ഓരോന്നായി പ്രത്യക്ഷപ്പെടുവാന്‍ തുടങ്ങി.ജ്യോതിഷത്തിനു പ്രശ്നപരിഹാരകര്‍മ്മങ്ങള്‍ക്കും മുമ്പത്തേക്കാള്‍ അധികം പ്രാധാന്യം വന്നു.അക്കൂട്ടത്തില്‍ നിര്‍മ്മാണമേഘലയില്‍ വാസ്തുവിനു വന്‍ പ്രചാരണം നല്‍കുവാന്‍ ചില തല്‍പ്പരകക്ഷികള്‍ മുന്നിട്ടിറങ്ങുകകൂടെ ചെയ്തതോടെ വാസ്തുനോക്കാതെ കാര്യങ്ങള്‍ നടക്കില്ലെന്നായി.പുതുതായിവെക്കുന്ന കെട്ടിടങ്ങള്‍കുമാത്രമല്ല നിലവിലുള്ള കെട്ടിടങ്ങളുടെ കണക്കുകളും പുനപരിശോധിക്കപ്പെട്ടു.വ്യക്തിപരമായുണ്ടാകുന്ന പല പ്രശ്നങ്ങള്‍ക്കും നിധാനം വീടിന്റെ അളവിലുള്ള തെറ്റുകളും വിവിധമുറികളുടെ സ്ഥാനങ്ങളുടെ അപാകതകളുമാണെന്ന് കണ്ടെത്തി.

ആധുനിക ശാസ്ത്രത്തിന്റെ ബാലപാഠം പോലുമറിയാത്ത ആശാരിമാര്‍ ലക്ഷങ്ങള്‍മുടക്കി നിര്‍മ്മിക്കുന്ന വീടുകളുടെ പ്ലാനുകള്‍ തയ്യാറാക്കുവാന്‍ തുടങ്ങി.യാതൊരു ദീര്‍ഘവീക്ഷണമോ കലാബോധമോ ഇല്ലാത്ത ഇത്തരക്കാരുടെ "ഡിസൈനുകള്‍"ക്കനുസൃതമായി നാട്ടിലെങ്ങും അസൗകര്യങ്ങളും അപാകതകളും നിറഞ്ഞ വീടുകള്‍ പ്രത്യക്ഷമായി.വാസ്തുവിന്റെ പേരില്‍ ആളുകള്‍ അതെല്ലാം സഹിച്ചു.എഞ്ചിനീയറിങ്ങ്‌ മേഘലയില്‍ ഉന്നത സാങ്കേതിക വിദ്യാഭ്യാസം ലഭിച്ചവര്‍ ഇത്തരക്കാരുടെ മുമ്പില്‍ തികച്ചും "അപ്രസക്തരായി".നാടെങ്ങും വാസ്തു വിദഗ്ദന്മാരുടെ ബോര്‍ഡുകള്‍ പ്രത്യക്ഷമായി.എഞ്ചിനീയര്‍മാരുടേയും ആര്‍ക്കിടെക്റ്റുകളുടേയും ഡിസൈനുകള്‍ സാങ്കേതികവിദ്യാഭ്യാസം അശേഷം ലഭിച്ചിട്ടില്ലാത്ത ആശാരിമാര്‍ പൊളിച്ചെഴുതി.ഓരോമുറികളുടേയും വലിപ്പത്തെക്കുറിച്ചോ അവയിലെ ഫര്‍ണീച്ചറുകള്‍ക്കും മറ്റും അനുസൃതമായി ഡിസൈന്‍ ചെയ്യുന്നതിനെക്കുറിച്ചോ സാമാന്യവിവരം പോലുമില്ലാത്ത ഇത്തരം മുറിവൈദ്യന്മാരുടെ അറിവില്ലായ്മമൂലം പലര്‍ക്കും വന്‍ സാമ്പത്തിക നഷ്ടമാണുണ്ടായിട്ടുള്ളത്‌. ഇവര്‍ പറയുന്ന "ശാസ്ത്രനിയമങ്ങള്‍" തന്നെ പലദിക്കിലും പലവിധമായി. വാസ്തുവിനെ ധനാഗമനമാര്‍ഗ്ഗമായി കണ്ടെത്തിയ ചിലര്‍ വിട്ടുവീഴ്ചകള്‍ക്കും തയ്യാറായിതുടങ്ങി.ഇന്നു പല "വാസ്തുവിദഗ്ദരും" നിര്‍മ്മാതാവിന്റെ താല്‍പര്യത്തിനനുസൃതമായി എത്രമാത്രം വഴങ്ങാമോ അത്രയും തയ്യാര്‍ എനിക്ക്‌ എന്റെ വിഹിതം കിട്ടിയാല്‍ മതി എന്ന രീതിയിലും എത്തിനില്‍ക്കുന്നു.

പ്രാചീന വാസ്തുശാസ്ത്രം വിഭാവനം ചെയ്യുന്ന രീതിയില്‍ ആധുനീക കെട്ടിടങ്ങള്‍ നിര്‍മ്മിക്കുക പ്രായോഗികമല്ല.കോര്‍ണറുകളിലേക്ക്‌ വീടിന്റെ മുഖം വരാതിരിക്കുകയും കിഴക്കുഭാഗത്തു അടുക്കള വരിക,മുറികള്‍ക്കു വേണ്ടത്ര വെന്റിലേഷന്‍ ഉണ്ടായിരിക്കുക തുടങ്ങിയ കാര്യങ്ങള്‍ നോക്കുകയും കൂടാതെ ചുറ്റളവു വാസ്തു വിഭാവനം ചെയ്യുന്ന രീതിയില്‍ ആക്കുകയും ചെയ്യുക എന്നതാണ്‌ ഒരു മനസ്സമാധാനത്തിനായി ഇന്നു പലരും ചെയ്യുന്നത്‌.ഒരു പരിധിവരെ ഇതു വലിയ കുഴപ്പം ഉണ്ടാക്കുന്നില്ല.അല്ലാതെ പൂര്‍ണ്ണമായി വാസ്തുശാസ്ത്രം വിഭാവനം ചെയ്യുന്നതോ അല്ലെങ്കില്‍ അതിന്റെ പേരില്‍ അറിയപ്പെടുന്നതുമായ നിയമങ്ങള്‍ നടപ്പിലാക്കുക പ്രായോഗികമല്ല.ഉദാഹരണമായി ഈയ്യിടെ ചില വിദ്വാന്മാര്‍ പറയുന്നുണ്ട്‌ മുകള്‍നിലയിലേക്കുള്ള സ്റ്റെയര്‍കേസ്‌ മുന്‍ വാതിലില്‍ നിന്നുനോക്കിയാല്‍ കാണരുതെന്നും ഗൃഹത്തിന്റെ നാലുമൂലകളും മുറിയരുതെന്നും. ഇതു എത്രമാത്രം പായോഗികമാണെന്നത്‌ സ്വയം ചിന്തിച്ചാല്‍ മതിയാകും.

വാസ്തുശാസ്ത്രം ഒരു കാലഘട്ടത്തിന്റെ കെട്ടിട നിര്‍മ്മാണത്തിനാവശ്യമായ രീതിയില്‍ രൂപകല്‍പ്പന ചെയ്തതാണെന്നും ആധുനിക കാലഘട്ടത്തില്‍ അതിനനുസൃതമായ മാറ്റങ്ങളോടെ പുതിയ സങ്കേതങ്ങളെ സ്വീകരിച്ച്‌ അത്‌ വിഭാവനം ചെയ്യുന്ന സൗകര്യങ്ങളെസ്വീകരിക്കുകയും ആണു വേണ്ടത്‌.പ്രാചീന സമൂഹത്തിലെ മനുഷ്യരുടെ വസ്ത്രധാരണരീതിയും ഭക്ഷണക്രമവും അല്ലല്ലോ നാം ഇന്നു പിന്തുടരുന്നത്‌.കാലാനുസൃതമായ മാറ്റങ്ങളെ സ്വീകരിക്കില്ലെന്നു ശഠിക്കുന്ന അല്ലെങ്കില്‍ വിശ്വാസങ്ങളുടേയും ആചാരങ്ങളുടേയും ചങ്ങളക്കെട്ടുകളില്‍ ബന്ധിച്ചിടുന്ന തലമുറകള്‍ ലോകപുരോഗതിക്കു ഭൂഷണമല്ല.

പാരമ്പര്യമായി ലഭിച്ച അറിവുകളെ ആധുനികമായ അറിവുകളുമായി താരതമ്യം ചെയ്തും പറ്റാവുന്ന മേഘലകളില്‍ സമന്വയിപ്പിച്ചുകൊണ്ടും മുന്നോട്ടുപോകുന്നതിനുപകരം ശിലായുഗം വിശ്വാസങ്ങളില്‍ മുറുകെപിടിക്കുന്നത്‌ ആധുനിക സമൂഹത്തിനു ഭൂഷണമല്ല.അന്ധവിശ്വാസങ്ങളുടെപേരില്‍ പൊളിച്ചുമാറ്റലുകളുംകൂട്ടിച്ചേര്‍ക്കലുകളും ഹോമങ്ങളും നടത്താതെ ശാസ്ത്രീയ സത്യങ്ങളെ അംഗീകരിക്കുക.കേരളം ഒരു നവോധാനപ്രക്രിയക്ക്‌ വിധേയമാകേണ്ട സമയം അധിക്രമിച്ചിരിക്കുന്നു.

ഓര്‍ക്കുക വേണ്ടത്ര അറിവുള്ള ഒരു നല്ല ഡിസനറുടെ വീക്ഷണവും സാദാരണ നാട്ടിന്‍പുറത്തെ ഒരു ആശാരിയുടെയും തമ്മില്‍ അജഗജാന്തരം ഉണ്ടായിരിക്കും.എപ്പോഴും ഗൃഹനിമ്മാണത്തിനൊരുങ്ങുമ്പോള്‍ ഡിസൈന്‍ ചെയ്യുവാന്‍ ഒരു വിദഗ്ദനെ തന്നെ സമീപിക്കുക.

വിഷു ആശംസകള്‍.

മേടമാസത്തിലെ പൊന്‍പുലരിയില്‍ ഓട്ടുരുളിയില്‍ കണിക്കൊന്നപ്പൂവും കണിവെള്ളരിയും പൊന്‍നാണ്യവും ഉണ്ണിക്കണ്ണന്റെ തിരുരൂപവും മറ്റും നിലവിളക്കിന്‍പ്രഭയില്‍ ശോഭിക്കുന്ന കാഴ്ച ഐശ്വര്യം നല്‍കും എന്നാണ്‌ വിശ്വാസം.കാര്‍ഷിക വൃത്തിയുമായി ബന്ധപ്പെട്ടുകിടക്കുന്ന ഈ ആഘോഷവേളയിലെങ്കിലും പ്രകൃതിയെക്കുറിച്ചും അതിനെ സംരക്ഷിക്കേണ്ടതിന്റെ അനിവാര്യതയെക്കുറിച്ചും ഓര്‍മ്മിക്കുവാന്‍ നാം തയ്യാറാകണം.

Wednesday, April 04, 2007

ലാറിബേക്കര്‍

1917 മാര്‍ച്ച്‌ രണ്ടിനു ഇംഗ്ലണ്ടിലെ ബര്‍മിങ്ന്‍ഘാമിലെ ഒരു ഇടത്തരം കുടുമ്പത്തിലായിരുന്നു ലോകപ്രശസ്ത വാസ്തുശില്‍പ്പിയായ ലാറിബെക്കറെന്ന ലോറന്‍സ്‌ വില്‍ഫ്രഡ്‌ ബേക്കറുടെ ജനനം.ആര്‍ക്കിടെക്ചറില്‍ ഉപരിപഠനം കഴിഞ്ഞ്‌ പിന്നീട്‌ അദ്ദേഹം റോയല്‍ ഇന്‍സ്റ്റിറ്റ്‌യൂട്‌ ഒഫ്‌ ആര്‍ക്കിടെചറില്‍ അംഗമായി.രണ്ടാം ലോകമഹായുദ്ധക്കാലത്ത്‌ നിര്‍ബന്ധിത സൈനീക സേവനത്തിന്റെ ഭാഗമായി അദ്ദേഹം ചൈനയില്‍ എത്തി.യുദ്ധത്തില്‍ മുറിവേറ്റവരെ പരിചരിക്കുന്ന സംഘത്തിലെ അംഗമായി അദ്ധേഹം അവിടെ സേവനം അനുഷ്ഠിച്ചു.


മടക്കയാത്രയില്‍ ഇന്ത്യയില്‍ എത്തിയ ബേക്കര്‍ ബോംബെയില്‍ വെച്ച്‌ ഗാന്ധിജിയെ കണ്ടുമുട്ടുവാന്‍ ഇടയായി. ഗാന്ധിജിയുടെ ആശയങ്ങളിലും പ്രവര്‍ത്തനങ്ങളിലും ബേക്കാര്‍ വല്ലാതെ ആകൃഷ്ടനായി.ഗാന്ധിജിയുടെ ഉപദേശപ്രകാരം 1945-ല്‍ ബേക്കര്‍ ഇന്ത്യയില്‍ മടങ്ങിയെത്തി.കുഷ്ഠരോഗികളുടെ പുനരധിവാസപ്രവര്‍ത്തനങ്ങളില്‍പങ്കെടുത്ത ബേക്കര്‍ അവര്‍ക്കായി ആശുപത്രികളും താമസസൗകര്യങ്ങളും നിര്‍മ്മിക്കുന്നതില്‍ വ്യാപൃതനായി.തുടര്‍ന്ന് ഇന്ത്യയിലെ വിവിധ സ്ഥലങ്ങളില്‍ തന്റെ സേവനപ്രവര്‍ത്തനങ്ങള്‍ തുടരുന്നതിനിടയില്‍ പില്‍ക്കലത്ത്‌ തന്റെ ഭാര്യയായ മലയാളിയായ ഡോ.എലിസബത്തിനെ പരിചയപ്പെടുവാന്‍ ഇടയായി.1948-63 കാലഘട്ടത്തില്‍ യുപിയിലെ പിത്തോള്‍ഗഡിലെ സാധാരണക്കാര്‍ക്കിടയില്‍ ബേക്കര്‍ ദമ്പതികള്‍ തങ്ങളുടെ സേവനപ്രവര്‍ത്തനങ്ങള്‍ തുടര്‍ന്നു.


1963-ല്‍ ഇവര്‍ കേരളത്തില്‍ എത്തി.1970-ല്‍ ബേക്കറും കുടുമ്പവും തിരുവനന്തപുരത്ത്‌ താമസമാക്കി.പിന്നീട്‌ ബേക്കര്‍ സ്റ്റെയില്‍ എന്ന് പ്രസിദ്ധിനേടിയ ചിലവുകുറഞ്ഞ നിര്‍മ്മാണരീതിയിലുള്ള കെട്ടിട നിര്‍മ്മാണപ്രവര്‍ത്തനങ്ങളില്‍ മുഴുകിയ ബേക്കര്‍ വളരെ പെട്ടെന്ന് തന്നെ തന്റെ കര്‍മ്മമണ്ടലത്തില്‍ വ്യക്തിമുദ്രപതിപ്പിച്ചു.സി.അച്യുതമേനോന്‍ എന്ന ക്രാന്തദര്‍ശിയായ മുന്‍ മുഖ്യമന്ത്രി ബേക്കറുടെ നിര്‍മ്മാണശൈലിയില്‍ ആകൃഷ്ടനായി.അദ്ദേഹത്തിന്റെ പിന്തുണയോടെ 1985-ല്‍ കോസ്റ്റ്‌ഫോര്‍ഡ്‌ രൂപീകരീച്ചു.കേരളത്തിന്റെ വാസ്തുവിദ്യാരംഗത്തെ ചരിത്രപരമായ ഒരു കാല്‍വെപ്പായിരുന്നു ഇത്‌.സ്വന്തമായി വീടെന്ന സാധാരണക്കാരന്റെ സ്വപ്നത്തെ യാദാര്‍ഥ്യത്തിലേക്ക്‌ കൈപിടിച്ചുയര്‍ത്തുവാന്‍ ബേക്കറെന്ന അമരക്കാരനിലൂടെ കോസ്റ്റ്‌ഫോര്‍ഡിനു കഴിഞ്ഞു.

നിരവധി കെട്ടിടങ്ങള്‍ ഡിസൈന്‍ ചെയ്തു നിര്‍മ്മിച്ച ബേക്കര്‍ പല സംരംഭങ്ങളുടേയും സ്ഥാപനങ്ങളുടേയും ഉപദേശകനായും പ്രവര്‍ത്തിച്ചു.1981-ല്‍ നെതര്‍ലാന്റിലെ റോയല്‍ യൂണിവേഴ്സിറ്റിയില്‍ നിന്നു ഡിലിറ്റും 1992-ല്‍ ഐക്യരാഷ്ട്രസഭ ഹാബിറ്റാറ്റ്‌ പുരസ്ക്കാരം തുടങ്ങി ദേശീയവും അന്തര്‍ദേശീയവുമായ നിരവധിപുരസ്ക്കാരങ്ങള്‍ ബേക്കറെ തേടിയെത്തി.1989-ല്‍ ഇന്ത്യന്‍ പൗരത്വം ലഭിച്ച അദ്ദേഹത്തെ 1990-ല്‍ രാഷ്ട്രം പത്മശ്രീ നല്‍കി ആദരിച്ചു.2007-ഏപ്രില്‍ 1നു രാവിലെ 7.30നു തിരുവനന്തപുരത്തെ സ്വവസതിയായ ഹാംലറ്റില്‍ വെച്ച്‌ അന്തരിച്ചു.

മക്കള്‍: വിദ്യാ രാധാകൃഷ്ണന്‍,തിലക്‌ ബേക്കര്‍,ഹൈഡി ബേക്കര്‍.

Tuesday, February 13, 2007

റിയല്‍ എസ്റ്റേറ്റും പ്രവാസികളും

റിയല്‍ എസ്റ്റേറ്റും പ്രവാസികളും പ്രവാസികളെ സംബന്ധിച്ചേടത്തോളം നാട്ടില്‍ ഒരു ഇന്‍വെസ്റ്റ്‌മന്റ്‌ എന്നത്‌ എന്നും ഒരു സ്വപ്നമാണ്‌. ജോലിയുടെ അരക്ഷിതാവസ്ഥ അവനെ നിക്ഷേപങ്ങളെ കുറിച്ച്‌ ഗൗരവപൂര്‍വ്വം ചിന്തിപ്പിക്കുവാന്‍ പ്രേരിപ്പിക്കുന്നു. ബാങ്കുകളില്‍ നിന്നും നിക്ഷേപങ്ങള്‍ക്കുള്ള പലിശനിരക്ക്‌ ആകര്‍ഷകമല്ലെന്ന് തോന്നിയതിനാല്‍ പലരും ഷെയര്‍ മാര്‍ക്കറ്റിലും,മ്യൂച്വല്‍ ഫണ്ടുകളിലും, റിയല്‍ എസ്റ്റേറ്റിലും നിക്ഷേപങ്ങള്‍ നടത്തുവാന്‍ തുടങ്ങി. ഷയര്‍ മാര്‍ക്കറ്റിന്റെ ഒരു "റിസ്ക്ക്‌" കണക്കിലാക്കുമ്പോള്‍ അതിനെക്കുറിച്ച്‌ വ്യക്തമായ ധാരണയില്ലാത്തവര്‍ അതില്‍ വലിയ താല്‍പര്യം എടുക്കാന്‍ നില്‍ക്കില്ല. ഇത്തരം ആളുകള്‍ മറ്റു രംഗങ്ങളെ കുറിച്ച്‌ ആലോചിക്കുവാന്‍ തുടങ്ങി.ഇന്നത്തെ സാഹചര്യത്തില്‍ കഷ്ടപ്പെട്ടുണ്ടാക്കുന്ന കാശ്‌ കേരളത്തില്‍ വ്യവസായരംഗത്ത്‌ നിക്ഷേപം നടത്തുന്നതുവാന്‍ സാമാന്യ ബോധമുള്ള ആരും തുനിയില്ല.

പ്രവാസി മലയാളിയെ സംബന്ധിച്ചേടത്തോളം ഒരു നിഷേപങ്ങള്‍ എന്നും ഒരു ആവേശമാണ്‌.അതിനായി അവര്‍ കൂടുതല്‍ ലാഭസാധ്യതയുള്ള പുതിയ രംഗങ്ങളെ എന്നും അന്വേഷിച്ചുകൊണ്ടിരിക്കും. ഈ അവസരം മുതലെടുത്തുകൊണ്ട്‌ പല "തട്ടിപ്പ്‌ സംരംഭങ്ങളും" പരസ്യകോലാഹലങ്ങളൂടേയും വന്‍ പ്രചരണകോലാഹലങ്ങളൂടേയും അകമ്പടിയോടെ കടന്നുവന്നു. അതില്‍ പ്രധാനപ്പെട്ട ഒന്നായിരുന്നു തേക്ക്‌ ആട്‌ മാഞ്ചിയം,എണ്ണപ്പന തുടങ്ങി ജനകീയ സിനിമാ നിര്‍മ്മാണം തുടങ്ങി വ്യത്യസ്ഥ സ്കീമുകള്‍. നിങ്ങള്‍ ഒരു യൂണിട്‌ ഒരു നിശ്ചിത തുക മുടക്കി എടുക്കുമ്പോള്‍ പതിനഞ്ചും ഇരുപതും വര്‍ഷങ്ങള്‍ക്ക്‌ ശേഷം അവര്‍ ലക്ഷങ്ങള്‍ തിരികെ തരും എന്നുള്ള മനം മയക്കുന്ന പരസ്യവാചകങ്ങള്‍ മാര്‍ക്കറ്റിങ്ങിനായി വാക്ചാതുര്യമുള്ള ആളുകള്‍ കൂടാതെ ചില പ്രശസ്തരുടെ "ഉറപ്പുകള്‍". ഇത്തരം സംരംഭങ്ങളില്‍ വന്‍ നിക്ഷേപം നടത്തുകയും ഒടുവില്‍ പണം നഷ്ടപ്പെടുകയും ചെയ്തവരില്‍ ഭൂരിപക്ഷവും പ്രവാസികള്‍ ആയിരുന്നു.ഇത്തരം തട്ടിപ്പുകാരുടെ പ്രധാനലക്ഷ്യം എന്നും പ്രവാസികള്‍ തന്നെയായിരുന്നു.

ഇന്നിതാ പ്രവാസികള്‍ക്കു മുമ്പില്‍ മറ്റൊരു ചൂണ്ടല്‍ റിയല്‍ എസ്റ്റേറ്റ്‌ എന്ന ഇരയെകുത്തി വിരുതന്മാര്‍ നീട്ടിയെറിയാന്‍ തുടങ്ങിയിരിക്കുന്നു. ചിലരെങ്കിലും ഇത്തരം ചൂണ്ടകള്‍ വിഴുങ്ങിക്കഴിഞ്ഞു.കൊച്ചിയിലെ സ്മാര്‍ട്ട്‌ സിറ്റി പോളുള്ള പ്രോജക്ടുകളുടെ ചര്‍ച്ചകള്‍ തുടങ്ങിയതോടെ അവിടെ റിയല്‍ എസ്റ്റേറ്റ്‌ രംഗം വന്‍ കുതിപ്പാണ്‌ നടത്തിയത്‌. ഇതിന്റെ ചുവടുപിടിച്ച്‌ കേരളത്തിലെ കൊച്ചുപട്ടണങ്ങളിലും റിയല്‍ എസ്റ്റേറ്റ്‌ രംഗം കുതിക്കുവാന്‍ തുടങ്ങി. ഒന്നുരണ്ടുവര്‍ഷം മുമ്പ്‌ ഉണ്ടായിരുന്നതിനേക്കാള്‍ പലമടങ്ങായി ഭൂമിയുടെ വില.ഇത്‌ പലര്‍ക്കും ഈ രംഗത്ത്‌ നിഷേപങ്ങള്‍ നടത്തുവാന്‍ പ്രചോദനമായി.കേരളത്തിലെ പല പ്രധാന നഗരങ്ങളിലും സമീപ പ്രദേശങ്ങളിലും ചിലര്‍ വന്തോതില്‍ ഭൂമിവാങ്ങിക്കൂട്ടുകയും തുടര്‍ന്ന് പ്ലോട്ടുകളായിതിരിച്‌ അതിനു അവര്‍ പലമടങ്ങ്‌ വില നിശ്ചയിക്കുകയും ചെയ്യുന്നു. ഭൂമിവില ഇനിയും വന്‍ തോതില്‍ ഉയരും എന്നതിനാല്‍ പലരും അവര്‍ പറയുന്ന മോഹവിലക്ക്‌ ഭൂമി കൈക്കലാക്കുന്നു. ഇന്നിപ്പോള്‍ കേരളത്തിനു പുറത്തും ഇത്തരം പ്ലോട്ടുകള്‍ക്ക്‌ വന്‍ ഡിമാന്റായി മാറിയിരിക്കുന്നു.പലതിനും യദാര്‍ത്ഥവിലയേക്കാള്‍ പതിന്മടങ്ങ്‌ വിലയാണ്‌ ഇതേകുറിച്ച്‌ ധാരണയില്ലാത്തവരില്‍ നിന്നും ഇത്തരക്കാര്‍ ഈടാക്കുന്നത്‌.ഇത്തരം സംരംഭങ്ങളില്‍ നിക്ഷേപിക്കുന്നവര്‍ അവരുടെ ഭൂമിസംബന്ധമായ ഡോക്യുമെന്റുകളും നിബന്ധനകളും കൃത്യമായി പരിശോധിച്ച്‌ മനസ്സിലാക്കാന്‍ ശ്രദ്ധിക്കേണ്ടിയിരിക്കുന്നു.വ്യവഹാരങ്ങളില്‍ പെട്ട്‌ ഭൂമിയാണോ, ഇതിനുമേല്‍ എന്തെങ്കിലു തരത്തിലുള്ള ലോണുകള്‍ ഉണ്ടോ അല്ലെങ്കില്‍ കൂട്ടുകുടുമ്പ സ്വത്താണെങ്കില്‍ എല്ലാ അവകാശികളുടേയും അനുമതിപത്രം വാങ്ങിയിട്ടുണ്ടോ തുടങ്ങിയ ഒത്തിരി കാര്യങ്ങള്‍ ശ്രദ്ധിക്കുവാനുണ്ട്‌. വിദഗദനായ ഒരു ഡോക്യുമന്റ്‌ റൈറ്ററെക്കൊണ്ടോ അല്ലെങ്കില്‍ ഒരു അഭിഭാഷകനെക്കൊണ്ടോ പരിശോധിച്ച്‌ തട്ടിപ്പുകള്‍ ഇല്ലെന്ന് ഉറപ്പുവരുത്തുക. ഇല്ലാത്തപക്ഷം നിങ്ങളുടെ നിക്ഷേപങ്ങള്‍ "തേക്ക്‌ മാഞ്ചിയം" സ്കീം പോലെ ഒരു നാള്‍ തട്ടിപ്പാണെന്ന് തിരിച്ചറിയുമ്പോളേക്കും വൈകിയിരിക്കും.

ശ്രദ്ധിക്കേണ്ട മറ്റൊരു സംഗതി ബാങ്കില്‍ പണയം വെച്ച ഭൂമി വാങ്ങുമ്പോഴാണ്‌. വാങ്ങുന്ന വ്യക്തി ലോണ്‍ അടച്ചുതീര്‍ത്ത്‌ ബധ്യത തീര്‍ത്ത്‌ ആധാരം എടുത്ത്‌ ഉടമസ്ഥനു നല്‍കുകയും തുടര്‍ന്ന് ഉടമസ്ഥന്‍ സ്ഥലം വാങ്ങാന്‍ പണം നല്‍കിയ വ്യക്തിയുടെ പെരില്‍ റെജിസ്റ്റര്‍ ചെയ്തു നല്‍കുവാന്‍ തയ്യാറാകാതിരിക്കുകയും പണം തിരികെ നല്‍കാതിരിക്കുകയും ചെയ്ത്‌ വഞ്ചിതരായ പ്രവാസികള്‍ നിരവധിയാണ്‌.

കേരളത്തിനു പുറത്ത്‌ ചെറിയ പ്ലോട്ടുകളും വന്‍ തൊട്ടങ്ങളും വാങ്ങുന്ന ഒത്തിരി മലയാളികള്‍ ഉണ്ട്‌.അന്യ സംസ്ഥാനങ്ങളില്‍ നിഷേപം നടത്തുമ്പോള്‍ അവിടെ അത്‌ സുരക്ഷിതമാണോ എന്നകാര്യം കൂടെ പരിഗണിക്കെണ്ടതുണ്ട്‌. ഭൂമി വെട്ടിപ്പിടിക്കല്‍ എന്ന് നാട്ടിന്‍ പുറങ്ങളില്‍ പണ്ടു പറയാറുള്ള സംഗതി ഇവിടങ്ങളില്‍ ധാരാളമായി നടക്കുന്നുണ്ട്‌. തുടര്‍ന്ന് കേസും മറ്റും ആകുമ്പോള്‍ അത്‌ കൈകാര്യം ചെയ്യുവാന്‍ പലപ്പോഴും പ്രവാസികള്‍ക്ക്‌ ബുദ്ധിമുട്ടാകും സമയനഷ്ടവും ധനനഷ്ടവും കൂടാതെ മനസ്സമാധാനവും ഇല്ലാതാകും.

തീച്ചയായും റിയല്‍ എസ്റ്റേറ്റ്‌ മോശപ്പെട്ട നിക്ഷേപം അല്ല. ധനകാര്യ സ്ഥാപനങ്ങള്‍ ഇത്തരം നിക്ഷേപങ്ങള്‍ക്ക്‌ ധാരാളം ലോണുകളും നല്‍കുന്നുണ്ട്‌. നമ്മുടെ വരുമാനത്തേയും തിരിച്ചടക്കാനുള്ള ശേഷിയേയും കൂടെ കണക്കിലെടുത്ത്‌ മാത്രം നിഷേപങ്ങള്‍ നടത്തുക. ഇല്ലെങ്കില്‍ ലോണടക്കുവാനുള്ള തത്രപ്പടില്‍ നമ്മുടെ ജീവിതത്തിലെ സ്വസ്തതയും സമാധാനവും നഷ്ടമാകും.സൂക്ഷിക്കുക നിങ്ങള്‍ റിയല്‍ എസ്റ്റേറ്റില്‍ കാലെടുത്തുവെക്കുന്നതിനു മുമ്പ്‌ ഒരുവട്ടം കൂടെ ചിന്തിക്കുക. ചതിക്കുഴികള്‍ ഒത്തിരിയുണ്ട്‌!

തുടരും

Saturday, February 03, 2007

പ്ലാന്‍ -7



1028 ചതുരശ്ര അടി ( മീറ്റര്‍സ്ക്വയറില്‍ ആണ്‌ ഔദ്യോഗികമായി ഇപ്പോള്‍ ഏരിയ കണക്കാക്കുന്നത്‌, അതുപ്രകാരം 95.6 ചതുരശ്രമീറ്റര്‍) വലിപ്പമുള്ള ഒരു വീടിന്റെ പ്ലാനാണിത്‌.ആര്‍ഭാടങ്ങളില്ലാതെ ലളിതമായ രീതിയില്‍ പണിയുകയാണെങ്കില്‍ അഞ്ചരലക്ഷം മുതല്‍ ആറുലക്ഷം വരെ ചിലവു പ്രതീക്ഷിക്കാം ഈ വീടിനു. ചിലവുകുറഞ്ഞ രീതികള്‍ അവലംബിച്ച്‌ നിര്‍മ്മിക്കുകയാണെങ്കില്‍ ഇതിലും കുറഞ്ഞ തുകക്ക്‌ വീടുപണി പൂര്‍ത്തിയാക്കാന്‍ കഴിയും.കിച്ചണില്‍ അനാവശ്യമായി ഷെല്‍ഫുകള്‍ നല്‍കുന്നത്‌ ഇന്ന് ഒരു ഫാഷനായിട്ടുണ്ട്‌ ഇത്‌ ആവശ്യത്തിനു മാത്രം നല്‍കി വര്‍ക്കിങ്ങ്‌ സ്ലാബിനു താഴെയുള്ള ഭാഗം പരമാവധി ഉപയോഗപ്പെടുത്തുവാന്‍ ശ്രദ്ധിക്കുക. അനാവശ്യമായ കാബിനെറ്റുകള്‍ സാമ്പത്തിക ചിലവ്‌ വര്‍ദ്ധിപ്പിക്കുക മാത്രമല്ല കിച്ചണിന്റെ സൗകര്യങ്ങളെ കുറക്കുകകൂടിയാണ്‌ ചെയ്യുക.

സ്റ്റെയര്‍കേസിന്റെ അടിഭാഗം ബേഡ്രൂമിലേക്ക്‌ തുറക്കാവുന്നവിധം കബോഡുകള്‍ നല്‍കി വസ്ത്രങ്ങള്‍ സൂക്ഷിക്കുവാന്‍ ഉള്ള സൗകര്യം ഒരുക്കാം.പഴയപത്രക്കടലാസും മറ്റു വേസ്റ്റുകളും ഇട്ട്‌ പൊടിപിടിച്ചുകിടക്കുന്ന ഒരു ഇടമായി മാറ്റാതെ പരമാവധി ഉപയോഗിക്കാന്‍ ശ്രദ്ധിക്കുക.

ബാത്രൂമില്‍ വെറ്റ്‌ ഏരിയായും ഡ്രൈ ഏരിയായും ആയി തിരിച്ചാല്‍ നന്നായിരിക്കും. ഷവര്‍ കൊടുക്കുന്ന ഏരിയാ അല്‍പ്പം താഴ്ത്തിക്കൊടുക്കുക.ബാത്രൂമിലെ ഫ്ലോര്‍ ടെയിലുകള്‍ ഗുണനിലവാരം ഉള്ളതും ഉപയോഗിക്കുന്നവര്‍ തെന്നിവീഴുവാന്‍ സാധ്യതകുറവുള്ള ആന്റി സ്കിഡ്‌ ടെയിലുകള്‍ തിരഞ്ഞെടുക്കണം. വെള്ളം കെട്ടിനില്‍ക്കാതെ കൃത്യമായി ഒഴുകിപ്പോകുവാന്‍ സഹായകമായ രീതിയില്‍ ആവശ്യമായ സ്ലോപ്പ്‌ നല്‍കുവാനും ശ്രദ്ധിക്കുക. ഒരു ഷവര്‍ കര്‍ട്ടന്‍ കൂടെ ഫിക്സ്‌ ചെയ്താല്‍ വെള്ളം ഡ്രൈ ഏരിയായിലേക്ക്‌ വരുന്നതു തടയാം.

ലിവിങ്ങും ഡൈനിങ്ങും ഒരുമിച്ചായതിനാലും അവിടത്തെ ഏരിയ കുറവായാതിനാലും അതിനനുസൃതമായ വലിപ്പത്തിലുള്ള ഫര്‍ണ്ണീച്ചറുകള്‍ തിരഞ്ഞെടുക്കുക.

E-pathram

ePathram.com